أنا كوول وباحب الحرية * * معجب بآرائى الثورية و كلامى كلام كله إستلاحات * * تُرُوحات حاتفيد البشرية أعرف بلغات بعض الأباحات * * بتخللى لنا القاعدة طرية و باروح مازادات و أشترى لوحات * * و كتب و مراجع أثرية و الحاجَّة ساعات تعمل مناحات * * مش أمى ؟ لكنها فقرية مالهاش فى اللِّت ولا الفسحات ** أصلها مش دايما حشرية و تقوللى يا واد بطل شطحات * * طريقتها ماهياش حضارية يابنى المعاشات مافيهاش نفحات * * ولا قرش يزيد عالشهرية كانت معقولة و مقبولة * * فى شبابها بريئة و فطرية إنسانة خجولة و مقفولة * * ولا روج ولا إيد متعرية و بتطلع عالدفعة الأولى * * و يبصوا عليها بسخرية مش دى الإنسانة العصرية تعجبنى البنت الفاهمة الناعمة * * دماغ و ملامح مغرية ترقص فى اللَّمة , أماكن عامة * * و تحضر ندوات شعرية و صريحة و مالهاش فى الضلمة * * و لا فى الأفعال المذرية تخرج و تغيب و بتلبس جيب * * أو جينس و كيرلى وغجرية مش حابة رقيب , دا حرام و دا عيب * * دا غريب مفهوم العذرية ! و تشوط و تعيب فى غريب و قريب * * تعجبنى القطة البرية و بكلمة تدوب و بصوت مغلوب * * من بعد ما كانت نِفَرية تهديك دبدوب , و شموع و قلوب * * و تجمَّع ف ذئاب بشرية و العربى يادوب بلسان مقلوب * * ماراحتشى مدارس أميرية و نكون أنتيم و بنعمل تيم * * نتبادل حوارات فكرية و بقصد سليم , حبة تعتيم * * نبدأ فى أمور المِدارية من غير تقطيم , مانا أصلى يتيم * * محتاج لشوية شاعرية الصبح رزاز , غمز و ألغاز * * و تقول يا جواز عالظهرية أو عرفى إن جاز , و دى لمبة جاز * * و حاعيش لك خدامة وجارية الله يخليك , لا فَرَح ولا كيك * * دى مسائل فى نظرنا صورية و لا حالبس شيك , و بلاه البانكيك * * و حاكونلك م الجنة حورية و انا أقول يا فكيك أصلها تلاكيك * * كان هنا فيه دراجة نارية بِدينى لاوارييك يا وضيع يا ركيك * * دا انا ياض من باب الشعرية أرجع للنسخة المنقولة * * و أسأل عالوصفة السحرية إنسانة خجولة و مقفولة * * ولا روج ولا إيد متعرية و بتطلع عالدفعة الأولى * * و يبصوا عليها بسخرية و دى ست البيت العشرية تشبه لها وإنقسمت فولة * * بتصَّحى البيت م الفجرية دايما مشغولة و مسئولة * * بإيدين و صوابع مهرية وانا كُللى تسلط و رجولة * * و عليها الطاعة الجبرية راح فين بسلامته مرتبها * * مش فاتحو مؤسسة خيرية إن عَلِّت صوتها نأدبها * * محسوبك صاحب نظرية و إن حكمت بالشرع أضربها * * و دى أحلى الطرق القهرية و أخش البيت جاهم وغتيت * * و أخرج بزوابع مدارية من بعد غزالة أشوف خرتيت * * وطالع له قنابل ذرية أسمع فى صويت و أشم ف زيت * * و قَليِّة و أكلات بحرية من بعد ما دُبْت و حبيتها * * نبرة صوتها ألآت وترية أطفش من ريحة جلابيتها * * قادر يرزقنى بسفرية ودا غير بس بنات خلفتها * * و أنا عايز أمد الذرية واللا آخد قرارات مصيرية ؟ و أرجع و أدوَّر فى الكافيهات * * أو فى الندوات الشعرية عن بنت بتبحث فى التفاهات * * بشعور و ملامح مغرية و صريحة و مالهاش فى المتاهات * * و لا فى الأفعال المذرية أندم و حكايتى تزيد تعقيد * * و حنين لحياتى الأسرية أتحيَّر فيها و أعيد و أزيد * * و أسترجع لحظات قدرية لوحأحلم من أول و جديد * * حانسى الهتافات الثورية وأحلم لولادى بفكر يفيد * * غير مجتمعاتنا الذكورية إللى بتسترجل بالتشديد * * وأحلم لبناتى بحرية أصلية أكيد من غير تقليد * * و تليق عالروح المصرية حسن العربى شتوتجارت - ألمانيا
