صبوا بنزين ولعوها * * حَمُّوا نار إستهدفتنا الكنايس تمنعوها * * و المساجد روعوها و العساكر تزرعوها * * و بالقنابل حَدِفِتنا و بدروعها رجفتنا المودة إنزعوها * * و القرارات إرزعوها و الغنايم وزعوها * * ولعوها و تبقى فتنة شعللوها و ياللا بينا * * ننسى أشياء وَلِّفتنا مين نبيهم ؟ مين نبينا ؟ * * بِرَب واحد عَرَّفتنا إبنك أحمد شكل مينا * * أم واحدة و خلِّفتنا فينا تحتار لو شافتنا طينها ريحته فايحة فينا * * من قدمنا لكتافتنا حضن واحد بيحابينا * * مهما حَنِّت أو جافتنا حلم واحد لو غِفينا * * بِهَم واحد خوفتنا وإحنا الإثنين إتكفينا * * و ياما منها قَرَّفتنا طَرَّفِتنا و عَنِّفِتنا همشتكم هييفتنا إن مِرضنا أو شِفينا * * إيد بارينا خَفِفتنا بس فالحة تبستفينا * * لو نبوس إيد سلفتنا لبستنا و أييفِتنا بس عُمر ما نظفتنا غرَّقوا بينا السفينة * * إخرقوها و تبقى فتنة إمتى كانت ف الكروب * * دلعتكو و نشفتنا ؟ أخادتكم عالركوب * * و كعب داير لففتنا ؟ جهلتكو و ثقفتنا ؟ عطلتكو و وظفتنا ؟ واللا كانت ف الحروب * * قعَّدتكو و كلفتا ؟ من شمالها للجنوب * * صرخة واحدة وقَّفتنا حد فكر فى الهروب ؟ * * أمِّنتكو و حَلِّفِتنا و دم غالى كلفتنا تضحياتنا ف القلوب * * و بطولاتكم شرفتنا جت تدارى عالعيوب * * الطوارئ أفقِفِتنا سكَّرت كل الدروب * * لَجَّمِتكم * * سَخَّفِتنا سكتتكم * * كتفتنا و إيد خَفِّية صَنَّفِتنا لسه بدرى عالغروب * * ضلموها و تبقى فتنة إنتو مش آخَر ولا احنا * * دا ف ماعونكم مغرفتنا إللى يجرحكم جرحنا * * و إللى داوتكم عافتنا و تلاقينا ف كل محنة * * قرشكم على تعريفتنا كان عسلكم فى كنافتنا ومزيكتكو ف معزوفتنا مهما قُلنا أو قاوحنا * * مين يصدق تخريفتنا لو غَزينا و إستبحنا * * من زمان كانت خَفِيتنا أو على حدودها إندبحنا * * و من شعورنا نَتِّفِتنا جففتنا و غلفتنا لانتو فيها ضيوف ولا احنا * * خليناكم فى ضيافتنا و الجذور إللى ف كفاحنا * * قادرة تكسر جرافتنا دى النوايا إللى ف بلحنا * * شبَّعِتنا و كيِّيفتنا و الريشات إللى ف جناحنا * * كان غناها ف رفرفتنا إيه حاناخده من نواحنا * * غير نسور حوالين جيفتنا وإللى عُمرْ ما أنصفتنا قنَّعتكو و زييفتنا غرَّبت فيكو و نفتنا وحدة القلبين سلاحنا * * فرقونا و تبقى فتنة