عالم تانى

■ طب إيه بقى؟؟.. نلجأ للمحاكم لما نختلف ونرفع قضايا وللا نمشيها مجالس عرب؟؟.. لما دول يقعوا فى دول ودوكهما يقعوا فى دولهما.. نروح إحنا فين بقى؟.. الواحد ما بقاش فاهم حاجة.. فيه ناس محبوسة فى السجون الاحتياطى منتظرة أحكام أو إخلاء سبيل.. ندخل عليهم نقوللهم إيه؟.. المحامون وقعوا مع القضاء؟؟.. وتم منع المحامين من دخول المحاكم على حد قول الأستاذ بهاء الدين أبوشقة؟؟
استنى شوية يابنى أما نصالح الجماعة.. ما جراش حاجة يعنى أما تكوعلك شهرين تلاتة ستة فى التخشيبة وللا السجن؟؟.. هو إنت قاعد فى جونتانامو؟.. أقعدلك شوية آديك منورنا مع الإخوة الزملاء المجرمين؟؟.. حلبة حصى هنا يا بنى للشقيق المحتجز.. معلش يا حاجة.. ولا يهمك كله خير.. ما كلنا عندنا القلب والسكر والضغط يا حاجة.. جت عليكى يعنى؟؟.. طب وماله؟؟..
السجن للرجالة.. إحمدى ربك ده لو ماكانش ابنك اترمى الرمية السودة دى ما كانش حايتقال عليه راجل.. قدّر ولطف.. كان زمانه بيتقال عليه الشر بره وبعيد كلام قباحة.. ما كلهم بيقولوا بُرءة.. هو انتى فاكرة فيه حد جوه بيقول على نفسه مذنب؟؟.. معلش معلش.. كلم الإسعاف يابنى ييجوا يشيلوا الست دى من هنا.. لسه فيه طابور وراها.
■ يعنى إيه؟؟.. أروح المحكمة الصبح عشان عندى قضية رافعاها على أمل آخد حقى ما ألاقيش؟؟.. المحكمة قافلة النهاردة؟؟.. فيه كده؟.. والمحامين لما يضربوا عن العمل بيعاقبوا المواطن ليه؟؟.. هو ماله بالليلة دى؟
■ أعود إلى الوراء قليلا.. فى غضبات مماثلة هدد الأطباء بالإضراب العام.. والصيادلة.. والعمال.. والمدرسين.. وربنا ستر.. ولكن هل زالت أسباب الغضب لدى كل فئة؟؟.. لا أعتقد.. يعنى القنبلة الموقوتة ما زالت تتكتك.
■ يا نهار أزرق.. ماذا لو قرر كل هؤلاء الإضراب فى يوم واحد؟؟؟.. نعمل إيه إحنا؟؟.. وما هى الضمانات التى تؤمن عدم حدوث هذا؟؟.. الواحد عاوز يهرب من كل الواقع المؤلم ده بكل تفاصيله.. التفاصيل اليومية أصبحت خانقة إلى درجة لا تحتمل.. الواحد يروح فين؟؟.. طب بره لما بيطهقوا كده بيعملوا إيه؟
■ هناك.. فى العالم المتقدم المتطور الحر.. شعرت مجموعة من الشباب أن المجتمع عنده كبت.. مضغوط ومخنوق وكاره الواقع وعاجز عن تغييره.. لديه أحلام لا يستطيع أن يعبر عنها.. ففكروا فى فكرة عجيبة غريبة.. وهى أن يخلقوا عالما متخيلا على النت يدعون إليه الناس ليتحرروا من قيود المجتمع ومشاكله ويمارسوا فيه إنسانيتهم المفتقدة.. وأحلامهم المجهضة.. ويمكن حتى خيالاتهم المريضة.. المهم يخلعوا من العالم ده.. ولو للحظات.
■ صمموا عالما آخر.. بكل ما تحمله كلمة عالم من معنى.. يعنى بلاد وبيوت وشوارع وشواطئ وفلل وسيارات ومراكب وأسواق وملابس وأكل وشرب وطيران ومصانع وحدود.. كل شىء.. عالم متكامل من كله.. بما فيه حضرتك الكباريهات والنايت كلوبز ونوادى العراة واللاذى منه.
