إصحى يا مصرى

إصحى يا مصرى عشان ما تعيش           أوعى تغيب وتروح ما تجيش
لو رزقك جالك ولّا مفيش                     قول للراحة ما تلزمنيش
لازم تبدأ شغل اليوم                          ح تجوع أو تاكل ولا تصوم
يبقى تصحى تقوم م النوم                       إعمل حاجة زمجر زوم
والديب بياخد ما بيديش                    وعمر الديب ما يكون درويش
وافتكر إن انت كمان محروم                  قوم يا مصرى وصحى النوم
مش عايزك تفضل ف البدروم                وتفكر مرة وتطلع يوم
والجو ملبش كله غيوم                        وإن سكت تعيش مهموم
نور الشمس طلع علشانك                    قوم إتلحلح صلح حالك
واللى ما يخطر يوم على بالك             عمر المصرى ف يوم ما يهون
قوم ودق الباب بالهون                   وبلاش تنعق زى البوم
 
وافتكر إن انت كمان محروم                 قوم يا مصرى وصحى النوم
عندك زوجة وبيت وعيال                  والعيشة معاك على قد الحال
وياما الاكتاف بتشيل أحمال                 وعشان ما يكون الرزق حلال
إجرى بسرعة ولا تمشيش                  لحق روحك إصحى وعيش
وإذا سألت ما تسألنيش                      يمكن حظك يضرب شيش
ولا ترجع تانى تشيل ف هموم               ويبقى بكرة أحسن م اليوم
واوعى تنسى إنك محروم                   قوم يا مصرى وصحى النوم
نبيل عبدالعزيز