هم بيطلعوا إمتى؟ «6»

لم يرق لعفركوش أن يتم اختيار وزارة لحمادة عن طريق تنازل أحد الوزراء الحاليين، واستشعر أنه ربما تكون هناك مكيدة قد يكون وراءها الولد ده اللى اسمه حسين فهمى «ماهو ياما أخذ منه أدوار بطولة».. لذلك أصر عفركوش على أن ينزل للناس بنفسه فى المقاهى، ويتناقش معهم ومن ثم يختار لحمادة الوزارة المهمة لديهم..
وأمام هذا الإصرار وافق الكبير على أن ينزل معه وزير الثقافة وهمس لوزير الجباية: «بلاش إنت، الناس لو شافوك هيقطعوك»، واشترط أيضا أن ينزلا متخفيين من باب الاحتياط، ثم اتفق جانبا مع وزير الثقافة على أن يأخذ عفركوش إلى كافيه فى الفورسيزونز، حيث «حبايبنا كلهم هناك وهيقفوا وقفة رجالة».. ونزل عفركوش وركب السيارة بجوار وزير الثقافة، وأخذ يسأل السائق عن أسماء المناطق المحيطة.. وأثناء الحوار استرعى انتباهه «توك توك» يسير فى منطقة لاظوغلى، فأصر على أن يتركا السيارة هو والوزير ويستقلا التوك توك..
وبالطبع استشعر «دقدق» سائق التوك توك أن هؤلاء «زباين ثقال» فبدأ يتحاور معهم: «الباشوات رايحين فين؟».. فأجابه عفركوش: «خذنا على قهوة أدردش فيها مع الناس».. فأجابه السائق: «تدردش فى إيه لا مؤاخذة؟!».. فأسرع عفركوش وكشف عن حقيقته للسائق، وأفهمه أنه يريد أن ينتقى وزارة لابنه حمادة.. فرح «دقدق» السائق فرحة غامرة، لأنه تقابل وجها لوجه مع عفركوش بتاع زمان، وتمنى منه أن يأخذه بعد نهاية الرحلة ليتعرف بالعيال وأمهم.. وانطلق دقدق مسرعا بالتوك توك وهو يصيح: «وسع وسع لتوك توك الوزرا».. فنهاه وزير الثقافة بأدب: «بس! بس! كده هتفضحنا! هو مش عفركوش قالك إننا متنكرين؟!»،
فانطلق دقدق يصيح: «وسع وسع لتوك توك الوزرا المتنكرين».. ثم سكت قليلا وقال: «بس أنا رأيى علشان نجيب م الآخر إنكم تقعدوا مع حنفى زنهار، ده أحسن واحد هيدلكم على حال الناس والوزارات».. فاندهش الوزير: «وده يطلع إيه بقى سى حنفى زنهار؟».. فأجابه دقدق بثقة: «ده أخصائى طوابير.. والحكاية جت معاه صدفة ابتدت معاه لما جه يتجوز ووقف فى طوابير ابنى بيتك وبعدها طوابير الحديد والأسمنت، وأول ما حط رجله فى الشقة من هنا بدأت أزمة العيش من هنا وكان يدخل الطابور من دول ويقف من صباحية ربنا لا يطلع منه نفس ولا شكوى، يوم.. يومين.. شهر.. لحد ما عملوا منافذ التوزيع، يومين وبدأت بعدها طوابير الضريبة العقارية، وخلص طابور الضريبة من هنا وبدأت طوابير الأنابيب من هنا، وسبحان الله يا أخى بقى بيحب وقفة الطوابير لدرجة إنه حتى فى بيته بيفضل واقف على حيله مايقعدش أبدا..
الناس بقى لما لقوه غاوى الحكاية بدأوا يطلبوا منه يقف بدالهم فى الطوابير وياخذ اللى فيه النصيب.. وطابور هنا على طابور هناك مشيت البلية معاه واستقال من الحكومة واتخصص فى الطوابير».. فعلق الوزير باستهجان: «وهو حد عاقل برضه يستقيل من الحكومة علشان يسترزق من الطوابير؟».. فأجابه دقدق بتلقائية: «يا باشا وهى من إمتى كانت الحكومة حاسة بينا؟.. دى لعنت أبوالسيول على أبوالأنابيب على أبوالضرايب وسابت الدنيا تضرب تقلب وراحت تلعب عروسة وعريس»!..
ثم انطلق يصيح مرة أخرى: «إوعى الوزرا المتنكرين».. وفجأة توقف أمام أحد المقاهى فى إحدى الحارات بلاظوغلى، ثم أشار للوزير ولعفركوش بالنزول من التوك توك وطلب منهما أن يتبعاه ليعرفهما بحنفى زنهار، الذى يجلس فى الداخل، ونادى على صبى القهوة أن «ينزل أحلى سحلب وشيشة للوزرا المتنكرين»..
ونستكمل الأسبوع المقبل بإذن الله..