إسعاد يونس طيور الظلام

■ يا طيور الظلام يا طيور مدينتى.. والله العظيم تلاتة.. وماليكو عليا حلفان.. وحياة العشرة دول وعينى ف عينكو وحق مين فرقنا عن بعض.. إنتو ف سكة وإحنا ف سكة تانية.. ما حاتبوظ.. وإن كنتوا فاهمين إنكم بشوية التيئيس والاحباط وطلق البلطجية علينا وترويعنا والتياسة والبلاطة والرحرحة اللى فيها الداخلية دى.. وحبة الولايع والمظاهرات العبيطة حاترجعنا عن اللى ابتديناه.. يبقى البعيد فيكوا.. واهم.. حالم.. ظالم.. مش فاهم.
■ والله العظيم تلاتة تاعبين نفسكو.. وتخطيط ورسم وتكتكة م اللى جابتكوا ورا بدل المتر فراسخ.. ومحاولات توليع فى الجهاز المركزى للمحاسبات وقسم هنا ومحكمة هناك عشان تنضفوا ورق وتسربوا وثائق.. ومناورات التوقيع بينا وبين الجيش.. مع كوووول ده لعلمكم بقى.. تحرير مش سايبين.. ولا أى ميدان تانى فيكى يا بلد.. ومسيرنا حاننضفه تانى وتالت ورابع.. مش م التراب والورق وعلب السجاير الفاضية.. لأ م الواغش اللى طلقتوه عالميدان والعيال السريحة اللى بتضرب بالليل وتحاول تندس بين عيالنا.. ولا الهوا.. وإن كنتوا استفضيتوا الميدان الأيام اللى فاتت حانملاه من تانى.. والنهاردة.. الجمعة.. النهاردة يا عمدة.
■ اتفتقنا مناقشات ومحاورات ومجادلات حوالين الإجراءات.. وكل من لقى نفسه فاضيله ساعتين حط الدستور تحت باطه ونزل جرى على أقرب قناة تليفزيونية وهاتك يا فتى.. والبس نضارة النظر وزحلقها على أرنبة مناخيرك ومقق قوى فى الكتاب.. وغنّى يا وحيد.. إشجينا يا فريد زمانك ولعلع.. هذه تعديلات عبقرية.. بل هى مهزلة دستورية.. مين حلف قدام مين.. ومين يبتدى الأول؟؟..
نجيب الريس الأول ولا المجلس؟؟..
المجلس ولا الريس؟؟..
طب ما تيجوا نجيب لجنة تجيب هى الاتنين بمعرفتها ونطلع إحنا نصيف.. العيال ثاروا.. والكبار لاصوا.
■ أصبح كل من هب ودب يرمى بلاه على الجيش، الذى عليه أن يلعب كل الأدوار، لحد ما البهوات بتوع الداخلية يستحموا ويحلقوا ويتكلينوا ويحطوا ديودورانت تحت باطاطتهم ويشوفوا حايلبسوا أنهى بدلة عشان ينزلوا الشارع فريش كده ومفحفحين.. ويمكن ساعتها يفكروا.. ده لو المزاج عالى والغزالة رايقة.. إنهم يرجعوا يلموا بلطجيتهم حبايب قلبهم اللى عندهم الليسته بتاعتهم ويعرفوهم نفر نفر.. ولو كانوا عاوزين يلموهم كانوا عملوها فى 48 ساعة.. لكننا لازلنا نلعب لعبة مين حايقول آى الأول.. كأننا بنتعاقب علشان متنا فى الميدان.. ويجد الجيش نفسه مطلوب منه يحمى الحدود شمال جنوب شرق غرب..
