سيادة الوزير: .... بيت اللى يزعلك

سيادة الوزير «أحمد زكى بدر» جاء إلى الوزارة وهو متحمس زيادة عن اللزوم ومستعجل جداً جداً، أزيد من اللازم، ومنفعل قوى خالص قبل أى حاجة ما تحصل.. وفى أول يوم وعلى سلالم الوزارة وهو طالع الصبح بدرى، شاف كاميرات تليفزيون أو كاميرات فوتوغرافيا وصحفيين..
راح واخد نَفَس عميق من الهواء النقى وضارب أول تصريح جو جو من غير ما ينشن، وقال إن منع الضرب فى المدارس بوظ التعليم وضيع هيبة المعلم بس.. وفى ظرف دقائق طار التصريح فى الهواء ووصل جميع المدارس فى مصر.. من بحريها إلى قبليها.. وفرح المعلمون بهذا التصريح وبدأ بعضهم يكشر عن أنيابه مرة أخرى بعد فترة من الكبت طولت شوية من ساعة ما ضربت وزارة التربية والتعليم فى مصر الرقم القياسى العالمى فى النسبة الدولية للقتل فى المدارس وزادت على المعدل الآمن لضحايا العلم..
وبدأنا نقرا فى الصحف أخبار ضرب المدرسين فى الطلبة.. واحد إيده اتكسرت والتانى عينه اتفقعت والتالت عنده ارتجاج مستعصى فى المخ مش عاوز يسكت.. وهوب تانى يوم أخبار عن طلبة ضربوا المدرسين وجاءت صورهم فى الصحف متشلفطين وكرامتهم متبعزقة فى كل حتة..
اليوم التالت بقى انضم الأهالى إلى المعركة وهات يا ضرب فى المدرسين اللى ضربوا ولادهم وعملوا لهم «كماين» جمع كمين بجوار أسوار المدارس، والأقسام اتملت والتخشيبات جمع «تخشيبة» أصبحت استراحة للطلبة والمدرسين والأهالى..
وبعد الهيصة مازادت، تراجع السيد الوزير وصرح بأنه لم يقصد مطلقاً إعادة الضرب لكنه يتحدث عن «هيبة» المعلم التى خرجت ولم تعد..
وكأن هذه الهيبة هى سبب انهيار التعليم فى مصر وكأن المدرس اللى من غير هيبة متخرج من مدارس غير الموجودة فى مصر ومتعلم فى «شيستيم» غير مصرى.. وكأن ضحايا التعليم المتدنى تلاميذ فقط..
المهم، لم ينته الأسبوع الثانى إلا وشاهدنا على شاشات التليفزيون المصرى الجولة الثانية للسيد الوزير وكانت فى مدرسة الخلفاء الراشدين فى حلوان..
والصراحة الصراحة الوزير كسبها بالضربة القاضية فى الساعة الثامنة صباحاً إلا خمس دقائق.. ضرب الحرس باب المدرسة ودخلوا ووسطهم الوزير.. البواب قال: حضراتكم مين؟.. أخد بوكس فى خلقته والبودى جارد اشتكاه للوزير وقال له معاليك الراجل ده بيسألنا إحنا مين؟ قام الوزير زعل جداً وقال له: «إنت عامل حقير ومالكش لازمة وممكن أضربك بالجزمة» ودخل سيادة الوزير على أول فصل وسأل التلاميذ: «مين يعرف يعرب (أضربك بالجزمة)؟» ماحدش عرف، سأل: مدرسين العربى كام واحد؟ قالوا له عشرين، قال يتنقلوا «فازوغلى».. ودخل على الفصل اللى بعده وسأل «خمسة فى ستة بتلاتين يوم» تساوى كام بالجذر التربيعى على سبعتاشر؟ العيال بلموا.. سأل: «مدرسين الحساب هنا كام مدرس؟ قالوا له تسعة وتلاتين قال يتنقلوا على «توكر»
وهكذا حدث مع باقى المواد.. الإنجليزى سبعتاشر والعلوم والكيمياء والفيزياء اتنين وتلاتين.. دخل دورات المياه لقاها وسخة لا مؤاخذة سأل عن حضرة الناظر لقاه متأخر ربع ساعة ولسه جاى مخضوض، مرمط بكرامة أهله الأرض ونقله مع المنقولين إلى «صفط اللبن» و«ميت ياعيش» و«الواحات البحرية» لأن هذه الأماكن تستاهل كل مطاريد الوزارة من أصحاب السوابق والفشلة.
والغريبة فى هذه الزيارة أنه كان يوجد واحد راجل من مرافقى السيد الوزير قاعد يقول له كل شوية فى ودنه «سيادة الوزير خف شوية عشان الهيبة».. مش سامع.. «معاليك الهيبة مهددة».. مش سامع.. «يا أفندم الهيبة هاتخلص».. معالى الوزير بعد ما كسب الجولة وهو خارج سعيد لأنه نقل «108» مدرسين وناظر وعاملين سأله: إنت كنت بتقول إيه؟ قال: ولا حاجة يا أفندم يخرب بيت اللى يزعل سيادتك.. قصدى معاليك؟ قصدى إشطة يا كابتن.