المصري كيدز: «حدوتة».. القط الصغير

القط مشمش صغير وجميل، لونه أبيض وعنيه حلوين، شقى ويحب يجرى ويلعب في كل مكان، الكل بيحبه ويحب يلعب معاه. كان ليه أصحاب كتير ودايما في وسطهم يكون زعيم، وكل القطط التانيه تسمع كلامه من غير تفكير. مشمش يقول نلعب بالكورة يقولوا موافقين، طب نجرى شويه يقولوا مش معترضين، وعشان مشمش قط دمه خفيف كانوا فعلا بيحبوه، وهو كمان بيحبهم، وكانوا حقيقى منسجمين لحد ما ف يوم مشمش حس إنه قط غير باقى أصحابه واستغرب هما ليه بيسمعوا كلامه.. وقعد يفكر وقال أكيد عشان أنا قط جامد وخطير.
وبدأ مشمش كل ما يعمل حاجه يقول لأصحابه بصوا أنا جامد ازاى، أنا بعمل حركات جامدة ومحدش يعرف يعملها زيى.. ومرة تانية كان في مشكلة بين قطين صلح بينهم وخلاهم متفقين، وقال يا سلام عليك يا مشمش إنت مفيش منك اتنين.. وفضل مشمش كدا فرحان بكل حاجة بيعملها ويقعد يقول عليها ولازم يخلى الكل يشوفها ويقول انا جامد انا فظيع.. لحد ما ف يوم قط صاحبهم كان بيجمعهم عشان يلعبوا ومشمش مكنش موجود ولعبوا وانبسطوا ولما جه مشمش لقاهم مبسوطين قالهم اللعبة دى وحشه لعبتى أحلى منها ردت القطة بوسى وقالت لا دى لعبة جديدة، بتاعتك زهقنا منها.. قالها ازاى مفيش أحلى من لعبتى.. وزعل مشمش ومشى وهو حزين وقال هو أنا كدا مبقتش القط الجامد إللى بيحبوه، أنا لازم أخليهم يعرفوا إنى أحسن وأحلى قط فيهم كلهم.. وبدأ يتغير ومعاملته تتغير مع أصحابه وبقى مركز بس إنه يكون أحلى قط فيهم.. ودا خلاهم يزعلوا منه كتير، وكمان ليهم مبقاش زعيم.. زعل جدا جدا مشمش منهم وقالهم أنا كنت باحبكم وباحب ألعب معاكم، ردت بوسى وقالت يا مشمش احنا بنحبك كمان وبنحب نلعب معاك بس انت بقيت غريب، كل حاجه تقول انا جامد وانا خطير ودا غرور وتكبر، احنا منقبلوش، وكمان منحبش إنه يكون فيك، عايزينك زى زمان لما كنا كلنا بنجرى عليك عشان نلعب معاك، ساعتها كنت فعلا زعيم من غير ما تقول أنا جامد ولا أحلى منى مفيش، قال لها عندك حق يا بوسى أنا فرحت انكم كلكم بتحبونى، وكنت بالغرور والتكبر هاخسر كتير.