«المصري كيدز».. حدوتة سمسم وسمسمة

ليلة رأس السنة الجديدة سمسم وسمسمة كانوا قاعدين مع بابا وماما بياكلوا سودانى وترمس وبرتقان.. وبعد العشا سمسم قال لسمسمة لازم نعمل حاجة جميلة وجديدة نستقبل بيها السنة الجديدة.. سمسمة فرحت وبدأوا يفكروا هيعملوا إيه يفرحهم ويفرح بابا وماما وكل أصحابهم إللى بيحبوهم.. وأول حاجة عملوها جابوا ورقة وقلم وكتبوا فيها كل أحلامهم وأمنياتهم اللى نفسهم يحققوها.. سمسمة كتبت إن نفسها تقرا قصص كتير علشان لما تكبر تعرف تكتب قصص ومغامرات جميلة للأطفال تفرحهم وتخليهم يحلموا ويغنوا وما يخافوش.. وسمسم كتب إن نفسه يزرع شجر وورد وريحان وقرنفل كتير علشان كل الدنيا تبقى شكلها حلو وريحتها جميلة ولونها يفرح أي حد مش فرحان ويجيب كاميرا ويصور الدنيا الجميلة.. وسمسمة كتبتوا إنها لازم تجيب كراسة رسم وترسم الدنيا الجميلة وتلونها بلون البرتقان والفراولة والمشمش والبرقوق وتحط الرسومات جنب القصص والحواديت إللى هتكتبها لما تكبر.. وسمسم كتب إنه هيقول لأصحابه في الحضانة يزرعوا معاه علشان هم كمان يعملوا دنيا جميلة ويفرحوا زيه هو وسمسمة.. بابا وماما قروا إللى سمسم وسمسمة كتبوه وفرحوا بيهم وقعدوا هم كمان يكتبوا أحلامهم وأمنياتهم إللى نفسهم تتحقق في السنة الجديدة.. وكانت أول حاجة كتبوها إنهم أول يوم في السنة هيجيبوا لسمسمة قصص كتير علشان تقراها وتتعلم منها تبقى فرحانة وكراسة رسم علشان ترسم فيها الدنيا الجميلة وتانى حاجة كتبوها إنهم هيجيبوا بذور وزرع لسمسم ويعلموه يزرعها علشان يعمل دنيا جميلة تخليه فرحان ويجيبوله كاميرا خضرا علشان يصور بيها دنيته ويفرجها لكل الناس علشان يفرحوا.. ولما جه معاد النوم سمسم وسمسمة دخلوا ناموا وهم فرحانين هم وبابا وماما وحلموا أحلام جميلة كلها فرح وألوان حلوة.