خالد الغندور لجمهور الزمالك: «بتشجع بضهرك ليه؟.. وإيه الهدف من قلع التيشيرت»

وجه الإعلامي خالد الغندور، رسائل إلى جمهور نادي الزمالك، الذي يحضر مباريات الفريق الأول لكرة القدم من المدرجات.
وقال خالد الغندور في تصريحات تليفزيونية: «أنا مش مع ولا ضد كلام مرتضى منصور، ولا ضد الجمهور اللي بيحضر المباريات، وقناة الزمالك هي داعمة لرئيس النادي والجمهور، وإحنا كلنا مع بعض محدش يدخل ما بينا إحنا بنحب الزمالك وعاوزين مصلحته، بس في رئيس مجلس إدارة مسؤول وعارف حاجات أنتوا متعرفوهاش، وعارف الجمهور هيرجع إزاي».
وتساءل خالد الغندور: «إيه الهدف من الذهاب للاستاد وأنا بشجع أدي ضهري للمباراة يعني مثلا هل ينفع أكلمكم وأنا مديكم ضهري؟ هل أقدر أتواصل معاكم ويكون في إحساس وتفاعل، إلا لما تكون شايفني وأنا حاسس إني شايفكم».
وأضاف: «أنا لو بره وبسمع المباراة في راديو العربية ببقى عاوز أروح بسرعة عشان ألحق أشوف الماتش، أنت رايح تشجع عشان تشوف الماتش وتتأثر بالماتش وتتفاعل معاه».
وواصل: «سؤالي للجمهور، أنت جبت منين فكرة إنك تروح الملعب وتشجع بضهرك من غير ما تشوف الماتش، أنا فاكر ميمي عبدالرزاق، قال على جمهور أحد الأندية ده بيشجع بضهره وميمي عبدالرازق، أصبح تريند عند جمهور الزمالك».
وأكمل: «إيه الهدف من قلع التيشيرت، الفنان محمد رمضان، لما بيطلع يغني على المسرح وهو قالع الناس انتقدته»، «، مضيفًا: «أنا كمشجع بقلع وبدي ضهري للمدرج ليه؟ هل أنت تقدر متشوفش الماتش؟ مش أنت بتحب الفرقة، ازاي تبقى سامع صوت الجمهور في هجمة خطيرة علينا أو نسجل هدف متكنش شايفه».
يجب على الجمهور الذي يتواجد في المدرجات أن يستمتع بالمباراة ويدعم فريقه ويشجعه طوال المباراة.. المستشار مرتضى منصور مش ضدك.