لكل أم تجد صعوبة في نوم أطفالها، إليكِ حلا سحريًا للأخذ بيد طفلك إلى عالم الأحلام والنوم الهادئ.. «شيماء عبد العال» تقدم مجموعة قصص يومية تساعدك على ذلك: حدوتة النهاردة ... « مودي ولد ذكي» كان يا ماكان كان في زمان ولد اسمه مودي، مودي كان ولد جميل و مؤدب و بيسمع كلام مامته دايما، لانه عارف انها اكتر واحدة بتحبه في الدنيا دي كلها وعشان كدة بتخاف عليه. مامه مودي كانت علي طول تقوله لما نخرج برة البيت لازم تمشي جمبي و متسبيش ايدي لانك ممكن تبعد عني وتتوه وكمان في دلوقتي ناس وحشين بتخطف الاطفال من مامتهم وتجري ويحبسوهم في بيت من غير اكل او شرب، وممكن كمان يطلبوا من اهلهم انهم يدولهم فلوس عشان يرجعولهم ابنهم يا اما يموتوه أو ممكن كمان يلفوا بيه في الشوارع و يشحتوا بيه، عشان كدة يا حبيبي عايزاك تمشي جمبي علي طول ومتبعدش عن عنيا في اي مكان نروحه في الشارع او النادي او حتي السوبر ماركت. ولان مودي ولد مؤدب و بيسمع الكلام كان بيقولها علي طول حاضر يا ماما، وفي يوم من الايام مامته وباباه خرجوا يشتروا حاجات من السوبر ماركت، ومودي بيحب يروح السوبر ماركت اووووي عشان بيجيب لنفسه الشيكولاته اللي هو بيحبها ولما وصلوا المكان واشترت مامته طلبات البيت اللي هي عايزاها، طلب منها مودي يروح ركن الحلويات عشان يجيب الشيكولاته بتاعته، مامته راحت معاه طبعا، ولقي بنوتة واقفه لوحدها وواحدة غريبة بتقرب منها و بتسألها عن مامتها ردت البنت و قالتلها ماما بتجيب طلبات البيت ومشغولة فانا جيت اجيب لنفسي شيكولاته لحد ما ماما تخلص، قالتلها طيب تعالي انا هختارلك نوع شيكولاته طعمه حلو اوووي و هيعجبك وهجيبلك منها كتييرر اوي ونطلع نقعد برة شوية في الهوا عقبال ما مامتك تشتري اللي هي عايزاه. البنت فرحت اووووي و قالتلها بس لازم اقول لماما عشان تدفع تمنها، قالتلها لا انا اللي هدفع دي هدية مني ليكي و يلا بقي بسرعه عشان نخرج برا، البنت قالتلها حاضر يا طنط. كل ده و مودي بيتفرج علي البنت من بعيد، مامته قالتلوا يلا يا مودي انت واقف ليه روح يلا بسرعه هات الشيكولاتة بتاعتك عشان نمشي بقي، مودي قالها اصل يا ماما في حاجه غريبة حصلت مع البنت دي، انا حاسس انها في خطر وحكي لمامته بسرعه اللي حصل، مامته قالتلوا لازم نمنعها بسرعه انها تخرج من هنا معاها و نبلغ امن السوبر ماركت بسرعه و فعلا راح مودي و مامته و طلبوا من البنت تستني لان مامتها بتدور عليها و أول ما سمعت كدة الست الغريبة دي اللي كانت عايزة تخطفها سابت ايديها و حاولت تجري علي البوابة عشان تخرج برا السوبر ماركت، لكن بابا مودي كان بلغ الامن و مسكوها بسرعه قبل ما تخرج و دوروا علي مامه البنت لاقوها واقفة مشغولة ومأخدتش بالها اصلا كل ده ان بنتها بعدت عنها، وكانت فكراها واقفه جمبها زي ما هي قايلالها. مامتها اول ما عرفت اللي حصل و ان بنتها كانت ممكن تتخطف و تضيع منها قعدت تعيط و تحضن بنتها وشكرت مودي الولد الذكي اللي اخد باله من الموقف وعرف يتصرف كويس هو ومامته وباباه وانقذوا البنت و رجعوها لمامتها والامن سلم الست اللي كانت هتخطفها للبوليس عشان تاخد جزائها.