صرخة بائع فى «الترجمان»: «مدخلش جيبى جنيه من 11 يوم»

«بقالنا أكتر من 11 يوم فى المكان دا، مدخلش جيبى جنيه واحد، كل يوم باجى هنا أفرش بضاعتى، لكن مفيش بيع ولا شرا، مفيش ناس هنا أصلا، عدد قليل أوى اللى بييجى هنا يركب الأتوبيسات عشان يسافر، مش يشترى، المشروع ده فاشل والحكومة رافضة تعترف بكدا، وبعدين ليه التكاليف دى كلها فى تجهيز المكان طالما هو لفترة مؤقتة 6 شهور بس، وبعدين ينقلونا لمنطقة وابور التلج زى ما قالولنا».
هكذا اشتكى رمضان الصاوى، أحد الباعة الجائلين، حاله وحال زملائه الذين تم نقلهم لجراج الترجمان، حيث يصرخون من عدم وجود زبائن. وقال «الصاوى» ل«المصرى اليوم»: «دلوقتى البياع معاه 300 أو 500 جنيه، لما يخلصوا هيضطر يعمل أى حاجة، وإحنا على أبواب مدارس، وبعدين إحنا فى الشارع بقالنا سنين كانوا صبروا علينا 6 شهور كمان لحد ما نتنقل لوابور التلج».
واتهم «الصاوى» مسؤولى المحافظة بسوء التخطيط، نظرا لقيامهم بتخصيص أماكن بالسوق الجديدة للبلطجية، وقال: «لما البياعين رفضوا يتنقلوا، الحى جاب ناس تبعه وخصص لهم أماكن فى الترجمان عشان يورى الناس إن فيه بياعين وحركة هناك ودا مش حقيقى، كمان تخطيط المكان سيئ جدا، وبياعين كتير أوى قاعدة فى بيوتها، رغم إن نائب المحافظ قال إنه سلم 3000 بياع أماكن».
وتابع «الصاوى»: «بقالى 35 سنة بياع، ومعرفش أشتغل حاجة تانية، ولو استمر وقف الحال ده هاودى ولادى للسيسى وأسيبهم ليه يصرف عليهم».
وبينما تتجاهل أجهزة محافظة القاهرة الرد على صرخات الباعة الجائلين من قلة الزبائن، تصب المحافظة اهتمامها على مظهر جراج الترجمان، حيث اعتمد الدكتور جلال مصطفى سعيد، محافظ القاهرة، نماذج إضافية جديدة لعربات عرض وتخزين سلع الباعة الجائلين، ولها مظلات من 4 جهات، وطالب المحافظ الشركة المنفذة بتكثيف العمل يوميا ليتم توريد 25 عربة يومياً من النماذج الجديدة وإهداؤها للباعة، بخلاف النموذج المعتمد سابقاً الذى تقوم بتنفيذه الهيئة العربية للتصنيع ويتم توريده وتسليمه مباشرة للباعة الموجودين بالمنطقة.
اشترك الآن لتصلك أهم الأخبار لحظة بلحظة