«كلام كتير ومفيش أفعال».. إبراهيم سعيد ينتقد مجلس الزمالك بسبب الصفقات

عبر إبراهيم سعيد نجم الأهلي ومنتخب مصر السابق، عن رأيه في صفقات نادي الزمالك الصيفية، التي تم التعاقد معها حتى الآن، لتدعيم صفوف الفارس الأبيض استعدادًا للموسم الكروي الجديد 2024.
وقال إبراهيم سعيد في تصريحات تليفزيونية عبر شاشة «النهار»: «الزمالك جاب لعيبة وخلاص ولا سألت عليهم حتى، والله ميلعبو جنب سور النادي، مع احترامي لعيبه جات ميلبسوش التيشرت ولا يدخلو النادي، نتيجة الاستعجال الزمالك لبس صفقات دون المستوى».
وأضاف: «اللعيب من دول يحسسك أنه رونالدينهو زي إبراهيما نداي، خيلتو للعيبة سعر بعد ما كانت تتمنى تبقى موجودة في نادي الزمالك، دلوقتي بيتكلمو في أرقام زي مليون و200 ألف دولار وأرقام خرافية، كانو بياخدو 30 ألف دولار آخرهم».
وأكمل نجم الأهلي السابق: «بتمنى أن مجلس إدارة الزمالك يشتغل الفترة الجاية باحترافية شوية، ومفروض كل عضو يبقى مختص بملف، لأن الزمالك عمال يبعد عن البطولات والمشاركة والمنافسة، وكل الحاجات دي بتوقع القيمة التسويقية بتاعتك».
وزاد: «بلاش كل شوية النغمة بتاعت المجلس السابق هو السبب، طب حضرتك قاعد بتعمل أية دلوقتي، لو هعد أعمل مبررات مش هشتغل، لازم تشتغل صح، الصعوبات اللي واجهتك حاول تحلها حتى لو على المدى البعيد».
ونوه بأن المجلس لازم يقلل من كلامه، لأني بشوف كلام كتير ومفيش أفعال، لازم يشتغلوا لأن نادي الزمالك أكبر من كدة، وليه قاعدة جماهيره كبيرة جدًا.