«كنت حفر لقيت كيس فيه صور مؤمن زكريا».. اعترافات التربي المتهم في واقعة السحر (مستند)

حصلت «المصري اليوم»، على نص التحقيقات، في واقعة فبركة السحر للاعب السابق مؤمن زكريا، وتفاصيل أقوال التربي المتهم في واقعة فبركة السحر، أمام النيابة العامة في القضية التي تحمل رقم 6904 لسنة 2024 جنح الخليفة.
ومن المقرر أن تعقد محكمة جنح الخليفة، غدًا الثلاثاء، أولى جلسات محاكمة المتهمين الخمسة، في واقعة إدعاء العثور على أعمال سحر خاصة بمؤمن زكريا، أمام مدفن بمنطقة الخليفة.
واقعة سحر اللاعب مؤمن زكريا
تحقيقات النيابة العامة مع أقوال التربي المتهم في واقعة فبركة أعمال سحر مؤمن زكريا، حيث وجهت النيابة للمتهم سؤالا بشأن ما حدث وظروف ضبطه.
وقال المتهم في اعترافاته إنه «شغال تربي في مقابر سيدي عقبة في الخليفة، وفي يوم كنت بزرع صبارة في الترب مرة واحدة، ووأنا بحفر لقيت كيس بلاستيك فمسكته وفتحته عشان أشوف فيه إيه لقيت فيه لفتين، وبفتح أول لفة لقيت مكتوب فيها طلاسم وحاجات مش مفهومة، واللفة التانية بفتحها لقيت فيها ثلاث ورقات بيض مكتوب عليها كلام مش مفهوم وفيها صورة كابتن مؤمن زكريا، والصورة مكتوب عليها بالأحمر كلام مش مفهوم ومدبس فيها أكثر من دبوس ومكتوب عليها بالأحمر».
وأضاف: «ساعتها أنا صورتهم بالتليفون محمد جوز أمنية، واتصلت ب»محمد.أ«، قريبي وقلتله على اللى أنا شفته وساعتها هو قالي إنه يعرف حد يوصلني بالكابتن مؤمن زكريا، وبعد كده لقيت واحد اسمه مصطفى ومعاه واحد صاحبه وقالي إنه قريب زوجة مؤمن زكريا، وساعتها طلب مني إنه يشوف الأعمال اللي أنا شوفتها في المدفن، فوريتهاله وقالي إن مرات مؤمن زكريا هتتواصل معايا، وبعدها بيومين لقيت كابتن مؤمن زكريا واتنين شيوخ وأبومؤمن زكريا ومصطفى والشيوخ قدامي».
وأوضح التربي المتهم: «طلبوا مني أجيب الأعمال عشان يشوفوها وبعدها قعدوا يطلبوا مني خل ومايه وسلطانية على أساس أنهم بيفكوا الأعمال، وبعد كده طلبوا مني أنهم يشوفوا المكان اللي أنا لقيت فيه الكيس ده وريتهلهم والشيخ طلب منى أحفر شوية كمان وطلع ساعتها من الحفرة اللي جنب التربة حتتين فخار وسلك، وبعد كده حط زرعة الصبار وسقاها بمية مقري عليها قرآن».
وأضاف المتهم: «بعد كده مشيوا لقيت محمد.ع بيقولي إنه صورنا واحنا بنفك العمل وساعتها أنا طلبت منه إنه يمسح أي حاجة صورها عشان مينفعش تتاجر بمرض حد، وبعدين وتاني يوم وأنا رايح أجيب علاج من الصيدلية لقيت الصيدلي بيقولي أيه موضوع مؤمن زكريا؟ قولتله إنه كان فيه أعمال ليه في الترب وفيه شيخ جه فكها وساعتها الصيدلي بيقولي أنا مصدقك، ساعتها رحت طلعتله الصور اللي كنت مصورها للأعمال والدكتور ساعتها طلب مني أبعتله الصور فبعتهاله بحسن نية، وبعد كده لقيت حد بيتصل بيا وبيقولي أنه هو جاري وبيسألني على موضوع مؤمن زكريا فحكيلته».
وتابع: «بعدها على طول لقيت المكالمة اللي كانت بيني وبين الراجل ده، ويوم السبت اللي فات لقيت رئيس المباحث بيتصل بيا وبيقولي أنا عند البيت عندك، وقالي عاوزك تيجي لي حالا وفعلا أنا رحتله عند البيت وقالي إيه ياعم اللى إنت عامله؟ قلتله أنا معملتش حاجة وطلب مني إني أوريله مكان الحفرة اللي كان فيها الأعمال فوريتهاله وحكيت له على كل اللي حصل، وبعد كده راح أخدني وركبني ميكروباص وطلعنا على قسم الخليفة، وفي القسم طلعت وحدة المباحث وفضلت قاعد في المباحث، وبعد كده لقيتهم نزلوني الحجز وبعدها جابوني على النيابة وهو ده كل اللي حصل».