«عروسة متكتفة وطلاسم».. ننشر نص أقوال مؤمن زكريا في تحقيقات واقعة السحر

حصلت «المصري اليوم»، على نص التحقيقات، في واقعة فبركة السحر للاعب السابق مؤمن زكريا، وتفاصيل أقوال اللاعب السابق أمام النيابة العامة.
ومن المقرر أن تعقد محكمة جنح الخليفة، غدًا الثلاثاء، أولى جلسات محاكمة المتهمين الخمسة، في واقعة ادعاء العثور على أعمال سحر خاصة بمؤمن زكريا، أمام مدفن بمنطقة الخليفة.
تحقيقات النيابة العامة مع مؤمن زكريا
س: ما تفصيلات بلاغك؟
ج: اللي حصل أن لقيت واحد قريب زوجتي يدعى «مصطفى»، كلمها وقالها إن فيه واحد جارهم اسمه «محمد إمام»، قالها إن فيه ناس بيقولوا إنهم لقوا عمل معمول لزوجك «مؤمن» ملقى داخل المقابر عشان كان العمل معمول عليه صور بتاعته وكمان كان فيه عروسة مربوطة من إيديها ورجليها ودبابيس وكان عليها طلاسم، وطلبوا منها أنها تاخدني وتروح على المقابر عشان نشوف العمل، ولما وصلت قابلت الناس اللي اتمسكوا وكان معاهم واحد هرب، وهناك وروني الحاجة في مياه بملح والورق كان دايب في المياه، وكان فيه صورتين واحدة كبيرة وواحدة صغيرة عليها طلاسم، وكان فيه عروسة مربوطة من إيديها وكان مكتوب عليها طلاسم، والورق كان محطوط في المياه ودايب، بعد كده أخدنا العروسة وبقي الورق، وهناك كان فيه واحد بيصور الموضوع من وقت ما دخلت المقابر واستأذته إنه ميصورش ويمسح الصور دي ومحدش ينزل حاجة ولا ينشر حاجة، وبعد كده فوجئت بتداول الصور على مواقع التواصل الاجتماعي ونشر أخبار خلال وجودي بالمقابر.
س: ما علاقتك بالمتهمين؟
ج: انا معرفهمش، بس محمد إمام ده هو اللي جار قرايب مراتي وهو اللي تواصل مع مصطفى وكلم مراتي وقالت لي على الموضوع.
س: ما هي بادرة لقائك بالمتهمين؟
ج: أنا رحت المقابر وقابلتهم ولقيتهم مطلعين الحاجة اللي بيقولوا إن معمولي عليها العمل، عروسة وحاطين الورق في مياه بملح، ولما رحت وروني فيديو للحاجة وهما بيطلعوها من المقابر عشان أبقي متأكد أن فعلًا كانت مدفونة في المقبرة.
س: ما دور كل منهم تحديدًا؟
ج: أنا لما رحت لقيت محمد عمر كان واقف بيصور الواقعة أثناء حضوري بالمقابر ودون علمي، ولما اكتشفت التصوير طلبت منه يمسح الصور والفيديوهات اللي اخدها ومينشرهاش ولا يستخدمها، ومطلبش مني أي حاجة بعدما اكتشفت أنه نشرها على مواقع التواصل الاجتماعي ثم استضافته في برنامج ريهام سعيد ونشرها دون علمي وموافقتي بقصد التربح المالي والحصول على أموال مقابل التشهير بي، والتُّربي رمضان هو اللي بلغني أنه لقي حاجة مدفونة في المقابر وحطها في مية بملح، ولقيت صور بتاعتي والعروسة مكتوب عليها طلاسم، العروسة كانت متكفتة من الايد للرجل.