«ليه تعملوا في الزمالك كده».. طارق يحيى يفتح النار على مسؤولي الأبيض

فتح طارق يحيى، نجم الزمالك السابق، النار ضد مسؤولي القلعة البيضاء، بسبب الأزمات التي يعيشها فريق الكرة خلال السنوات الماضية.
وقال طارق يحيى خلال حواره ببرنامج «اللعيب»، المذاع عبر فضائية «إم بي سي مصر»: «المقارنة بين الأهلي والزمالك حاليًا ظالمة بسبب تفوق الأهلي في الصفقات وإيقاف القيد للزمالك».
وأضاف: «إحنا اللي عملنا في نفسنا كده، ليه محلتش مشكلة خالد بوطيب، ومشكلة باتشيكو؟ كان يجب على مجلس إدارة نادي الزمالك السابق أن يحل مشكلة بوطيب، قبل رحيله»، مضيفًا: «أنا كزملكاوي، حزين إزاي لاعيب يبقى عندي امشيه وبعد كده أجرى وراه عشان مستحقاته، ليه نحط الزمالك في الموقف ده؟ الزمالك اسم كبير جدًا وجماهيره من المحيط للخليج، بقابل زملكاوية كتير جدًا في الدول العربية والأوروبية بيعيطوا على الحالة اللي بيبقى فيها الزمالك في بعض الأوقات، ليه أنت كمسؤول توصل النادي لهذا الحال؟، في الزمالك أي مجلس جديد بيستلم من المجلس اللي قبله كوارث».
وأكمل: «نفسي أصحى وافوق الاقي الزمالك مفيهوش أي مشاكل خالص سواء مادية أو إيقاف قيد، وقتها سنجد الزمالك بيناضل وبيكافح ويفوز ببطولات على أعلى مستوى، احنا كنا 5 بطولات أفريقيا والأهلي 3 دلوقتي الأهلي 12 وأنا 5».
وواصل: «الزمالك مياخدش بطولة أفريقيا في 22 سنة ليه؟ الزمالك ميستحقش مننا كده، أنا مبروحش استاد القاهرة اتفرج على ماتشات الزمالك بتفرج في البيت (اقعد اكل في بعضي واعمل حاجات غريبة جدًا)، ليه احنا عملنا في الزمالك كدة؟ اللي يشتغل يشتغل للمكان ميشتغلش لنفسه، معظم المسؤولين في الزمالك بيشتغلوا للشو، وكل مجلس إدارة بيسيب للمجلس اللي بعده كوارث والجمهور اللي بيدفع الثمن هو الوحيد اللي بيدفع فلوس من جيبه احنا بناخد فلوس».
وأتم: «ليه بتعملوا في نادي الزمالك كده، أنا لسة طالع من مشكلة ايقاف قيد، ادخل في مشكلة إيقاف قيد جديدة وادفع 2 مليون دولار تاني ليه كده؟ الفلوس دي حرام تتدفع للعيب لعب 3 دقايق، أنا زعلان على اللي بيحصل في نادي الزمالك، وأتمنى أن تنتهي الكبوة سريعًا».
كان نادي الزمالك، تلفى صباح يوم الأربعاء الماضي، خطابًا رسمياً من الاتحاد الدولي لكرة القدم «فيفا»، يفيد بإيقاف النادي عن القيد حتى سداد مستحقات اللاعب المغربي خالد بوطيب المقدرة ب«2.4 مليون يورو».
وكانت القضية بدأ تداولها منذ عام 2020، بعدما قام اللاعب بشكوى النادي أمام الاتحاد الدولي لكرة القدم «فيفا» لفسخ عقده من طرف النادي.