مسحراتى مصر البهية .. سبع صنايع

اصحى وسبح رب البرية
مشيت ارتل وانشد واجود
وصوتى يجرى بين النواصى
هنا بانقر.. هنا باعود
هنا بحود عن المعاصى
لو كنت بحرى
لازم أقبل
وإن كنت قبلى.. لازم أبحر
ولحد آخر نفس ف صدرى
هاشد قلبى وتر واسحر
يا مصر قومى وشوفى نيلك
يا مصر قومى وضمى سينا
نهر المحبة بينتمى لك
يا مصر شوفى احنا فين رسينا
مصر البهية.. بالعقل هي
ف الذكر آية.. ف العشق غية
اصحى وسبح رب البرية..
■ ■ ■
مسحراتى وعرضحالجى
وساعات منادى.. وساعات إشارجى
وساعات ساعاتى
وساعات فرارجى
وساعات ناياتى.. وساعات فطاطرى
وليه يا دنيا ما يقومش قطرى
خليكى حلوة.. ولجل خاطرى
خلينى أحيا زى الجميع
■ ■ ■
أنا اللى بانى أصل الحضارة
آخرتها عقلى يدخل مغارة
وليه يا دنيا عاملالى غارة
دا أنا ابتعادى عنك يضرك
وقربى منك لازم يسرك
طب ليه يا دنيا تسقينى مرك
وتعيشينى زمن فظيع..
وليه يا دنيا ما يقومش قطرى
خليكى حلوة.. ولجل خاطرى
خلينى أحيا زى الجميع
■ ■ ■
سبع صنايع.. مبدع روايع
عندى ف بنك التاريخ ودايع
وذهنى حاضر.. ليه بختى ضايع
ليه عودى مايل.. وفرعى دابل
وسنينى رايحة من غير مقابل
وغيطانى خايفة من السنابل
ونسايمى خايفة من الربيع
وليه يا دنيا ما يقومش قطرى
خليكى حلوة.. ولجل خاطرى
خلينى أحيا زى الجميع
■ ■ ■
مواهبى تظهر لما باهاجر
إن كنت عالم أو كنت تاجر
وف بلدى.. أصرخ.. تدوب حناجر
ولما أحب أفرد قلوعى
الريح تصمم على رجوعى
والقى اللى يكسر قلبى وضلوعى
ويطفى أملى.. سريع.. سريع
وليه يا دنيا ما يقومش قطري
خليكى حلوة.. ولجل خاطرى
خلينى أحيا زى الجميع
■ ■ ■
مسحراتى ف الذكر هايم
والنسمة حلوة ولا حد نايم
والكل صابح معانا صايم
ف الفجر يدعى ويقول يارب
رمضان يا أكرم م الشمس ذاتها
أرواحنا عندك تبدأ حياتها
والنفس راضية تلحق ما فاتها
تطلب هداية وتقول يارب
المصرى بنا وفلاح وجندى
وعندى جامع.. وكنيسة عندى
الرحمة من دا.. والحب من دى
ومن قلوبنا بنقول يا رب