المشاغبون .. حالة مصرية تجنن

كلام فى العضم
اللجنة مدت ليوم تالت علشان "الجماعة" تبقى طالق بالتلاتة !!
فزورة
حد يعرف ليه اتكتم البرادعى ومفتحش بقه بكلمة واحدة عن الانتخابات ؟ اللى يعرف يبعت تويتة !!
بخ
الذين ضربوا كرسى فى كلوب العرس الانتخابات...
حملة السيسى.. اللجنة العليا للانتخابات .. الحكومة ...
الإعلام .. الفلول ... السلفيون...وأخيرا "حملة حمدين"
الله يرحمك يا بنت عمى !!
أحمد السعيد
هتف عم مدبولى القهوجى متنهدًا بعد حسابه المغبون لأحد زبائن القهوة المتعبين: ولا يوم من أيامك يا مبارك .. انت كنت صح بس إحنا اللى كنا حمير ومش فاهمينك.. أطلق سعداوى الهلب عضو المجلس المحلى الأسبق نفسا عميقا من معسل شيشته القص كان قد أسكنه فسيح رئتيه وكتمه قليلا ثم أطلق له العنان عبر فتحتى أنفه الواسعتين ليقول متصعبا: إييييه ... الله يرحم أيامك يا فخامة الرئيس مبارك.. يا صاحب الضربة الجوية يا متصيت.. يا للى فتحت بإيدك باب الحرية وأيامك كانت وردية يا عترة الرؤساء يا بو الجدعنة.. هو فيه زى أيامك الحلوة وقرشها الحاتى ؟!! ولا الاحترام اللى كان موجود للناس المهمة ؟ ولا الأمن والأمان اللى كنا فيهم أيام ما كان كارنيه الحزب الوطنى بطاقة وأحسن م البطاقة كمان !! الله يخرب بيت الشباب الثورى وبلاويه واللى بيجرى على إيديه .. ضحك الرجل العجوز عم هنداوى الطحش بمرارة قائلا: الله يرحمك يا بنت عمى ثم تكلم أحد الشباب ذوى الدماء الساخنة والذى لم يعجبه هذا الكلام الماسخ بطبيعة الحال: لعلمكم بقى يا عم مدبولى انت والأخ سعداوى الهلب مع احترامى الكامل لحرية الرأى إلا إن كلامكم بالطريقة دى عن مبارك وأيامه السودا اللى كانت أس البلاوى يعتبر خيانة كاملة لدماء الشهداء الأبرار الذين سقطوا منذ 25 يناير 2011 ومازالوا يسقطون حتى الآن انتم عارفين كده ولا لأ ؟!! مدبولى القهوجى بلا مبالاة مع تشويحة من يده: يا عم صلى .. وسمعنا سكاتك أحسن والنبى .. أما سعدواى الهلب فقد قال غاضبا : ياعم اقعد لنا على جنب بقى بلا خيبة فلقتونا .. انت هاتخطب !! ليضحك عم هنداوى الطحش مرة أخرى بمرارة أكثر قائلا نفس عبارته الأولى: الله يرحمك يا بنت عمى !! وفى هذه اللحظة يلتف حوله جميع المتحدثين إضافة إلى زبائن القهوة ليبادره الشاب الثورى قائلا إيه موضوع بنت عمك دى يا عم هنداوى وماتت امتى ؟ وإزاى ما تقولناش يا راجل انت !! علشان نعمل معاك الواجب وناخد بخاطرك .. وأهى حاجة تلمنا كلنا بدل ما احنا عمالين ناكل فى بعض كده بدون فايدة .. عم هنداوى موضحا: لا يا جماعة أنا بنت عمى وعمى نفسه بألف خير ربنا يديهم الصحة لكن الجملة دى كان دايما يقولها واحد غلبان حكايته منيلة بنيلة زى حكايتكم كده بالزبط تحبوا تسمعوها يمكن تتعظوا ؟! الجميع فى نفس واحد: احكى يا راجل شوقتنا .. هنداوى الطحش: كان فى راجل فلاح غلبان ومسكين وعلى باب الله وما طلعش من بلدهم لحد المركز حتى طول عمره .. قام أبوه حب يتطمن عليه قبل ما يموت وقال لازم أجوزه، وساعتها ما لقيش أنسب من بنت أخوه يجوزهاله مع إنها كانت هبلة وحمارة وأم بدوى كمان على رأى المسرحية المعروفة، المهم صاحبنا اتجوزها واتدبس فيها وكل ما يرجع من الغيط يلاقيها خابزاله عيش قعره محروق ومهبب يقولها إيه دا يا بنت عمى ! العيش قعره اسود كده ليه ؟ تقول له: أصل قعره محنى، وبعدين يجى يشرب من القلة يلاقيها بتزن جامد وميتها سخنة لأن صاحبتنا من خيبتها رامياها طول النهار فى الشمس ويادوبك بتملاها أول ما يجى من الغيط، يقوم يقول لها: القلة دى بتزن كده ليه يا بنت عمى ؟ تقول له: أصلها بتغنى فى ايديك يا ابن عمى .. يقوم الغلبان يشرب وهو آخر انسجام، بس عنها وفى يوم من الأيام ماتت بنت عمه الخيبانة الضلالية دى وبعد سنة اتجوز عليها من المركز واحدة شاطرة ولهلوبة وميت فل وأربعتاشر، بس مشكلته إنه كان يجى من الغيط يبص للعيش اللى خبزته يشوف قعره حلو وزى الفل يقوم ماسك القلل يلاقى ميتهم ساقعة وآخر جمال، يقوم الموكوس قايل إيه فى وش مراته الجديدة: الله يرحمك يا بنت عمى من ساعة ما متى والواحد لا بياكل عيش قعره محنى ولا بيشرب من قلة بتغنى !! لحد ما الولية الجديدة فاض بيها قامت سألت الجيران عن ضرتها المرحومة كانت بتعمل إيه عشان يحبها الحب دا كله ؟ ولما عرفت السر بقت تلقح القلل فى الشمس طول النهار وجابت بت صغيرة بتتعلم الخبيز لسه وخلتها تخبز العيش بتاعه أبو قعر مهبب، ولما صاحبنا رجع من الغيط ولقى النظام القديم بكل مساوئه اللى عاش وكبر عليها رجع تانى، بقى يحب مراته الجديدة ومابقاش يجيب سيرة القديمة خالص عرفتم بقى الموضوع ؟!! الشاب الثورى غاضبا: الله يجحمها مطرح ما راحت عودته ع الوحش لحد ما فسد ذوقه وما بقاش يجد أى طعم للحلو لما يلاقيه بينما تصعب مدبولى وسعداوى قائلين: الله يرحمك يا بنت عمى !
حمدين.. الوطن والإنسان
بقلم/ محمد حسين الشيخ
نعيش بين فكين يقبضان على واقعنا المجتمعى وفى القلب منه السياسى، أولهم يثور لمشاعره التى قد تخضع لأهواء نفسية متطرفة، ولاتراعى الهدف من وراء مفهوم الثورة الداعى إلى إقامة وطن العدل والحرية والكرامة "المتماسك"، والآخر يقمع أى دعوات "إنسانية" ويعتقل أى دعوة للخلاص من كل ماهو فاسد بزعم الحفاظ على تماسك الوطن.
وحده دون غيره من الساسة، قاوم ومعه المخلصون هذه "الكماشة"، واجتمع فيه الإنسان الحالم صاحب المشاعر، ورجل الدولة الذى يقدس الحفاظ على الوطن.