وبالذات غرب دى.. كفاية المجهود اللى بيبذل على حدود ليبيا والسلوم.. طيران وبرى وأكل وشرب وعلاج ومواصلات وبدل خسائر.. ناقص يعالجوا الناس نفسيا من شقلباظات القذقذ صاحب توكيل التكاتك والأمبريلات.. مطلوب منه يعمل كل حاجة فى البلد.. حماية وأمن مواطنين ومنشآت وغذاء ومرور وحتى لو اتنين اتخانقوا مع بعض.. ويواجه ويسيطر على وقفات ومظاهرات فئوية وتخريب ناتج عنها.. وحل يا جيش.. ويارب الجيش يزهق ويصطدم بالمواطنين الكلاب دول عشان ننزل نزلة صلاح الدين راكبين الموقف فتعود الهيبة المبكى عليها.. وصلت لحد المطرب المشهور اللى راح نقابته يعتصم فيها هو والآلاتية الغلابة اللى حالهم وقف بسبب غلق الكباريهات وطالب الجيش ييجى يحميه فى النكابة من الأساتذة النكابيين القدام.. أصل بيضايقوه.
■ كل هذه المدة وكل هذه الدوشة وهناك شىء فارسنى جدا.. فين مرتكبى موقعة الجمال؟؟.. نعم نعلم أن هناك تحقيقات.. بس كل ده؟؟.. معروف أن هناك أسماء بعينها طرحت.. بدءا من الوزير المخلوع أنس الفقى وابراهيم كامل أبوالعيون وخلافه.. لماذا لم يتم القبض على نفر من اللى خططوا ودبروا ومولوا.. طب فين العيال اللى كانت راكبة عالحمير؟؟ دول كمان معسكر قديم ومحسوبين عالنظام؟..
ما هما ملقحين فى النزلة.. طب بلاش.. لو عجزت السلطات عن تقديم مجرم واحد من الشلة اللى خططت ومولت وركبت وساقت.. اصرفولنا حمارين وبغل وجوز جمال وإحنا مش حانغلب نقررهم بمعرفتنا.
■ العزيز المهندس نجيب ساويرس.. من حقك تقلق على اقتصاد البلد.. كلنا هذا الرجل وكلنا مخروب بيتنا، كل على قد دمه.. وأن تتفق مع الدكتور أحمد كمال أبوالمجد فى عدم الموافقة على إجراءات المنع من السفر والتصرف فى الأموال والحبس والبهدلة والمحاكمة الإعلامية للمتهمين من رجال الأعمال والوزراء وخلافه.. لكن كله كوم وحبيب العادلى كوم.. زعلان قوى إنهم صوروهولنا وهو فى الزنزانة وبيرحلوه عالسجن بالترينج الأبيض؟؟.. وإحنا الشعب ما اترحلناش عالقرافة طول التلاتاشر سنة اللى فاتوا؟؟.. ده بالذات السحل فيه حلال يا راجل.
ضباط الصف التالت من الداخلية.. عليا النعمة الأمل فيكو إنتو.. شباب زى شباب الميدان.. ماتقوموا قومة رجل واحد وتسقطوا النظام حداكم.. ونبتدى كلنا صفحة بيضا جديدة.. نحمى فيها بعض وننضف البلد بقى.
■ السيد الفريق الدكتور أحمد شفيق.. أنت رجل دمث للغاية.. صريح وواضح ولا تكذب.. شديد الأدب وتحترم كبارك والمسافات.. سلوكك تبدو واضحة فيه تربيتك العسكرية.. ولكنك سيدى تنقصك المعلومات والحنكة اللتان تؤهلانك لمنصب رئيس وزراء لدولة قامت بها ثورة رائعة، يتمتع شبابها بالعلم والذكاء والرقى.. مما يعنى أنهم لن يتهاونوا فى طلب حقوقهم مهما كان الوضع.. وعليه.. وبعد موقعة قناة أون تى فى.. أنصحك بالاستقالة.. أو بتغيير المنهج.. وفورا.
■ الدكتور علاء الأسوانى.. أنت رجل شديد الوطنية.. مثلنا جميعا.. ولكن الحوار ما يبقاش كده.. كان ممكن تحقق كل انتصاراتك على الرجل.. بخسائر أقل كثيرا.. لك.
■ الأستاذ حمدى قنديل.. جاء ليثبت أن أدب الحوار كلمة يتحط تحتها مليون خط.. كنت أتمنى على المهندس نجيب أن يعطى لرئيس المجلس فرصة للرد على أسئلتك القيمة.. القصيرة.. المهذبة.. اللى فى العضم عِدِل.
zahqanin@gmail.com