تعليق ناري لشوبير على المطالبات بعرض حسين الشحات للبيع بعد أزمة الشيبي

علق الإعلامي أحمد شوبير بشكل قوي وغاضب على أزمة حسين الشحات الحالية بعد توجيهه صفعة للنجم المغربي محمد الشيبي، لاعب فريق بيراميدز، عقب مباراة الفريقين الأخيرة في الدوري المصري.
وقال أحمد شوبير ساخرًا: «مدريتوش الأهلي قرر يعرض حسين الشحات للبيع بعد المشكلة اللي أخطأ فيها مع محمد الشيبي، طب إزاي بس؟ ده الأهلي خلاص جدد معاه وهيخسر كل الملايين اللي دفعها فيه.. طبعا كل ده كلام فاضي وبهزر بس هو ده اللي بينكتب على السوشيال ميديا في الساعات اللي فاتت».
وتابع أحمد شوبير: «عشان كده أنا بوجه رسالة للإدارات شوف الصح إيه لناديك وإعمله، ومعلش أنا هفتح شوية موضوع عبدالله السعيد ورحيله عن الأهلي عشان أنا كنت شاهد عيان من الألف إلى الياء وهحكي تفاصيل لأول مرة».
وواصل شوبير: «الأهلي إتأخر في التجديد شوية لعبدالله السعيد ونادي الزمالك عرض مبلغا خياليا لم يقدم لأي لاعب في مصر حتى الآن ومفيش لاعب في مصر خد المبلغ ده ولا نصه حتى وأنا هقول لك الرقم أخد في إيده 40 مليون جنيه في شنطة عدا ونقدا حتى مكانش عارف يحطها فين».
وأردف حارس الأهلي السابق: «بعد كده حصلت تدخلات وقعد مع المسؤولين في الأهلي والكلام والقصة والحدودتة وعبدالله السعيد بكى بالدموع وقال خلاص أنا عايز النادي الأهلي، وكانت بنود عقده تمنح الأهلي حق ضمه وبالتالي بات عقده مع الزمالك لاغيا ورجع لهم الفلوس».
وأضاف شوبير: «أنا كنت شايف قعاده في الأهلي مكسب، ولكن ساعتها ثارت السوشيال ميديا وتاني يوم الأهلي عرضه للبيع، وطلع على السعودية وفنلندا ثم عاد لبيراميدز ولكن السوشيال ميديا خلت الأهلي يخسر لاعب مهم لما إدارة الأهلي مشيت وقتها ورا السوشيال ميديا».
واختتم شوبير: «والسنة اللي فاتت برضه الأهلي جري وراه السوشيال ميديا في دوري أبطال أفريقيا وأزمة النهائي وكانت النتيجة خسارة اللقب ثم تعلم الأهلي الدرس هذا الموسم وقدر يحقق البطولة».
وربط شوبير تعليقه بصفقة إمام عاشور موضحًا: «موضوع إمام عاشور برضه سيبك من كل اللي بيتقال في النهاية الأهلي شاف طريقه ومصلحته، وبصوا بقه يا جماعة قصة كل شوية واحد غلط غلطة ندبحه ده مرفوض، ده حتى الدولة نفسها بتعمل اللي عنده سابقة أولى لا توضع في صحيفة السوابق بتاعته».
وأضاف: «أنت المهم شوف مصلحتك إيه وإيه اللي يخدم ناديك بما لا يتنافى مع قيمك ومبادئك ولكن هناك مساحة للمغفرة والرحمة، إنما مش كل حاجة هجيب سيف وأدبح لأ.. الأمور لا تمشى بهذه الطريقة أبدا على الإطلاق».