مجدي عبد الغني: «شوبير عاوز يبين للناس إني ضد الأهلي»

كشف مجدي عبدالغني نجم الأهلي ومنتخب مصر الأسبق، سر صدامه مع أحمد شوبير، حارس مرمى الأهلي الأسبق، وسبب انتقاده لمجلس إدارة القلعة الحمراء برئاسة محمود الخطيب.
وقال مجدي عبدالغني في تصريحات تليفزيونية عبر فضائية «الشمس»: «تقابلت مع شوبير من يومين، أول ما دخل عليا بيقولهم (ده بيهاجم النادي الأهلي)، قولتله لا أنا مش بهاجم النادي الأهلي»، مضيفًا: «شوبير، حبيبي وصاحبي، ولكن هو عاوز يبين للناس إن أنا ضد النادي الأهلي، لا أنا مش ضد الأهلي، أنا ضد الحاجات الغلط إللي أنا شايفها غلط، ولما بقولها بقولها عشان تتصلح ولو اتصلحت مفروض الناس تيجي تقولي متشكرين يا كابتن مجدي، لازم يقولولي كده ويعترفوا إني أول واحد دلتهم على وجود خطأ مش يبعتوا ناس تشتمنى على السوشيال ميديا يقبضوها عشان يشتموني، عيب وميصحش».
وأضاف: «أنا أشادت بتولي ياسين منصور رئاسة شركة الأهلي لأنه راجل مبيحبش الفشل ثم فوجئت بعد ذلك برحيله ويأتي بدلًا منه شخص أخر أنا شايف إن دوره انتهى خلاص ده حقي إن أنا أقول.. إما تجيب شخصية تقارن ياسين منصور، بنفس القوة ونفس النجاح وإن النادي لو احتاج حاجة هيطلعها من جيبه، أنا مبتكلمش على شخص معين، أي حد يجي يمسك مكان ياسين منصور، لازم يفكر 300 مرة قبل ما يمسك مع احترامي لكل الأشخاص دي وجهة نظري».
وأكمل: «أنا وجهة نظري يتفق معايا المئات ويختلف معي الملايين أو يتفق معي الملايين ويختلف معي الالاف، هي الدنيا كده مش كل الناس بتتفق على حاجة أنت حر في رأيك وأنا حر في رأيي، زي ما أنت بتقول مجدي عبدالغني، مبيعرفش يلعب واحد تاني يقول أحسن خط وسط جبته مصر منذ أن بدأت كرة القدم».
واختتم: «الناس في البرتغالي بيقولوا أنا من أحسن 20 أجنبي لاعب في البرتغالي في القرن 20، هو الناس اللي هناك ولاد عمتي ولا ولاد خالتي ولا مديهم فلوس ولا جايب كتايب عشان يرشحوني، الناس قالت باللي شافته، واحد ميقتنعش بهذا الكلام هو حر»، مشيرًا: «الاختلاف في وجهات النظر ليس ضد الكيان ده في الانتخابات تم إطلاق إن النادي الأهلي مخطوف من مجلس إدارة ينتمي للنادي الأهلي، كلهم أعضاء في الجمعية العمومية ولكن تم اتهامهم بخطف النادي وخلصوا على مجلس الإدارة بهذا الاتهام عشان مرشح أخر ينجح، ومجرد ما نجح كلنا وراه عاوزين الصح ولو في غلط بنقول عليه».