ياسمين عز ترد على سخرية متابعة لها: «بصي يا طنط» (فيديو)

ردت الإعلامية ياسمين عز على سخرية متابعة لفقرة سابقة قدمتها في برنامجها عن «لفات الطرح»، إذ قالت المتابعة في تعليق على وسائل التواصل الاجتماعي «إنتي جاية تعلمينا لفات طرح من 2005».
وقالت «عز» خلال برنامجها «كلام الناس» على قناة «إم بي سي مصر»، اليوم الجمعة، ردًا على المتابعة: «بصي يا طنط، أنا في 2005 كنت في المدرسة قاعدة لابسة شرابي أبوكور اللي كنتي بتلبسيهم لبنتك، علشان أنا قد بنتك».
وأضافت: «كنت ساعتها في الفصل وباكل سندوتش الفينو بالجبنة الرومي أو جبنة بالخيار والزيتون، وماسكة زمزمية أونو، ومكنتش أعرف إني هطلع مذيعة أعملك لفة حجاب في 2023، وتيجي تتريقي، 2005 كنت بلبس مريلة، 2005 إيه يا مدام، 2005 كانت أمي لسه بتتعلم تلف الحجاب».
وتابعت «عز»: «بمناسبة فقرة لفات الطرح، أنا هعملكوا النهارده الجيبات الجينز، علشان البنات اللي بيلبسوها واللي حطينها في الرف بقالهم 15 سنة تطلعها وتلبسها وتعمل لها إعادة تدوير، للتوفير، وكمان لأنها رجعت موضة تاني، كنت لسه مسافرة خارج مصر لقيت محل كبير منزل جيب جينز».