«المصري كيدز».. حدوتة.. حبة سكر

في مملكة النمل بيعيش مجموعة كبيرة جدا من النمل في جنينة بيت جميل، عايش في البيت بنتين حلوين، ملك وهدير، كل يوم بعد ما يخلصوا مسؤوليتهم ينزلوا يلعبوا في الجنينة ويشتروا العصير، وكان النمل يستنى دايما المعاد بتاعهم عشان هما على طول يوقعوا الأكل في الأرض ويسبوا مكانهم مش نضيف، وبعد ما يمشوا من الجنينة يطلع جيش النمل الكبير يقعد يلم في الفتافيت إللى بيخزنها طول الصيف عشان مش بيقدر يطلع من مملكته في الشتا والبرد، كل يوم على الحال دا والنمل يقول ياه هما سايبين بقية أكل كتير!، دا إحنا هنسهر عليه طول الليل ومش هنقدر ننقله كله، صحيح دول مش عارفين قيمة الأكل إللى بيرموه، دا حقيقى دول بنات مستهترين، بس المهم إن إحنا مستفيدين. ردت نملة وقالت بس إحنا بنتعب قوى قوى عشان ننقل حبة سكر واحدة إللى تكفينا أكل كتير وبنقول الحمد لله رب العالمين، إزاى هما يوقعوا كل الأكل الكتير دا؟! أكيد عشان مش بيتعبوا فيه.
وقعدت ملك وهدير يومين في البيت مش ينزلوا الجنينة والنمل بقى مستغرب جدا. اقترحت الملكة نمولة وقالت أكيد بيت البنتين دول مليان خير كتير، دول على طول يوقعوا الأكل في كل مكان، يلا بينا نطلع البيت، وفعلا إتحرك جيش النمل الكبير على البيت، وأول ما دخل لقى الأكل والشرب في كل مكان، فرح النمل جدا جدا وقال الحمد لله، ربنا رزقنا بخير كتير، وبقى النمل موجود في كل مكان في البيت، جت هدير تفتح درج الشكولاتة والحلويات أخدت شيكولاتة معاها على السرير أكلت حتة ورمت بقتها وقالت لا لا أنا عايزه عصير، سمعها النمل جرى قال يا خبر دى وجبة كبيرة ومتينة لينا، يلا بينا على السرير، وهوب قرصت نملة هدير وأختها ملك زعلت لما لقت النمل على البونبونى والعصير، وقالت إنا كان نفسى فيه، هطلب من ماما تجيب غيرهم أكيد، راحت ملك وهدير لمامتهم، قالت هدير النمل قرصنى في وشى وملك قالت وأنا معرفتش أشرب العصير وعايزه غيره، رفضت مامتهم، وقالت دا عشان إحنا مش مقدرين النعمة وبنرمى الأكل في كل مكان، ربنا حب يعلمنا إزاى نحافظ عليه، فكافئ بيه النمل إللى بيستنى حبة سكر عشان تكون أكل ليه.