صالح جمعة: الزمالك فاوضني.. وأتمنى العودة إلى الأهلي

أكد صالح جمعة، صانع ألعاب الفريق الأول لكرة القدم بالنادي الأهلي السابق وسيراميكا كليوباترا الحالي، أن الزمالك دخل في مفاوضات معه عن طريق شقيقه عبدالله جمعة، ظهير أيسر القلعة البيضاء، وكذلك بعض الوكلاء.
وقال صالح جمعة في تصريحاته عبر برنامج «الريمونتادا»، المذاع على قناة «المحور»: «سيراميكا نادي محترم جدًا، والإدارة محترمة والناس بتعاملنا بشكل ممتاز وأحمد سامي على المستوى الشخصي يتعامل معنا بشكل رائع وبيحل مشاكل اللاعيبة» .
وأضاف: «أحسن 5 سنين ونص في الملاعب بالنسبة لي لما كنت في النادي الأهلي، وكان في مدربين في الأهلي علاقتي بيهم كويسة جدا، وفي مدربين اتعاملوا معايا بشكل مختلف وطلعوا أحسن حاجة في صالح، وفي مدربين العكس عشان كدة مكانش في بينا تفاهم»
وواصل: «لحد انهاردة بتابع النادي الأهلي وأمنيتي لحد انهاردة إني أرجع النادي الأهلي، العلاقة فعلا كانت متوترة بيني وبين فايلر فوجئت من ساعة قدومه حتى في التقسيمات بيخرجني، وسيد عبدالحفيظ اتكلم معاه وقاله قرب من صالح وكان أسلوبه معايا صعب شوية، وفضلت 6 شهور في الجيم تحت قيادته، والناس في الأهلي وقفت جنبي وكان ليا فلوس وسبتها ولما اتكلمت مع سيد عبدالحفيظ قولتله أنا عايز أمشي خالص وقالي اللي انت عايزه احنا هنعملهولك».
وعن أفضل لاعب في مصر حاليا: «أحمد سيد زيزو معجب جدا بأدائه صراحة».
وعن مفاوضات الزمالك معه، قال:«في كلام مع الزمالك عن طريق عبدالله جمعة أخويا وعن طريق وكلاء بيتكلموا مع الزمالك لكن أنا فاضلي سنتين في سيراميكا بعمل اللي عليا ومنتظر نهاية الموسم أشوف الدنيا فيها ايه، وهوافق طبعا لو جالي عرض رسمي من الزمالك، فهو نادي كبير وجماهيرية كبيرة وإدارة كبيرة الزمالك شرف لأي حد».