قصيدة..ما تسَلميش يا مصر

إلى كل من يتلاعبون باحلامنا ظانين أننا لا نراهم إليهم أكتب
ماتسَلميش يا مصر
ما تسلميش عليهم مش همه دول أهلك
لسه الدم ف إيديهم بالراحه على مهلك
ما تسلميش يا مصر
مين اللى قال يدن الفجر بعد العصر
بينهم ساعات وساعات
ولسه كتير حكايات
هتبان وتشهدلك
مين إللى يستاهلك
ومين إللى يستاهل الربط فى سلاسلك
ما تسلميش يا مصر مش همه دول أهلك
ما تسلميش يا مصر ما يغُركيش منظر
أبو بدله ونص كرش طالع بيتمنظر
وأبو وش بألف وش آوانه يسترزق
وأبو جهل وجهله قاتله هو إللى بيفكر
وأبو ريحه فايحه طايحه بدمنا إتعطر
وأبو إيه وإيه وإيه
صاحى يحرق بإيديه
الصحرا والأخضر
ما تسلميش يا مصر ما يغركيش منظر
ما تسلميش يا مصر ما تسلميش على دول
منهم كلاب القصر ومنهم صحاب الغول
ومنهم وشوش باينه
شفافه مش خاينه
وهمه الخسه ف عنيهم بتدارى كدب القول
همه إللى لسه يا مصر بيقلبو المعدول
ويعزلو الثابت ويثبتو المعزول
وينصرو القاتل ويهزمو المقتول
مفروض أموت كام موته
وما كنش حدودته
يحلى التحليل عليها ويحطو ليها حلول
ما تسلميش يا مصر ما تسلميش على دول
ما تسلميش يا مصر مش مرحلة سلامات
ولا مرحلة تجريح ولا تصفية حسابات
ولا مرحلة تنطيط الكل فيها يزيط
وكل إللى يقول كلام ويعجب السامعين
على طول أوام نحطه فوق مستوى الشبهات
ما تسلميش يا مصر مش مرحلة سلامات
ما تسلميش يا مصر وإتخيرى الأخيار
لقينا بعد الثوره بيتولد ثوار
بيركبو الموجه ويحطمو الأفكار
مابيفهموش فى الشعر وبيكتبو الأشعار
ما تسلميش يا مصر
ماتمشيناش الزمن من تانى بالمندار
ما تسلميش يا مصر وإتخيرى الأخيار
ما تسلميش يا مصر وبكره هيقولك
مين اللى كان ضالك ومين اللى كان ضلك
ومين اللى فاض صبره ومين اللى فاضلك
ما تسلميش يا مصر مش همه دول أهلك
د.على جلال كاشف
alikashef99@yahoo.com