«أنا داخل خناقة».. شوبير يهاجم صراع الأهلي والزمالك على حساب منتخب مصر

شن الإعلامي أحمد شوبير هجوما عنيفا على عدد من جماهير الأهلي والزمالك في ظل الصراع المشتعل بينهم على عناصر منتخب مصر من الفريقين دون النظر لمصلحة منتخب مصر.
ويستعد منتخب مصر لمواجهة من العيار الثقيل غدا أمام منتخب غينيا بيساو ضمن الجولة الرابعة من التصفيات الأفريقية المؤهلة لنهائيات كأس العالم 2026.
وقال أحمد شوبير: «شفنا منتخب المغرب بيفوز بضعوبة على زامبيا 2-1 ومشاكل مع اللاعبين حكيمي وزياش وهما خارجين من الملعب وحالة غضب شديد، ولكن لما سألوا وليد الركراكي المدير الفني لمنتخب المغرب قال لهم عادي لاعبين متعصبين واعتذروا ومباراة كانت مشدودة وصعبة».
وأوضح أحمد شوبير: ده إحنا في مصر مشكلة الأهلي والزمالك مشكلة صعبة جدا لما يحصل حاجة للاعب في الأهلي تلاقي جماهير الزمالك هجوم شديد والعكس، ولما تقول يا عم ده منتخب مصر يقول لك ما يهمنيش أنا همي الأهلي وأنا همي الزمالك.
وأردف شوبير: «يعني مثلا انا اكلمت على زيزو وإمام عاشور ودافعت عن حسام حسن قالوا لك شوفت عشان ابنه ملعبش طيب قول لي أعمل أيه ولو انتقدت حسام يقول لك برضه عشان ابنه ما لعبش».
وأضاف شوبير: «بصوا بقه أنا داخل في خناقة بجد مش هزار حضرتك مش همك منتخب بلدك متشجعش، يقول لك لأ أنا هنكد عليهم أنا محبش حسام حسن وعايز المنتخب يخسر ياعم طب ابعد بعيد وسيب منتخب مصر ينجح، يقول لك هو ينفع الزمالك ما يبقاش فيه غير لاعب واحد أو اثنين هو اسمه منتخب مصر ولا منتخب الأهلي ياعم بكره يبقى فيه 8 لاعبين من الزمالك عادي يعني بتحصل».
وهاجم شوبير هذه الفئة بقوة مضيفًا: «انتوا هتفضلوا كل شوية في الخناقة دي طول الوقت، عشان تعرفوا برضه أنا عمري ما هقدر أغير في أفكار الناس، بس أنا جاي داخل خناقة عشان يهمني منتخب مصر يكسب، ويفوز ب زيد يفوز ب عبيد بأي حد مش مشكلة، أنا ما ينفعش أعيش حالة كأس العالم اللي فاتت دي تاني لما كنت بتفرج على البطولة من غير منتخب مصر خاصة إن عندي جيل كويس يبقى ما نساعدهمش ليه».
واختتم شوبير: «يا جماعة إحنا محققناش عبر التاريخ فوز واحد في كأس العالم في ال 3 مشاركات اللي رحنا فيها المونديال ليه شوية ما ننساش الانحياز للأهلي والزمالك ونفكر في البلد».