«قادرة أسد خانة الأب والأم».. ماذا قالت زينة عن توأمها مع أنس بوخش؟ (تقرير)

حلت الفنانة زينة ضيفة في برنامج «ABtalks»، مع الإعلامي الإماراتي أنس بوخش، وتحدثت زينة خلال اللقاء عن والدتها لتوأمها في أمريكا بمفردها، وتربيتها لهما، وتصدرت الترند بعد تصريحاتها عنه، خاصة أنها لا تتحدث كثيرًا عنهم وتحرص دائمًا على عدم ظهورهم على مواقع التواصل الاجتماعي، حفاظًا على خصوصيتهم.
وتحدثت الفنانة زينة، عن أصعب الفترات في حياتها، مشيرة إلى أن فترة والدتها لطفليها التوأم في أمريكا هي الأصعب، لأنها كانت بمفردها وولديها كانا يعانيان من أمراض عدة.
وأضافت زينة خلال لقائها مع الإعلامي أنس بوخش: «أنا شوفت في حياتي حاجات محدش يقدر يتجاوزها.. ومحدش يقدر يعيش اللي أنا عيشته، مرحلة إني بولد في الغربة لوحدي وولادي اتولدوا تعبانين أوي وكل يوم بكتشف فيهم مرض جديد، وأنا فاكرة أنهم كتفوني عشان يغيرولي على الجرح».
زينة: «كانوا هياخدوا ولادي وافتكروني مجنونة وجابولي شيخ»
وتابعت: «أنا كنت خايفة امشي عشان ابقى قعدت معاهم أطول وقت ممكن وشوفتهم وشبعت منهم، بس أن الوالدة المفروض تاكل وتستريح وأنا كنت بنسى أشرب مياه وفي المستشفى افتكروني مجنونة وواحدة مش طبيعية وماليش أهل خالص وجابولي شيخ ودكتورة نفسية والدكتورة دي كانت هندية وأنا بكلمها عربي، واتضح إني بكلمها عربي عشان مطمنة لها».
وأشارت: «جابوا لي مترجمة عشان كانوا هياخدوا عيالي لأنهم فاكرني مش طبيعية وكنت عنيفة معاهم أوي، المترجمة عرفتني وقالت لهم إني ممثلة مشهورة ودخلوا على جوجل وعرفوني».
أردفت: «قالتلي اسكتي خالص واعملي اللي أقولك عليه عشان هياخدوا عيالك لأنهم امريكان ومن حقهم، نزلت وجبلتهم هدايا وعملت حاجات تحسن صورتي، والدكتورة الكبيرة قالتلي لو كل الأمهات في البلد بتاعتك زيك دي تبقى أعظم بلد في العالم».
زينة تتحدث عن علاقتها بتوأمها زين وعز الدين
كما تحدثت عن علاقتها بابنيها التوأم عز الدين وزين الدين، موضحة أن لكل منهما مكانة في قلبها، موضحة: «كل واحد فيهم واخد حتة معينة غالية أوي، وكل واحد ليه حتة مش، الاتنين نفس الحتة، متساويين في الغلاوة بس بشكل مختلف، بحس إن هما بني آدم واتقسم نصين، نص أنا ونص مش أنا بس بحبه».
تابعت: «النصين عندي بيخلوني أقعد افكر كتير، أنا كنت فاكرة في الأول إن أنا شخصية مهمة بس لما كنت بقعد لوحدي بحس إني ولا حاجة، بس من ساعة ما خلفت ولحد دلوقتي أنا طول الوقت حاسة إني حاجة كبيرة أوي لأني أم للاتنين دول، كنت حاسة إني ماليش قيمة ولا لازمة، بقى ليا لازمة وبقيت أخاف على نفسي، بخاف على عمري لأن هما محتاجيني».
استكملت: «هو ده الحب الوحيد اللي بتدي فيه وأنت مش عايز مقابل، أنا مش مستنية منهم حاجة.. ابني ساعات بيقولي مثلا لما تكبري ولما تحتاجي مش عارف إيه يا مامي لازم تعمليلي كذا فبقوله يا حبيبي أنا مش عايزة منك حاجة، قالي طب لو تعبانة؟ قولتله سيبني أنا مش عايزة منك حاجة».
واصلت: «أنا بربيهم لله، بربيهم علشان ربنا وعلشان بحبهم، ربنا حط حب ليهم في قلبي غير طبيعي، أنا مشوفتش حد كده، أنا ممكن اتخانق مع عيال صغيرة علشانهم».
أشارت إلى أن أكبر خوف في حياتها هو على أولادها، موضحة: «بخاف على عيالي من المرض، صحتهم ضعيفة يعني مش عيال أقوياء علشان اتولدوا 7 شهور، وعندهم نوع انيميا صعب شوية، وبيلعبوا رياضة على طول بس بيتكسروا بقى».
زينة عن تربية أولادها في ظل عدم وجود الأب: «قادرة أسد خانة الأب والأم»
أما عن تربية أولادها في ظل عدم وجود الأب، قالت: «اللي ماترباش على حاجة مايعرفش هو فقد اية، ممكن اللي فقدوه مش حلو يمكن عوض ربنا أحسن ويمكن ربنا يعوضنا بالأهم والأحسن مستقبل وحياة.. مش لازم التعويض يبقى في نفس الصورة وأنا واحدة من الناس بشوف نفسي قوية».
أكدت: «أنه أنا أقدر أسد خانة الأب والأم، مدام هما مش ناقصهم حاجة يبقى هيفكروا ليه في حاجة مش موجودة، حاجة مش مهمة أو حاجة محسوش بأهميتها، بس في الآخر عارفين كل حاجة، أنا عايزة الناس تطمئن هما عارفين كل حاجة».
اقرأ أيضًا:
زينة عن ولادتها في أمريكا: «كانوا هياخدوا ولادي وافتكروني مجنونة وجابولي شيخ» (فيديو)