قطط مصر تعاتب البرادعى

جالسا فى الحديقة، مستمتعا بهدنة مؤقتة من متاعب الحياة. الغصون تهتز فى رقة، والفراشات تحلق بمغناطيس خفى فوق الزهور، والعصارة الخضراء تصعد فى لحاء الشجر عكس قانون الجاذبية. والعشب يمتص قبلات الشمس فى شراهة، والعصافير منهمكة فى الطيران. لذلك استغربت حينما وجدت من ينادينى باسمى: «بس، أيمن».
تلفت حولى فلم أجد إلا قطة، وفراشات تحاول إقناع الزهور بشىء، ونحلة تطن على وشك الانقضاض، فقلت لنفسى إننى أتوهم.
وفجأة عاد الصوت ينادينى ولكن بنفاد صبر: «يا أيمن». نظرت حولى فلم أجد إلا القطة ترفع ذيلها وتنظر نحوى فى غضب، فقلت لنفسى ضاحكا: « يا إما اتجننت.. يا القطة بتكلمنى». وجدتها تقول فى ضيق: «أيوه باكلمك، ما أنفعش!»، قلت مداهنا ومحاولا أن أمتص غضبها «إزاى؟ ده إنت ست الكل، هو إحنا لنا بركة غيرك»، هزت جسدها فى دلال مضحك وقالت «آه، باحسب!».
قلت فى فضول: «بس شكلك متضايقة أوى يا قطة ومش طايقه نفسك»، قالت وهى تموء فى احتجاج: «زعلانة من البرادعى»، قلت فى ذهول: «يا خبر! إنت كمان تعرفى البرادعى!».
(قالت القطة فى بساطة) طبعا. مش أنا عايشة فى البلد دى، وأحوالها تهمنى زيكم بالضبط!. كل المخلوقات- بما فيها القطط- بتتأثر سلبا أو إيجابا بحال البلد اللى عايشه فيه، هل حياة القطة الفرنسية زى حياة القطة المصرية؟- (قلت متحيرا) يا ترى إيه الفرق؟- (قالت فى غيظ) فرق السما والأرض.
فى الوقت اللى فيه القطط الفرنسية بتاكل سمك وتشرب لبن وتتفسح بين الجناين، القطط المصرية عايشه فى الزبالة مش لاقيه أكل. إذا كنتم نسيتم شكل السمك يبقى إحنا حنعرفه!،
والحليب طبعا أنساه. أنا أصلا باسمع عنه وعمرى ما شفته، حتى رجلين الفراخ بتشتروها بالكيلو، طب نعمل إيه؟ ناكل بعض!– (قلت وقد هزتنى المأساة) لا حول ولا قوة إلا بالله.
الله يكون فى عونكم- (قالت القطة وهى تكاد تبكى) وعيالكم بيضربونا بالطوب وساعات يخلعوا عيننا. يا ظلمة ده نص قطط مصر ماشيين بعاهات. حظنا الأغبر خلانا نتولد فى مصر، وعشان كده تنفسنا الصعداء لما جه البرادعى وطالب بالتغيير.
قلنا لما حال الناس يتحسن أحوالنا حتتحسن، لكن الموضوع نام والناس نسيته واللى بينادوا بالتغيير اتخانقوا مع بعض؟ بالذمة ده كلام!- (قلت وأنا فى نص هدومى) والله حاجة تكسف.
(قالت القطة فى وضوح) قول للبرادعى، الشعب مش سلبى ولا جبان. كل الحكاية إنه عاوز دليل مادى إنك بتحبه ومستعد تتحمل الأذى عشانه، ومش حتتركه فى منتصف الطريق.
ندوات النخب ماتنفعش، شغل البهوات راح وقته. عاوز تبقى سعد زغلول إعمل زى سعد زغلول والتحم بالشعب، وقتها الشعب حيفتديك بروحه، والقطط كمان.