التقويم الجديد

يوم ما جالها الخبر ماعرفش ضحكت و لا بكت
بس اللي أعرفه
و اللي أنا متأكد منه
إنها لا صرخت... و لا إشتكت
و لا قالت إشمعنى
ده أنا ماعنديش غيره
أصلها كانت فاهمة معنى
يعني إيه إبنها مات علشان فدى غيره
يا أم البطل يا أم الشهيد
يا أم اللي فتح باب الأمل من جديد
يا أم اللي حررنا من بعد ما كنا عبيد
من النهاردة... كلنا أولادك
دم الشهيد إنكتب به أطول رسالة
رسالة من كلمة واحدة... إستحالة
رسالة من معنى واحد... العدالة
يا أم الشهيد من النهاردة إفرحي بحلاوة بلادك
بلد كأنها لسة يا دوب مولودة
و نور الشمس أول مرة يدغدغ وشها المكشوف
أهلها حبات لولي معقودة
على ورق شجر مُدهب... من الجنة مقطوف
يا أم الشهيد بلدنا كانت من زمن مخطوفة
ما بين حَوَش و نَور و عصابة على الجاه ملهوفة
دلوقتي و بعد ما رجعت لينا زي العروس البِكر
هأقولك هنعمل إيه علشان نخَطي الفقر
شوارعها هترجع تاني و لا المرايات
من غير مساعدة من حد هنردم على اللي فات
معتش في تاني مِطاطية
و لا فلوس من تحت لتحت مستغطية
إنتهى عصر متعرفش إنت بتكلم مين
من هنا و رايح... كلنا بني آدمين
كلنا في حجم بعض... الوزير زي الغفير
الإتنين هنلاقيهم واقفين في طابور العيش
و في آخر الشهر مرتبهم الإتنين مش هيطير
مش زي الأول
كنا نلاقي واحد فطاره كافيار... و التاني فطاره مفيش
من النهاردة بعون الله بدأنا تقويم جديد
لا هجري و لا قبطي و لا ميلادي
تقويم نحتناه بإيدينا على جمر الحديد
أيامه عزيزة و وقته دهب غالي
مش هنفضل نقول هنبني و هنعمل و نسوّي
أفعالنا هتكون هي الكلام، صوتنا عالي و مدوّي
يا أم الشهيد لا تخافي على الدم اللي راح
إوعي تفتكري إننا نسينا مطالبنا
بعد أي ثورة لازم تلاقي في بعض النُباح
من ناس غاوية تكسر مجادفنا
بس العزيمة و الإصرار لسة جوانا عايشين
إتزرعوا يوم ما كنا في الميدان بايتين
و طول ما الروح بتسري هما جوّانا مش طالعين
هيقفوا في وش أي فلة من الخاينين
م / مصطفى الطبجي
http://mostafaeltobgy.blogspot.com/
كتاب ((فيش و تشبيه)).... الهمّ اللي بيضحك
كُتب قبل الثورة ليناقش الواقع المصري فيما بعد الثورة
كتاب يوضح الفرق بين الشعب المصري و المصريين
كتاب غير ضار بالصحة و لا يسبب الوفاة
http://www.facebook.com/home.php?sk=group_100284806725381