«حدوتة قبل النوم».. « ملك تخاف من العقاب»

لكل أم تجد صعوبة في نوم أطفالها، إليكِ حلا سحريًا للأخذ بيد طفلك إلى عالم الأحلام والنوم الهادئ.. «شيماء عبد العال» تقدم مجموعة قصص يومية تساعدك على ذلك:
حدوتة النهاردة ... «ملك تخاف من العقاب»
كان ياما كان، كان في زمان بنت اسمها ملك، كانت ملك بنوتة جميلة و مؤدبة ودايما بتسمع كلام مامتها ومكنتش بتحب تزعل مامتها منها لانها بتخاف من العقاب.
وفي يوم من الأيام أعلنت المدرسة عن قيام رحلة الي حديقة الحيوانات وطلبت ملك من مامتها و باباها انهم يوافقوا يودها الرحلة دي، لان في ولاد كتير من اصحابها رايحين ووافق باباها و مامتها علي انها تروح وماماتها ادتلها ظرف فيه فلوس اشتراك الرحله وقالتلها اول ما تروحي المدرسة سلميه للمدرسة علي طول، ولما راحت ملك المدرسة انشغلت مع اصحابها بالكلام و في الدراسة مفتكرتش تسلم الظرف للمدرسة غير في اخر اليوم لما حبيبة صحبتها سألتها انتي هتروحي الرحلة معانا يا ملك، افتكرت ملك انها نسيت تدفع اشتراك الرحلة وجت تطلع الظرف عشان تديه للمدرسة بتاعتها ملقتهوش، انهارت ملك في العياط و قعدت تدور في الشنطة بتاعتها ملقتهوش، ساعدتها صحبتها حبيبة و قلبوا الشنطة كلها و دوروا برضه ملقوش الظرف.
حبيبة قالت لملك خلاص يا ملك متخافيش لما تروحي البيت قولي لمامتك علي اللي حصل و احكيلها الحقيقه وهي هتسامحك ان شاء الله، لكن ملك كانت خايفة و مرعوبة و قالتلها لا طبعا اكيد ماما هتعاقبني لاني ضيعت الفلوس و مش هترضي تديني غيرها وكدة مش هروح الرحلة معاكوا و فضلت تعيط.
حبيبة قالتلها معتقدش بس المهم انتي لازم تحكي لمامتك الحقيقة ولما روحوا البيت اتصلت حبيبة بملك عشان تطمن عملت ايه، ملك قالتلها خلاص انا اتصرفت، قالتلها اتصرفتي ازاي، ملك قالتلها بصوت واطي جدا في التليفون انا فتحت شنطة ماما و اخدت منها تمن اشتراك الرحلة و حطيتها في شنطة المدرسة و هدفعها بكرة اول ما اروح المدرسة.
حبيبة اتصدمت، ايه يا ملك انتي بتقولي ايه مش معقول انتي كدة سرقتي الفلوس من مامتك انتي كدة تبقي حرامية، ليه عملتي كدة، ده غلط كبير، انتي لازم تروحي تقولي لمامتك علي كل اللي حصل، قالتلها لا طبعا ده كدة ماما هتعاقبني، يا بنتي خلاص محدش شافني وانا باخد الفلوس.
قفلت حبيبة التليفون مع ملك و هي هتتجن من التصرف اللي عملتوا ملك و راحت حكت لمامتها اللي حصل، مامه حبيبة قررت تدخل عشان تصلح الخطأ اللي عملتوا ملك، اتصلت بمامه ملك و حكيت علي اللي حصل و طلبت منها انها تحل المشكلة بهدوء و تفهم ملك غلطها بالراحه لانها عملت كدة خوفا من العقاب من مامتها وطلبت منها انها متقولش انها عرفت الموضوع دة من حبيبة عشان متزعلش منها.
راحت مامه ملك اخدت الفلوس من شنطة المدرسة و سالت ملك وانا برتبلك شنطة المدرسة لاقيت الفلوس دي بتاعت ايه قالتلها دي فلوس اشتراك الرحلة يا ماما نسيت اديها للمدرسة النهاردة فهديهالها بكرة، مامتها قالتلها مش فلوس الرحلة انا مديهالك في ظرف مقفول، الفلوس دي جت منين، حست ملك انها خلاص اتكشفت و قعدت تعيط و اعترفت لمامتها بكل اللي حصل وقعدت تقولها بس يا ريت يا ماما متعقبنيش والله الفلوس ضاعت مني غصب عني.
مامتها قالتلها انا مش هعاقبك بس المفروض كنتي تيجي تقولي الحقيقة من الاول و انا كنت هسامحك و اديلك غيرهم، لكن انتي كدة ارتكبتي خطأ كبير، انتي كذبتي و سرقتي كمان، السرقه دي من الحاجات الوحشة اللي ربنا نهانا عنها و لو انا مشوفتكيش و انتي بتاخدي الفلوس من شنطتي فربنا شايفك و اتكتبلك عند ربنا انك سرقتي، لازم تستغفري ربنا الاول، قولي استغفر الله العظيم، عشان ربنا يغفرلك الغلط ده و يسامحك و بعدين تعتذري لمامتك و توعديني انك متعمليش كدة تاني ابدا مهما كانت الظروف ومهما حصل لازم تقولي الحقيقة لمامتك ومتخبيش عليا حاجه تاني ابدا و انا هسامحك مدام قولتي الحقيقة.