■ يدعونك لتدخل إلى هذا العالم باسم وهمى تصممه لنفسك.. لست مطالبا بإظهار شخصيتك الحقيقية.. وفور أن تدخل إليه تقرر أن تختار شكلك.. كيف تريد أن تبدو.. طبعا ماحدش بينقى شكله الحقيقى.. وهذه أول فرصة لتتخلص من أحد قيودك وهو شكلك إذا كان مش عاجبك.. فإن كان لديك كرش تنسفه.. ومن حقك تقبب عضلاتك وتنفش صدرك وتزرع شعر وتزرق عينيك وتشيل الوحمة اللى على أرنبة مناخيرك..
أما الستات فيا عينى بقى.. القوام بيتشد فى لحظة والهرهرة بترد مكانها والوسط بيترسم كمانجة والصدر بيرجع يلم على شكل برتقالة بعد ما كان بطيخة شليان وهكذا.. ثم تذهب لقسم الملابس لتجد سوق تجارى به أغلى الماركات وأجملها.. فتنتقى اللى يعجبك.. وتلبس اللى عمرك ما كنت تحلم تلبسه فى الحياة.. ثم تبدأ رحلتك فى حياتك الأخرى.. فتنتقى البيت والموقع والشاليه والسيارة والمركب.. ويمكن توجهك الفكرى والسياسى والعقائدى.. قصره تعمل كل اللى بتحلم بيه.. أنت الآن حر.. بمعنى كلمة حر.
■ فى هذا العالم تمارس كل ما لا تستطيع أن تمارسه فى الحياة.. كل التفاصيل.. بمنتهى الحرية.. بس فى ظل قوانين تنظم هذه الحياة.. فأنت لا تستطيع أن تهرس مواطنا يمشى فى الشارع وتجرى.. ولا أن تتعدى على مواطن بالسب ولا تلقح عليه بلاك.. ولا تشرشحله فى الجرايد مستخدما سلطتك.. ولا تبتزه.. ولا تغتصبه أو تغتصبها.. ولا تقول لحد إنت مش عارف أنا مين؟؟.. ومافيش رشوة ولا استغلال نفوذ ولا بلطجة سياسية ولا عصبية وعنصرية وإضرابات.. يعنى قُصره برضه.. لا تحمل معك إلى هذا العالم السخافات التى أصبحنا نتفنن فى ابتكارها وتكرارها لحد ما أصبحت قانونا.
■ لكنك فى نفس الوقت حر.. عايز تبقى صايع ومنحل.. اتفضل.. عايز تبقى بليونير باليورو.. أهلا وسهلا.. عايز تعمل فيها رئيس جمهورية وتنافس البرادعى.. شيل.. يمكنك أن تذهب إلى البنك وتفتح حسابا.. وتختار لنفسك مهنة وتمارسها.. وتشترى وتبيع.. وتذهب إلى السينما لتشاهد فيلما حقيقيا.. وتصاحب بنات وتغنى وترقص وتمرح على قد ما المرح يستحمل.. وكمان تستثمر.
■ تستثمر دى بقى فيها كلام.. مش بالهبل كده.. لأ استثمار حقيقى.. ماهما ناس بتفهم برضه وبيعملوا فلوس.. مش حايفكوا إحباطاتك ببلاش كده.. أنت تستثمر ببطاقات الائتمان.. يعنى عايز تشترى أرض.. تدفع.. مثلا المتر سعره فى العالم ده ألف جنيه تشتريه أنت فى الواقع بقرش صاغ.. مثلا يعنى.. وفى داخل هذا العالم تقابل بشرا مثلك بالضبط.. ناس متنكرة وهربانة من نفسها ومن دنيتها.. الناس اللى جوه بجد زيك.. لذلك عندما تعقد صفقة.. اعلم أنك تعقدها مع شخص بجد بيفكر زيك.. يعنى أنت لا تتعامل مع شخوص لعبة ينفذون أوامرك وخلاص.. هم بشر حقيقيون.. يفكرون مثلك ويبيعونك ويشترون منك.. والأموال التى تتبادلونها تترجم فى الواقع.. هناك تعيش عالما خاليا من كل القهر والضغوط.. الحقيقة أننى دخلته ولكنى طلعت جرى.. خُفت من حاجة واحدة.. إنى أدخل ما اعرفش أطلع.
السؤال الآن: هل عندك أى فكرة لو اقتحم المصريون هذا العالم.. حايعملوا إيه؟؟؟؟ أراك تبتسم ثم تغرق فى الضحك مرددا فى سرك.. يا خرااااااااابى.
zahqanin@gmail.com