«ندى».. خطفها عمها لابتزاز والدها بعد تزويره شهادة وفاته

لا تفارقها صورة ابنتها، صاحبة ال10 سنوات، ولا تكف عن البكاء، ولو للحظة واحدة، تتذكر غيابها عنها منذ نحو العام، وتحلم بضمها إلى أحضانها من جديد.
ذات يوم، كانت حنان سليمان، التي تعمل مُدرسة، تجلس في منزلها بمركز طوخ بالقليوبية، وفوجئت باتصال شقيق طليقها بها، يقول لها: «عاوزين نشوف البنت، وأخويا قالِّى: أعدّى عليكم اخدها»، ووفق كلامها، «نزلت له ب(ندى) تحت البيت، ولم أتخيل السيناريو الدرامى اللى حصل، كانت الصدمة انهم أخدوها على أساس إنها تقعد معاهم يومين، ومن ساعتها ماشفتهاش، ولا سمعت صوتها».
امضي على إيصالات أمانة
تتساقط الدموع من عين «حنان»، وهى تحكى: «اتصلت بطليقى، قالِّى: أنا ما أخدتش بنتى منك، وماعرفش هي راحت فين.. دوّرى عليها بمعرفتك، ومنذ ذلك الحين وأنا بدوّر عليها، لحد ما كلمت طليقى مرة تانية، وألقى في وجهى بالكارثة: لو عايزاها ممكن تمضى على إيصالات أمانة، رحت على طول على القسم، وحررت محضر ضد طليقى وأخوه بخطفهم بنتى وتعريض حياتها للخطر».
مأساة الصغيرة، وفق والدتها، أن هناك خلافات قديمة بين أبيها وعمها: «طليقى كان مزوّر شهادة وفاة لأخوه علشان يستولى على الميراث بتاعه، وأخوه كان عايش في هولندا، ولما رجع بقى بدون عمل، وهو اللى كان بيصرف عليه لحد دلوقتى لأنه يبتزه بأنه زوّر أوراقًا رسمية، وصدر عليه حكم قضائى، وبنتى هتدفع تمن مشكلتهم، وفى مصيبة انهم عاوزين يجوزوها في السن الصغيرة دى لاغتصاب طفولتها».
عاوزة المتهمين يتقبض عليهم
الأم حزينة ومكلومة، وتتابع في حسرة: «مستعدة أتنازل عن جميع حقوقى مقابل عودة ابنتى إلى أحضانى مرة تانية لأنهم حرموها من التعليم، والمحامى الخاص بطليقى بيقول لى: الولاية التعليمية مع الأب، وهو حر يعلمها أو لأ»، مناشدةً المستشار حمادة الصاوى، النائب العام: «عاوزة المتهمين يتقبض عليهم لإنقاذ بنتى، وطليقى كان عليه حكم قضائى- لم يُنفذ- لأنه زوّر شهادة وفاة لأخوه».
أهالى المنطقة أشاروا إلى سوء سلوك الأب وشقيقه، وأبدوا تعاطفًا مع أم الطفلة، وكشفت مصادر أمنية أن مباحث تنفيذ الأحكام لم تعثر على والد وعم الطفلة للقبض عليهما، ويجرى تكثيف التحريات بشأن الواقعة.