الحب.. وسنينه

■ كتبت اسمك.. ع البيبان.. ع الحيطان.. على جذوع الشجر.. نقشته حفرته.. حتى على الحجر.. فى كل حتة رحتها.. أمنتها.. حلفتها.. تحفظ حروف اسمك.. م الضياع.. حافضل شاريكى.. حتى لو الكل باع.. ما هى دنيتى هنا.. بين إيديك بسمع تغريد البلابل.. بيناديك.. حبى ليك.. مش كلام.. حبى ليك.. هو الغرام.. حبى ليك.. هو اللى خلانى شاعر.. وانتى بالنسبة لى.. كل معنى الرقة.. والمشاعر.. لكن بعتذر لك.. واعترف.. إن أكبر غلطة ليكى.. إنك حبيتى شاعر.
رأفت محمد السيد رمضان
raafat.1963@gmail.com
■ قد تمر الأيام.. وتأخذنا السنوات.. وتنسينا الأشياء.. ولكن لتعلم دائماً.. أنك فى قلبى قبل عقلى.. فلا تتصور أنى نسيتك.. ولكن هذه هى الدنيا.. فسامحنى!
مروة رسلان - المنيا
محررة صحفية
■ عصفورتى دوما تذكرنى.. بموج بر وأنفاس الرياحين.. وشجرة الحب مازالت بمنزلها.. تهدى شذاها من فل وياسمين.. إن فاض بى شوق لرؤيتها.. بعثت إلى بكلمات فترضينى.. وترسل النسمات من شط إلى شط.. مصحوبة بعذب القول يشجينى.. وإن بعدت وأضنى قلبى الشجن.. عهدتها تدنينى فتسلينى.. يا ابنة الشطين عذرى فى محبتكم.. أن الفؤاد بلقياكم يرجينى.. وإن عطشت فلا قطر ولا مطر.. ولا كل نهر بهذا الوادى يكفينى.. إلا رضاب قد بت أنشده.. شهدا مصطفى يسقينى ويروينى.. رفقا حياتى فالبعد أمرضنى.. لعل قربك منى يداوينى ويشفينى.. يا رب قرب على خير تلاقينا.. فالصبر قد طال والأشواق تضنينى.
رفعت محفوظ- الإسكندرية
ahmdrft2@yahoo.com
■ حكاية حبيبى معايا إيه.. قولى بس أعمل إيه.. حيرتنى دوبتنى غيرتنى بس أعمل إيه.. بحبك وانت عارف حبى لك أد إيه.. ليه تآسى عليا وتخاصمنى كده ليه.. سهرتنى ليالى طويلة ومش عارف أعمل معاك إيه.. تعالى ارجع لقلبى اللى ادالك الحنين.. تعالى رجع لحبى ونعوض السنين.. فاكر أيامنا الحلوة وانا إيدى دايما فى إيديك.. وقلبك كان ينادينى وأنا برد عليك.. وانت عارف يا حبيبى حبى دايما ليك.
محمد طوبار
قنطرة شرق
■ من وسط كل بنات الكون، اخترتها هى.. حبيتها حب العاشقين، والحب دا غيه.. عينيها فيها صفاء النيل، خدودها خمرية.. وشعرها أسود طويل، وموجة بحرية.. تمشى تدوس كل القلوب، ولا أحلى جنيه.. لكن الحياء فوق رأسها تاج، أخلاقها شرقية.. بحجابها محمية تمشى تطوف وسط الألوف.. فيها الشروق فيها الغروب، ملتزمة عصرية.. أهم حاجة عندها، تربى ذرية.. ذرية تورث منها، سلامة النية.. تعيش تموت وقلبها، مليان بحنيه.. عشان بلدها تصرخ تقول، «أفديكى بعينيا».. «وأديكى من ولاد ولادى، بدل الشهيد ميه».. ولا من فرنسا ولا إيطاليا، ولا حتى روسيه.. من وسط كل بنات الكون، حبيبتى مصرية.
محمد يونس - القاهرة
eng_younis90@yahoo.com
■ فالح تحب وخلاص.. وتسبل وتسرح.. وتعمل فيها ملك الإحساس.. وتتمشى ع الكورنيش.. إيدك فى إيدها.. وعيونك تغازل عيونها.. قدام اللى رايح واللى جاى.. وتقولها تراهنى أصرخ.. أقول بحبك قدام كل الناس.. ولما تقولك بابا عاوز يشوفك.. تبقى فى نص هدومك.. وتقول يا ريت قلبى فى السكة.. دى ما مشى.. كنت ناقص وجع راس.. وتحتار تقولها إيه.. وتهرب منها.. طيب بكره.. طيب بعده.. يووه هو ده وقته.. وكل يوم بحجة.. وتضحك على نفسك وعليها.. وتيجى تلمسها.. تهرب من إيدك إيديها.. وتقولك ما تستاهلش.. كنت فاكرة إنك صادق.. كنت فاكرة إنك ما بتكدبش.. وتبقى واقف مش عارف تعمل إيه.. غير إنك تشوفها ماشية.. ومهما تنادى متجاوبش!
أحمد صلاح محمود
ahmedsalah124@yahoo.com