إيه يعنى لما نضيع زهرة الخشخاش خدها حرامى نزيه غاوى لوح ببلاش! لوحة جميلة وعظيمة عند ناس نايمين تمنها مليار جنيه سرقوها الأوباش كاميرات مراقبة وحراسة واقفة ليل ونهار لكن الحرامى ذكى مالمحش صورته فلاش إذا كانوا سرقوا البلد أرض وشجر وبيوت يبقى هاتكتر عليهم زهرة الخشخاش قولوا للوزير (حسنى) بيسلم عليك (فان جوخ) ميت وأعماله لسه فيها نبض وروح وبيسألك انت ليه لو حتى كانت عندك وليه تسيب متحفك فيه ألف باب مشروخ؟ وبيسألك امتى ترسم لوحة للبانجو وعسكرى كرشه واسع فيه شوال بطروخ؟ وامتى ترسم ولد مضروب لحد ما مات وشه مكسر وجلده من العذاب مسلوخ؟ اللوحة لو تتسرق أهون من الأصوات اللى خدوها النّور ودوها للباشوات ووصلوا للمجالس كل حوت وأخوه سارق وناهب ومتعود على الإتاوات إذا كانوا سرقوا البلد أرض ومبانى وغاز! حتى اليهود بقى لهم على مصر امتيازات! إيه يعنى لوحة تضيع ولاّ تضيع لوحتين ولا تضيع البلد ونبيعها للخواجات! حرامى غلبان وشايف السرقة ليل ونهار سرقة أراضى ومصانع والعة زى النار نشن على لوحة لا بتاكل ولا بتشرب حياالله برواز ومتثبت على المسمار ولا ألف مصرى غرق بسبب غياب لوحة ولا ألف عامل قعد زى المدام فى الدار يا إخوانا ليه زعلانين على زهرة الخشخاش ومصر على بعضها لعبنا بيها قمار سيد أحمد الهمشرى- الإسكندرية [email protected]