تامر أمين يحذر مجلس الأهلي: «الدوري مش فارق معايا.. اقعدوا واتفقوا هنعمل إيه؟» (فيديو)

وجه الإعلامي تامر أمين، رسالة إلى مجلس إدارة النادي الأهلي برئاسة محمود الخطيب، وجمهور المارد الأحمر، بشأن أهمية بطولة الدوري الممتاز هذا الموسم.
وقال «أمين» خلال تقديم برنامجه «آخر النهار»، المعروض على فضائية «النهار» مساء اليوم الثلاثاء: «هو انتوا فارق معاكوا أوي الدوري السنة دي؟!».
وأضاف: «أنا عارف إن الأهلي وحش البطولات، وإن الأهلي لو بيلعب دورة رمضانية لازم يكسبها، لكن العقل بيقول إني لو حاربت على الدوري السنة دي اللي هو مش دوري ده فورة، الأهلي عنده تقريبًا ماتش كل 4 ساعات».
وتابع: «أنا مش بهزر، عشان الأهلي يعرف يخلص مباراته المؤجلة لازم يلعب ماتشين كل يوم، وعشان يلعب بالنسق اللي يقدر يفوز به بكل المباريات، اللاعيبة هتجيب زيت رسمي».
وأوضح: «لا تستنوا منها أداء ولا لياقة بدنية أو ذهنية، لا في كأس العالم للأندية ولا في بطولة دوري أبطال إفريقيا الجديدة، مش هتلاقوا لاعبين».
وأكمل أمين: «اقعدوا مع بعض واتفقوا هنعمل إيه؟ إحنا إيه أولويتنا؟ لو الدوري أولوية وهنلعب كل 48 ساعة والكلام ده خلاص، لكن تبقوا عارفين إن اللعيبة دي هتوقع، والمصيبة إن لحظة الوقوع تكون في بطولة محتاجينهم في كامل تركيزهم».
واستطرد: «في رأيي المتواضع لو الأهلي لم يكسب الدوري الممتاز مش فارقة معايا، اللي فارق معايا هي البطولات المهمة السنة الجاية».