«الحمد لله طلعت براءة».. عبدالرحمن مجدي يكشف تفاصيل اتهامه بالتحرش

كشف عبدالرحمن مجدي لاعب النادي الإسماعيلي ومنتخب مصر تفاصيل اتهامه بالتحرش على هامش مشاركته مع منتخب مصر في أوليمبياد طوكيو.
وقال عبدالرحمن مجدي في تصريحات عبر برنامج (ملعب أون تايم) مع شوبير: «أنا خرجت من قصة اتهامي بالتحرش في أوليمبياد طوكيو مع منتخب مصر بلا عقوبات ولا أي حاجة عشان لو فيه حاجة اساس مكنتش هترجع من اليابان»ز
وتابع نجم النادي الإسماعيلي المتألق هذا الموسم: «المهندس أحمد مجاهد عارف كل التفاصيل بس أنا من الناس اللي مش بتحب اللقطة ومش بتحب تظهر كل شوية في القنوات تتكلم، وللأسف الناس هنا في مصر بتحب التريند عشان فجأة لقيت مصر كلها بتتكلم في الموضوع فهتبرر لمين ولا مين».
وأضاف عبدالرحمن مجدي: «الحمد لله براءتي جت من عند ربنا وبعدها رجعت ولعبت مع النادي الإسماعيلي ولعبت لمنتخب مصر من تاني، والناس في الإسماعيلية عايز أقول لهم بلاش تقيم اللاعب بمباراة واصبروا على اللاعبين شوية».
عبدالرحمن مجدي يكشف سبب فشل انتقاله للزمالك وقصة مفاوضاته مع الأهلي
فيما كشف عبدالرحمن مجدي سبب فشل انتقاله إلى نادي الزمالك بعدما كان قريبا من القلعة البيضاء وكذلك قصة مفاوضاته مع الأهلي.
وقال عبدالرحمن مجدي في برنامج مع شوبير: «قصة الزمالك باختصار إن في الوقت ده كان عقدي مع الإسماعيلي مفسوخ وكلمت الكابتن محمد شيحة وكان في المجلس وقتها وأبوبكر الحديدي رئيس النادي قولت لهم أنا عندي عرض من الزمالك وعايز النادي الإسماعيلي يستفيد وبدل ما أوقع وأنا لاعب حر عايز الاتفاق يتم من خلال الإسماعيلي ولكن لم يحدث توفيق».
وأوضح عبدالرحمن مجدي: «الزمالك كانوا اتفقوا على مبلغ معين من خلال المستشار مرتضى منصور والإسماعيلي طلب أكثر ولذلك باظت الصفقة ولم أرغب في عمل مشكلات خاصة أنه كان هناك عقد آخر لي مع الإسماعيلي وقعته مع المهندس يحيى الكومي وظهر حينها».
وأضاف عبدالرحمن مجدي بخصوص قصة مفاوضات الأهلي: «بعد بطولة أفريقيا اللي كسبناها هنا كمنخب أوليمبي في مصر تواصل معايا حد من الأهلي وبعدها لما رحت الأوليمبياد وحصلت لي مشكلة تراجع مسؤولو الأهلي عن التعاقد معي وخدوا فكرة أني لاعب غير ملتزم بالغلط، وأنا عايش حياتي حاليًا خلاص عشان أهلي وأسرتي فقط».