أوجاع مستعصية

(1)
«يا طبطب يا دلع»
حزب الوفد ولع
الناس ع تشرب فقر
روبى عماله تتدلع
ليلة غرق العبارة
وطنى حامل ع يرجع
عمر أفندى اتخطفت
أمى عماله تتوجع
أبويا مات ع البرش
وما حدش عارف امته جنازته هاتتشيع
أنا حلقى ترعة شيح
قلبى ورقة ع تتمزع
لكن مشى وباغني
«يا طبطب يا دلع»
حزب الوفد ولع!!
(2)
احنا شبه السنط
والسنط يشبهنا
لو فى عز السقيع والصهد
تبص فيه
ها تلاقى صمغه
يشبه لدمعتنا!!!
(3)
مستوطنة ع تقول للمخيم
«أخدت أرضك
وشردتك
وبنيت صروح يفرش عليها الإله
ويناااااام»
رد المخيم وقال:
نسيتى يا حبيبتى
إن اللى مالوش شهادة ميلاد
يبقا ابن حرام!!
(4)
لما طليت فى ضلى
لقيت معوج ومايل
سألت الفجر
وشوشنى قالى:
إتعدل
يصير الضل هايل!!
(5)
مش هيشغلونى فى البورصة
ولا هاكون مذيعة ربط
ولا إن وقفت على رأسى
مش هيدخلونى فى الشرطة
ما أنا أصلى ف نظرهم
ما أساويش شَرطة
ف طبيعى
مش هاكون ظابط فى الجيش
ولا هاحلم أدخل السفارات..
ما أنا أصلى بيئة
وتعليم مجاني
وأنا مش خريج مدارس لغات
(6)
إتلم
وبطل نخوره وتقليب
وسيب الغربان
تحوم فى الخرايب حره طليقة
دا إبراهيم
عشان مسك فاسه
وكسر الأصنام
وكشف للناس الحقيقة
إتشال واتحط العتاوله
وما هديوش
غير لما رموه
فى قلب قلب الحريقة!!
(7)
من كام سنة
وإنت ع تبيت فى عشى؟!
من كام سنة
وإنت ع تلون فى وشي؟!
من كام سنة
وأنت لى عزرائيل
ف يا إما تقتلني
يا إما تمشى؟!!
(8)
ناموسه
دايره ف برطمان
والبرطمان مغلوق..
لو تحاول
تطلع رأسها ل فوق
هاتكسر رأسها الحقوق..
لو تحاول
ترفس برجليها
هايعصرها فوق
فى بطن البرطمان ملزوق..
لو تحاول تاخد نفسها
وتسرح فى أحوالها
ها تلاقى بالها
من كتر الهموم محروق..
ناموسه وقالوا لها: أنتى حره
وحطوها ف برطمان
بس البرطمان
مغلوق!!
شعر : ماهر مهران
أسيوط
عضو اتحاد كتاب مصر
فاز بالجائزة الأولى لشعر العامية المصرية التى نظمتها جريدة أخبار الأدب عام 1998
له ستة دواوين شعرية