أمين الشرطة بقضية «طفل المرور»: «قاللى مش عارف أنا ابن مين؟.. ممكن نكسحك.. وبابا شغال فى مكتب وزير»

قال محمد فوزى، أمين الشرطة المجنى عليه فى واقعة طفل المرور، إنه فوجئ بالطفل المتهم أحمد أبوالمجد يقود سيارة سوداء برفقة 4 من أصدقائه، وعندما طلب منه رخصة السيارة أخبره بأنه لا يحمل رخصتى القيادة والتسيير وتحدث معه بأسلوب غير لائق.
وتابع المجنى عليه أن الطفل وباقى أصدقائه قاموا بسبه وقذفه وهددوه بالضرب قائلين له: «إحنا ممكن نضربك ونكسحك ونقعدك جنب أمك لولا إنك راجل كبير».
وإلى نص التحقيقات:
س - ما طبيعة عملك واختصاصك الوظيفى؟
ج - اسمى محمد فوزى جاد الله محمود، أعمل أمين شرطة ثالث بالإدارة العامة لمرور القاهرة قسم البساتين، مقيم بقرية محلة أحمد مركز كوم حمادة البحيرة، واختص بتنظيم الحركة المرورية بدائرة القسم وتحرير المخالفات المرورية لقائدى المركبات باختلاف أنواعها منذ 10 سنوات.
س - ما هى تفصيلات ما حدث ومعلوماتك بشأن الواقعة محل التحقيقات؟
ج - «اللى حصل إن أنا كنت معين خدمة مرورية فى ميدان بيتشو بزهراء المعادى، وكان ذلك بتاريخ 26 أكتوبر الماضى، والخدمة بتاعتى بتبتدى من الساعة 6 صباحا حتى الساعة 4 عصرا، وفى نفس اليوم حوالى الساعة الثانية ظهرا لقيت بعض المواطنين مستقلى المركبات بيخبرونى بأن فيه عربية مرسيدس لونها اسود سايقها عيل صغير وبيسوقها بطريقة متهورة وبيعمل غرز فى الشارع وأنا واقف فى الخدمة لقيت العربية جاية عليا فوقفتها ولقيت فعلا عيل صغير سايقها ومعاه 4 عيال من سِنّه راكبين العربية، فسألت الطفل قائد العربية وقولته فين الرخص، قاللى مش معايا رخص والعربية دى هيئة قضائية بتاعة بابا وبابا شغال فى مكتب وزير،وأنا لاحظت إن زجاج العربية ملون «فاميه» فاصريت على إنه يطلع لى رخص العربية وهو كان بيقولى مش معاه وبيتكلم بأسلوب مش كويس ولقيته بيقولى إنت مش عارف بتكلم مين وإنت مش عارف أنا ابن مين، وبعدين لقيت أصحابه اللى راكبين العربية قعدوا يوجهوا ليا كلام ويقولولى: إحنا ممكن نضربك ونكسحك ونقعدك جنب أمك لولا إنك راجل كبير، فوجهت سؤالى للطفل اللى سايق العربية وقولته أنا عايز الرخص، فقالى مش معايا، ولقيته بيسألنى: فين كمامتك؟ فقولتله مش معايا، فقالى ابعد وشك بعيد عنى وإبعد إيدك عن العربية، وبعدها أنا اتحركت كام خطوة لمقدمة العربية علشان آخد أرقام اللوحة الأمامية وأحرر مخالفة مرورية باللى حصل.. ومرة واحدة لقيته بيتحرك بالعربية وهوشنى فخلانى أقع على الأض على ضهرى ورجلى اليمين جت على الباب الخاص بقائد السيارة وبعدين شوفته وهو باصص ناحيتى وبيشتمنى ويقولى (غور كده...) وبعدها قمت على طول ولقيته كمل مشى بالعربية وقدرت آخد رقم العربية من اللوحة الخلفية وحررت مخالفة للعربية (زجاج ملون وقيادة بدون رخصة قيادة ورخصة تسيير وعدم اتباع تعليمات رجل المرور)، وفضلت واقف فى مكان خدمتى وبعد الواقعة دى بحوالى نص ساعة لقيت الطفل سواق العربية المرسيدس وصحابه اللى كانوا معاه جايين على رجليهم من غير العربية، واحد منهم ماسك تليفونه وعمال يصورنى وكلهم عمالين يهددونى ويستفزونى ويقولولى إحنا مش هنوقفك هنا تانى وهنقعدك جنب أمك، وممكن نضربك.. وبعدها خدوا بعضهم ومشيوا وأنا معملتش ليهم حاجة.. وبعدها بنص ساعة تقريبا جالى الطفل سواق العربية المرسيدس ومعاه أصحابه وكانوا ساعتها راكبين العربية،ولقيت الطفل وهو قاعد خلف الدريكسيون بيعتذرلى ويقولى (أنا آسف يا عمو وحقك عليا) وأنا قولتله (خلاص حصل خير).. وبعدها الطفل خد بعضه وصحابه ومشى وهو ده كل اللى حصل».
س - ما هى بيانات مستقلى السيارة وعددهم؟
ج - كانوا 5 (واحد سايق العربية وواحد قاعد جنبه و3 قاعدين فى الكنبة الخلفية وراهم) وأنا معرفش أسماءهم، بس كلهم فى سن حوالى 14 سنة تقريبا.
س - ما الذى قررته لقائد السيارة؟
ج - أنا سألت الطفل سواق العربية وطلبت منه إظهار رخصة قيادته ورخصة تسيير العربية، مع العلم إنى كنت متأكد إنه مش معاه رخصة قيادة لأنه دون السن.
س - وبماذا أجابك قائد السيارة؟
ج - أنا لقيته بيكلمنى بأسلوب مش كويس وفيه تعالى، ويقوللى العربية دى هيئة قضائية وبتاعة باباه وقاللى إن باباه شغال فى مكتب وزير العدل.
س- ما الذى قرره لك قائد السيارة آنذاك؟
ج- قاللى إنت مش عارف بتكلم مين وأنا ابن مين، ولقيت صحابه اللى قاعدين معاه فى العربية قعدوا يوجهولى الكلام ويقولولى «إحنا ممكن نضربك ونكسحك ونقعدك جنب أمك لولا إنك راجل كبير».
س- هل حررت ثمة محضر أو مذكرة بشأن الأفعال التى أتاها المتهم ورفقاؤه؟
ج- لا معملتش أى محضر أو مذكرة إلا المخالفة المرورية اللى أنا قمت بتحريرها، علشان الواقعة فى الآخر مشادة كلامية، وممكن تحصل فى كل مكان، وبعدين رجعلى واعتذرلى.
.. وقامت النيابة العامة بعرض مقطع الفيديو الخاص بالواقعة وسألت النيابة المجنى عليه:
س- ما صلتك بالمقطع المعروض عليك؟ وما قصد المتهم ورفقائه من ارتكاب الواقعة؟
ج - ده المقطع الخاص بالواقعة بتاعة الطفل اللى تعدى عليا واللى كان سايق العربية.. وقصدهم التعدى عليا بالسب والشتم والسخرية منى وتصويرى دون موافقتى واستفزازى للوقوع فى الغلط.