«حدوتة قبل النوم».. «نورا الفنانة»

لكل أم تجد صعوبة في نوم أطفالها، إليكِ حلا سحريًا للأخذ بيد طفلك إلى عالم الأحلام والنوم الهاديء.. «شيماء عبدالعال» تقدم مجموعة قصص يومية تساعدك على ذلك:
حدوتة النهاردة ... «نورا الفنانة»
كان ياما كان كان في زمان بنت اسمها نورا، نورا بنت جميله لكن كانت عصبية جدا، كان كل ما حد يكلمها ترد عليه بزعيق وعصبية عشان كدة مكنش عندها اصحاب خالص في المدرسة، مفيش غير نهي صحبتها اللي كانت معترضه علي عصبية نورا لكن كانت برضه بتحبها.
وكانت نورا بتحب الرسم اوووي وفي يوم من الايام قررت نورا انها هتبقي فنانه ومسكت الالوان بتاعتها وقعدت ترسم بيها علي حيطة السور بتاع المدرسة ولما سألتها نهي انتي بتعملي ليه كدة قالتلها انا بعمل معرض للرسومات بتاعتي، كل اصحابها لماشافوها اضايقوا جدا من اللي نورا بتعمله لانها بترسم علي حيطان المدرسة و بتشوه السور، ولكن في نفس الوقت كانوا خايفين يجوا جمبها أو يكلموها لانها عصبية وأكيد هتكلمهم باسلوب مش كويس.
فضلت نورا ترسم ورد وأشكال علي الحيطان، فقررت بنت من البنات أنها تكلمها وتمنعها من اللي بتعمله ده، زعقت فيها نورا بعصبيه وقالتلها وانتوا مالكوا انا فنانة وبعمل معرض للرسومات بتاعتي علي سور مدرستي.
اضايقت البنت جدا من رد نورا وقررت تبلغ الادارة بتاعت المدرسة عنها عشان يعقبوها، ولما نهي صاحبتها شافت الموقف ده وعرفت ان نورا هتتعاقب علي اللي عملته وعشان هي صحبتها الوحيدة اللي بتحبها في المدرسة، قررت نهي تساعدها.
اقنعت نهي البنت انها متبلغش ادارة المدرسة باللي بتعمله نورا واستئذنت من مامتها انها تروح لبيت نورا و تقابل ماماتها، وحكت لمامه نورا كل حاجة وفكروا ازاي يحلوا المشكله دي مع بعض من غير نورا ما تعرف.
اشترت مامه نورا علبه الوان كبيرة وكراسة رسم كبيرة، ولما نورا رجعت من بره مع بابا، قدمتهم ليها وقالتلها انا عارفه انك فنانة وبتحبي الرسم عشان كدة جبتلك الالوان دي وكراسة الرسم الكبيرة دي عشان ترسملنا لوحات جميله ونعملك معرض كبير هنا في البيت ونعزم اصحابك وقرايبك يتفرجوا عليه.
فرحت نورا اوي اوي بالفكرة وكانت هتطير من الفرحه، قالتلها لكن انا اصحابي زعلانين مني، انا لازم بكرة لما اروح المدرسة اعتذرلهم كلهم واطلب منهم يجوا يتفرجوا علي لوحاتي اللي هرسمها طلبت من مامتها تديلها قطعه قماش ولما سألتها مامتها عايزاها ليه قالتلها علي الرسومات اللي رسمتها علي سور المدرسة وانها هتنظف السور بكرة بنفسها وتمسح الرسومات دي وانها هتعامل اصحابها بعد كدة بطريقة كويسة وتبطل عصبيه عشان اصحابها يحبوها ويبقي عندها اصحاب كتير.