عايزين مصر ترجع زى زمان

ليه فى مصر ناس زعلانة منها وواخدة على خاطرها؟ ليه معدش حب مصر فى قلوبنا زى ما كان فى قلوب آبائنا وأجدادنا؟ عارفين ليه؟ علشان مصر معدتش بتعدل بينا لا فى الحقوق ولا واجبات.. ناس واخدة كل الحقوق وزيادة وناس تانيين بس عليها تدفع الفواتير وتتحمل الأعباء وتشد الحزام طول الوقت..
ناس واقفة على جبل الرفاهية عايشة حياة الخمس نجوم بلا سبب ولا مبرر سوى أنها محظوظة أو مسنودة أو عارفة من أين يؤكل الكتف أو بتوصلّها المعلومات والأخبار قبل غيرها أو بتجيب إعلانات الوظائف البراقة ليها ولأولادها وحبايبها- وناس طافحة الكوتة «غير كوتة الستات فى مجلس الشعب» علشان تعيش بس يا دوب تعيش وتظل فقط على قيد الحياة تلهث طول الوقت تدفع الضرائب والتأمينات وتتجند عند أول إنذار أو غرق عبارة أو حادثة طريق أو التهاب كبدى وبائى أو نتيجة قمح مسرطن..
أوكازيون من خيارات الموت مطروح على فقراء هذا الوطن. ماعدش فيه حد بيتكسف من الفساد والواسطة والمحسوبية عينى عينك واللى مش عاجبه يشرب من البحر.. زمايل متخرجين من نفس الكلية وبنفس التقدير واحد يذهب إلى واحدة من شركات الوجاهة أو المؤسسات ذات المقام الرفيع حيث الراتب والحوافز أربعة وخمسة أرقام ومصايف وعربيات وسفريات والثانى يبيع أمشاط وفلايات على قهاوى شارع الألفى وسليمان أو يبيع ساندويتشات أو بالكاد مندوب مبيعات يلهث فى الشوارع والحارات! ليه يا مصر يا اللى طول عمرك مهما ظلمتى بتعدلى؟!
ليه دلوقتى انحزتى للظلم وكرهتى الغلابة وضربتى القيم والعدالة بدل القلم قلمين؟
عايزين مصر ترجع زى زمان لطيفة وحنينة تنحاز للمتفوقين والموهوبين والشرفاء والبسطاء والعيانين وبلاش يا مصر تراهنى على مجموعة من الطماعين اللى عايزين ينهبوا كل اللى فيكى ويحولوا نهرك العذب إلى ملح أجاج وواديك الأخضر إلى مزرعة شوك وأحقاد وأبناءك النبلاء إلى شخوص مسكونة بالهم والأحزان ومدفوعة للضياع والانتقام!
كمال الدين حسين الشريف
مستشار إعلامى