«أنت فارد نفسك ليه كده» .. طارق يحيى يفتح النار على فيريرا

فتح طارق يحيى نجم الزمالك السابق، النار ضد البرتغالي جوسفالدو فيريرا، المدير الفني للفريق الأول لكرة القدم بنادي الزمالك.
وذلك بعد خسارة الفريق أمام أسوان، بهدفين مقابل هدف، في المباراة التي أقيمت بينهما أمس الإثنين، على استاد أسوان، ضمن مباريات الجولة الحادية عشرة من بطولة الدوري الممتاز.
وقال طارق يحيى في تصريحات تليفزيونية عبر فضائية «الزمالك»: «ليه بنحب نلعب في الفرقة ونعمل حاجات عشان نبان إننا جهابذه؟ ما نشتغل بالتشكيل الطبيعي، اللي لعبنا به في المباريات الماضية، هو أنا ليه مش بعمل الطبيعي وأخرج بره الصندوق وبعمل حاجات تنغص عليا عيشتي؟ ليه دايمًا بلعب في الفريق؟ احنا بنلعب ب يوسف أسامة نبيه وزيزو وسيف الجزيري، وشيكابالا، بديل يقلب المباراة وبنكسب».
وتابع: «ليه بنمشى ورا أمور بتخلينا وحشين؟ ليه بنلعب في الفرقة؟ عشان يتقال إننا جهابذة.. الزمالك مجاش في الشوط الأول بفعل فاعل، ومحدش يقولي متكلمش ومحدش يقولي متهاجمش، أنا هتكلم لأن اللي حصل مينفعش».
وتابع: «مين يجيب حق الجماهير اللي سافرت إلى أسوان وظلت بعيدة عن بيوتها 48 ساعة، هي الرسالة موصلتش لكم كلاعبين وجهاز الفني، بهدلة الجماهير كان لازم تكون دافع لكم إنكم تاكلوا النجيلة، إحنا ليه دايمًا بنجري ورا سراب».
ووجه طارق يحيى، رسالة إلى فيريرا، قائلًا: «مينفعش تتعامل مع الجهاز المعاون بهذه الدرجة،، أنا بتكلم بجد وومكن دي تكون أخر حلقة ليا»، موضحًا: «أسامة نبيه، وقف على الخط في الضربة حرة الغير مباشر التي جاء منها هدف الزمالك، لتوجيه اللاعبين، فيريرا، طالبه بالجلوس وقاله (متتكلمش)».
وتابع: «أنت فارد نفسك ليه كده! أنا محدش يلومني على اللي بقوله، أنا لما اتكلم كله يسكت احنا تعبنا وشقينا في النادي ده وجبنا بطولات، محدش يقولي متتكلمش، لأ هتكلم احنا هنفضل ساكتين لحد إمتى».
وزاد: «احنا كنا ماشين بشكل جيد السنة اللي فاتت، إيه إللي حصلك في دماغك، المستحقات بتاخدها أنت واللاعيبة، ومفيش حد مأخر عنك حاجة، مينفعش اللي بيحصل نادي الزمالك، يدخل فيه 3 أهداف من كرات ثابتة في مباراتين ليه! أنت لو بتلاعب ريال مدريد، مش هيدخل مرماك كرات ثابتة بهذا الشكل».
وواصل: «اللاعيبة اعترضت واتكلموا معاك في المحاضرة وقالوا وقفتنا غلط، وإنت مسمعتش الكلام وكانت النتيجة إن احنا شربنا 3 أهداف في مباراتين.. هو فيه إيه هو كن فيكون، الجمهور ذنبه إيه».
وأردف: «محدش يزعل مني أنت عندي مش هتبقى أغلى من الزمالك، لو اللي بيتعمل ده من جهاز فني مصري مش هيقعد 24 ساعة في الزمالك».
واختتم طارق يحيى، تصريحاته قائلًا: «مفيش حد يقولي ده بيجيب بطولات، لأ جروس كان بيجيب بطولات ومشي، والبطولات في الزمالك عادي.. مفيش خط أحمر بعد الخسارة أمام أسوان، ومن حق مرتضى منصور، التدخل في هذه الأمور، مفيش طبطبة والزمالك أهم من أي حد».