بين صفوف المشجعين الزملكاوية، لفت الأنظار مشجع كفيف، بيهلل بكل حماس لناديه، ورغم سنه الصغير، إلا إنه بيساند النادي بكل عزم، الطفل "محمد حسين"، راح ماتش الزمالك والجيش، وكانت أول مباراة يحضرها في الإستاد، بعد ما قطع الطريق من بلده إسنا في الإقصر لحد ستاد بتروسبورت، عشان يحتفل بأول دوري للزمالك في عمر الطفل الزملكاوي، "مصراوي" يحاول معرفة تفاصيل المشجع الصغير.. بعد ما صارت صورته حديث مواقع التواصل الاجتماعي. محمد.. عرفنا بنفسك؟ اسمي محمد حسين عبده، وعندي 14 سنة، ومن محافظة الأقصر في مركز إسنا، وطالب في الصف الثاني الإعدادي في مدرسة أسوان للمكفوفين. امتى بدأت تشجع نادي الزمالك؟ من وأنا عندي 9 سنين، يعني من حوالي خمس سنين. ليه مخترتش تشجع الاهلي؟ ليه الزمالك؟ الواحد حَب الزمالك من قلبه، ومن صغري وأنا بشجع النادي. إيه رأيك في النادي الأهلي؟ مكنتش بحب اسمع اسمه، لكن هو فريق من ضمن الفرق الكبيرة في مصر. لو ممكن تشرحلنا ازاى أصبحت كفيف؟ كنت في جامع وانا صغير، واتخبطت في خشبة عليها المصحف، واسمع إن حصلتلي مشكلة ومش قدرت اشوف بعدها. هل فيه حد في عيلتك زملكاوي؟ أخويا الكبير زملكاوي، ووالدي أهلاوي، لكن بينا روح الاختلاف عادي، وأمي ملهاش في الكورة. هل فعلا بتسمع المبارايات من الراديو؟ أيوة.. بسمع كل الماتشات، ومفيش مباراة للزمالك بفوتها، وبسمع على إذاعة الشباب والرياضة أو على استاد النيل. بتسمع الماتش لوحدك ولا مع اصحابك؟ ساعات وساعات.. لو ماتش سهل للزمالك ممكن اسمعه لوحدي، لكن لو ماتش مهم احب اسمعه مع اصحابي أو على القهوة. فيه معلق معين بتحب تسمع منه المباراة؟ معلق اسمه أيمن الكاشف. وإيه رأيك في مباراة الزمالك والجيش؟ دي كانت أول مرة أحضر مباراة للزمالك في الاستاد في حياتي. وإيه الفرق بين الماتش في الراديو والاستاد؟ اتبسطت في الاستاد، لكن للأسف مسمعتش إلا صوت المشجعين حواليا، عشان مفيش معلق، لإن المعلق هو عيني اللي بشوف بيها الماتش. وإيه إحساسك لما الزمالك حصل على الدوري؟ فرحت جدا جدا، حسيت إنه إنجاز كبير، وكنت واثق من بداية الدوري بفوز الزمالك للمرة ال12 في تاريخه. شاهد اعظم لقطه للطفل الكفيف لحظه هدف الزمالك ,, ودموع مذيع النيل للرياضه بتحلم بإيه للنادي؟ نفسي نرجع تاني فريق البطولات. هل حد من أصحابك قالك إزاي تشجع نادي خسران؟ لا خالص .. بيشجعوني على طول، لإن كل إصحابي زملكاوية، واحد بس منهم أهلاوي، وفيه بينا روح المنافسة. إيه أكتر لعيب بتحس لما تسمع المباراة أنه قريب من قلبك؟ باسم مرسي، ونفسي يكون هداف الدوري السنة دي ويجيب هاتريك. تقول إيه للنادي بعد الفوز؟ ده تعبهم ومجلس الإدارة عامل طفرة كبيرة للفوز بالدوري. زعلت لما الزمالك اتغلب من الأهلي؟ جدا.. وبكيت، ووقتها صحفي صورني وانتشرت الصورة واتعرفت من الصورة دي، ومنها تمت دعوتي من عضو مجلس الإدارة لحضور مباراة الزمالك والجيش، لكن كنت حزين، خصوصا بعد هدف مؤمن زكريا. هل فعلا جمهور الزمالك مش حاسس بالنجاح لإنه مغلبش الأهلي؟ لا طبعا.. الكورة حظوظ، وكلهم فرق كبيرة، زي أي بلد لما فريق يكسب الكل بيحتفل. إيه رأيك في الجدل الكبير بين الأهلاوية والزملكوية دلوقتي؟ اعتقد إن الخلاف كبير لإن فيه خلاف بين رئيس كل نادي، مرتضى منصور ومحمود طاهر، ويمكن لو مفيش الخلاف ده، مش هيبقى فيه جدل كبير بين الجمهور. وإيه نفسك يتغير في نادي الزمالك؟ الأنانية في بعض اللعيبة. ونفسك في إيه لنادي الزمالك بعد حصوله على الدوري؟ نفسي يكسب الاهلي في الكونفدرالية. مواضيع متعلقة: مشجع زملكاوي "كُف بصره".. حَبه من غير ما يشوفه (صورة)
