«بسيمة» للسيسي: عاوزة شقة تلمني أنا وولادي.. وبنتي تطلع وكيلة نيابة إدارية

قالت بسيمة حجازي، إحدى الحاضرين في «عزومة الرئيس»، إنه «لما قابلت الرئيس عبدالفتاح السيسى كنت قاعدة جنبه، أنا لو بحلم مجرد حلم مش هحلم إنى أشوفه، لكن كون إني أشوفه وأجلس بجواره ومش بس كده أنا أكلت معاه، وبدل ما أنا كنت هعزمه على الفطار هو اللى عزمني».
وأضافت «حجازي» في تصريحات ل«المصري اليوم»، مساء الأحد، أنها بعدما عادت إلى مكان «فرش الفاكهة» حضر إليها أهل القرية لتهنئتها بمقابلة الرئيس عبدالفتاح السيسي، مشيرة إلى أن «كلهم عاوزين يعرفوا إيه اللي قولته للرئيس»، وتابعت: «الست الغلبانة اللي بتربى في أيتام ومعظمهم معاقين قابلت رئيس الجمهورية».
وتابعت: «وأنا قاعدة جنب الرئيس كان كل همي أشكى له حالى أنا وأولادى الخمسة، قلت له يا ريس أنا مش مصدقه إني هنا جنبك، لما جالى واحد صحفى وقالى أنت هتعزمى الرئيس على الفطار، مكنتش مصدقه، لكن أنا الآن صدقت يا ريس.. أنا عاوزة ولادي يتربوا بعيد عن الشارع، أنا عندى فرش فاكهة في الشارع، وموظفين الوحدة المحلية طهقونى في عيشتى، كل يوم يمروا عليا يخدوا مني فلوس أرضية، لإنى مش عندي كشك».
وأشارت إلى أنها «قلت للرئيس أنا قاعدة في الشارع، ونفسى يبقى عندي شقه زي باقي خلق الله، لأن ولادى الخمسة بيناموا تحت الفرش على بطانية على الأرض في الصيف والشتاء، وعندي 3 ولاد معاقين، وعندي (هند) في رابعة حقوق، ونفسى أشوفها وكيلة نيابة إدارية، عشان تبقي زي ولاد الناس الكبيرة».