السيسي: الإساءة للجيش والشرطة ليست حرية شخصية أو وجهة نظر.. خيانة عظمى

أكد الرئيس عبدالفتاح السيسي، اليوم الخميس، أن الإساءة للجيش والشرطة تساوي وفقا للقانون خيانة عظمي، وليست حرية شخصية أو وجهة نظر.
وقال الرئيس السيسي خلال حضوره تدشين مدينة العلمين الجديدة، اليوم، «فيه موضوع أخير عايز أتكلم فيه،عايز أقول للإعلام والموجودين معانا، الجيش والشرطة اللي بيمثلوا المصريين يسقط منهم شهداء ومصابين منذ 4 سنوات أو أكثر وطبعا لا يليق أنكم تسمحوا به لافتا أن هذا مش دور الإعلام فقط ولكن دور كل الأجهزة ولو حد أساء للجيش والشرطة ده في الأخر بيسيئ لكل المصريين وهنا يبقى مافيش حرية رأى .
وتابع الرئيس قائلا:- إنك ليك وجهة نظر أنا مش هحسابك على وجهة نظرك، لكن أنت عايز تخلي وجهة نظرك ديه صيغة تطلعها للناس تسيء بيها للمصريين إللي هما أولاد الجيش والشرطة، لأ ده كلكوا تتصدوا مش أنا فقط، أنا بقول بصراحة كدة، يعني الأم اللي قدمت ابنها والزوجة اللي قدمت زوجها تقول إيه لما تجد فيه إساءة للجيش والشرطة هو ده الثمن، انتو شايفين ان المقابل اللي تقدموه لابناءكم الشهداء والمصابين هو ده .
وأضاف الرئيس «المصاب ده يعني فيه منهم مصاب هيفضل قعيد بقيت عمره علشانك انت وعشانك انتي ..واذا كان ده مش واصل للناس انا اتصور الإعلام والثقافة والتعليم محتاج يراجع نفسه ..لكن ديه الاجراءات القانونية.. ولا حد يسيئ للجيش والشرطة وانا موجود هنا..الاساءة للجيش والشرطة وانا موجود لا لا.. والله العظيم.. مش عايز أقول انا بس اللي اعرف ان الجيش عمل ايه في السبع سنين الماضية علشان ميصحش اقول كده.. واللي عملو واللي بيعملوه النهارده هو والشرطة ده أجرهم فيه على الله سبحانه وتعالى .
«شوف انا بقول ايه بقي ..مش هقول هيتكتب في التاريخ ولا بأحرف من نور ولا كلام من هذه القبيل، فأرجو من الإعلام يساعدنا ويتصدى من غير ما نقول المطلب ده تاني.. وبالمناسبة.. الأمر يمكن يكون محتاج جهدا مننا، خلوا الناس تطلع تشوف في الشرق وفي الجبهة يشوفوا، طلعوا الناس، والإعلام يطلع أكثر وشوفوا اللي بيحصل .
وتابع الرئيس قائلا:- ولاد مصر بيقدموا أرواحهم علشانكم انتم، علشان البلد دي تبقى في أمان وسلام، عشان محدش ينزل يروع حد، لايليق أبدا الإساءة لهم، ده لايليق أبدا ولن نسمح بيه، وانا علشان كده بقول للاعلام واجهزة الدولة كل واحد يتصدى، اذا كان عنده قناعة ان فيه دور طيب بيتعمل، أما اذا كان عنده غير كده خلاص، بقى ربنا يعوض علينا بقي، بصراحه الاساءة دي بالقانون بتساوي دلوقتي بالنسبة لي خيانة عظمى..تساوي ايه يافندم، خيانة عظمى «.
ثم عقب ذلك تم عرض فيلم تسجيلي بعنوان العلمين «مستقبل مصر يجيب».
ووجه الرئيس السيسي كلمة عقب انتهاء الفيلم «قبل ما أنسي الكورنيش اللي انتو شايفينه ده موجود في المنصورة وموجود في شرق بورسعيد نفسه بالظبط، وأي حاجة هنعملها هنعملها زي ما الكتاب ما بيقول.. شكرا جزيلا».