من سيد درويش.. للدكتور نظيف

الحلوة دى قامت تفْطر               مالقيتشى رغيف
والديك ينوّح كوكوكوكو             باردون يَانظيف
وحكومة عايقة وذكيّة                وميّه الميّه
وقعدة طريّة                          تحت التكييف
                                *** 
صبح الصباح فتاح يا عليم         والبيتْ مافيهشى ولا مليم
لا صحّة نافعة ولا تَعليم            فى الزمن الزَّيّف
يا مصر يامّه أنا فْ عرضك       حرست طولك مع عرضك
والعصبة دى سرقت أرضك       الطف يالطيف  
                                ***
 يا مصر يامّه الله يسامحك         ملامحى ماعادتشى ملامحك
النيل حداكى وفين قمحك           جاوب ياخفيف
لمّا المسائل قوى ماعت             والأرض بالمتر اتباعت      
الناس فى أرض النيل جاعت       فى الشتا والصيف
                                 ***
طول عمرى شقيان وباعافر      طبْ ما انتى عارفة الجوع كافر
أنا ح اركب البحر واسافر       أصطاد لى رغيف
ولو غرقت إبقى هاتينى          وف قلب حُضنك ضمينى
وبطلى عياط ووارينى            وبدون مصاريف
                               ***
القمح بيجى لْنا إعانة             واللقمة متعاصة إهانة
الشلة تلهط إلاّ أنا                 أنا أصلى عفيف
فبقينا فى العالم عبرة             خارج التصنيف      
والحلوة دى قامت تفطر          مالقيتشى رغيف
شفيق سلوم