ما بين حالك فبل الثوره و ما بعدها ..........ياعينى فعلا عليك يا شعب استبدلت دكتاتوريه السلطه بدكتاتوريه الثوره كنت بتهاتى و بتشكى و كانوا بيقولولك احنا ادرى و دلوقتى قلت رأيك فى الاستفتاء و لكنهم قالولك انت مش فاهم زمان قالوا عليك انت شعب صغير على الديمقراطيه و بعد الثوره بيقولولك انت شعب مستقطب قبل الثوره كان جدك المتوفى بيروح ينتخب و صوته بيتزور و بعدها رحت انت تقول رأيك ، لكنهم عايزين يزوروا ارادتك طال صمتك فى العهد البائد ............فقالوا ده شعب مبسوط و معانا فى سياساتنا الحكيمه و لما طال صمتك بعد الثوره ........قالوا ده صمت ثورى و كل واحد فى الصامتين بيطلع صوته معانا فى المليونيات بتاعتنا قبل الثوره عشت تربى فى ولادك و بعدها هما عايزين :إما يربوك أو ينفوك قبل الثوره كنت بتكلم ابوك بإحترام خاصة امام الشاشات و دلوقتى علشان ابنك يبقى ثورى لازم تسيبه يتعلم الاستخفاف بكل حاجه و بكل الناس حتى انت كانوا هما اللى ما بيسمعوناش دلوقتى احنا مش سامعين بعض و لما كان حد يسمعك .........كان يقول عليك "قله مندسه " و دلوقتى اذا حد سمعك .....يقول عليك انك من الفلول او مستفيد كانوا زمان هما بس اللى بيفهموا دلوقتى كل واحد فى الشعب بيفهم ....... و فى نظره الشعب كله ما بيفهمش كان عندنا زمان مشروع قومى واحد تلتف حوله ....... و هو التوريث استبدلناه بمشروع قومى واحد ,,,,,,,,,,,,, و هو الفوضى الخلاقه كنا زمان بنتكلم . ونقول ماحدش سايبنا نشتغل و دلوقتى بنتكلم ........و نقول مش ها نشتغل غير لما يسيبونا كنا زمان ممكن نشتغل ونقول مافيش نتيجه و دلوقتى .........عايزين نتيجه قبل ما نشتغل و كل من لم يقدر النظام السابق يهد سمعتهم و يصغرهم فى نظرنا قدرنا احنا عليهم و صغرناهم العالم كله الاداره فيه هرميه و احنا اتنكرنا لجدودنا اللى اخترعوا الهرم .......و عملنا الاداره قاعديه فبل كده كانت الحكومه بتحكم ......... ومطرح ما نحط راسنا نحط رجلينا لكن احنا دلوقتى اللى بنحكم ............و الحكومه عليها السمع و الطاعه حتى الحاجه الوحيده اللى كانت ماشيه صح قبل الثوره عايزين نمشيها زى ما اتعودنا بعدها مش عارف هى ايه ............الجيش يا شعب اللى كان بيفهم - قبل نجاح الثوره - ووقف معاك لكن بعد نجاح الثوره طلعناه ما بيفهمش صحيح ..........يا عينى عليك يا شعب كتبت : فيروز محمد طلعت مسلم