لحق بركبه الكثير، وقفز من سفينته آخرون، بقى معه من بقى وانضم له من انضم، وهو ثابت فى مساره الوطنى الإنسانى، قد يميل مرة إلى اليمين وأخرى إلى اليسار، تارة ينظر إلى الخلف ليستعيد القيمة، وأخرى يتطلع إلى الإمام ليطلب الحداثة والتقدم، لكن دون توقف عن السير فى طريقه إلى الهدف العظيم، الأمر الذى قد يعطى الفرصة للحاقدين والكارهين للى الأفعال والأقوال وتوجيه سهام الغيرة والغلِّ تجاه وجه الرجل البشوش، الذى ماشهدته يكره أحدا حتى أعداؤه، يهاجم جميع الفسدة بمنطق المحب الذى يريد الأفضل، ولكن ذنبه ذنب أى معتدل متسامح نقى غير قابل بالظلم والفساد، يتهمونه تارة بالنفاق، وأخرى بالمتهور الذى يعرض وطنه للخطر.
حمدين صباحى، هذا الناصرى، يعشق الحرية كما يعشق استقلال الوطن وهيبة الدولة، يذوب فى حب الفقراء دون أن يحقد على أصحاب المال، وكل ما يطلبه العدل بينهم.
موقف الرجل التاريخى مساء 27 وفجر 28 مايو، يدل أننا أمام شخص يرى اللحظة الراهنة بقدر ماينظر إلى المستقبل البعيد، احترم تضحيات شباب حملته وفضح بشراسة ماحدث من انتهاكات وقمع ضدهم، وصل للضرب والسحل والإحالة للنيابة العسكرية، ومنع تصوير انتهاكات شابت انتخابات الرئاسة، وتوعد بالنضال من أجلهم ورد مظالمهم التى تعتبر سبة ووصمة عار على جبين نظام قمعى لم يرحل عن مصر، ويطل بشكله الجديد ليواصل فساده، قرر حمدين سحب وكلاءه من اللجان لرفضه المطلق تعرضهم للإهانة، ولم يستجب لدعوات الانسحاب من الانتخابات لكى يجنب مصر مواجهة دولية قد تعرقل مسيرتها التنموية.
المنافق فقط من يستطيع إرضاء كل الناس، أما أصحاب المواقف فدائما لديهم أعداء، قرر حمدين إغضاب الكثير من أعضاء حملته ومؤيديه، وضيع على نفسه فرصة الانسحاب المشرف، لإدراكه بحجم الحملة الإرهابية الشرسة المدعومة بقوى دولية تناصب مصر العداء، والتى ستستغل الموقف لشن مزيد من التشويه للدولة.
سيشهد التاريخ أن حمدين أنقذ قيمة الديمقراطية ومكتسبات الثورة، ولم يرض أن تعود مصر لعهود الاستفتاءات، وقبل جسورا أن يخوض الانتخابات ضد شخص سُخّرت من أجله كل الإمكانيات، من إعلام يملكه رجال أعمال يكرهون العدالة الاجتماعية التى توعدهم بها حمدين، وأجهزة دولة تدرك حجم الفساد المتغلغل بداخلها وتخشى طهارة يد حمدين، ومؤسسات أمنية تخشى قيم حقوق الإنسان والحرية التى يحمل لواءها حمدين.
تحَمّل حمدين غدر رفقاء طريق تعبوا من السباحة ضد التيار وقرروا اعتزال قيمهم، من أجل نيل قسط من الراحة فى أحضان السلطة، وأحزاب وشخصيات لم تمتلك تاريخه ولا شعبيته غارت منه فقررت أن تدعم منافسه، مقتدية بقول الشاعر "إذا مت ظمآنا فلا نزل القطر".
نعم تحمل حمدين وواجه كل ذلك وتجاسر ونزل ملعب الانتخابات للتأكيد أن هناك ثورة قامت ولابد أن تكتمل، قد تخسر جولة وتفوز بأخرى لكنها بالتأكيد ستنتصر.
منذ قيامها فى 25 يناير، وهى تنقِّى نفسها من نفايات الإخوان، وفلول "مبارك" المقنّعين مدعى الثورية، لتبقى نقية فتية متوحدة وعلى رأسها حمدين، كانت تبحث عن قائد واليوم فقط أستطيع أن أقول إن الثورة وجدت زعيمها.
رسايل حلمنتيشى
يا جرحنى بلقمة ناشفة
والعيش عندك طرى
احدف لى نص شقة
تقلان عليا ليه
متقولى فيه ايه
ارحمنى يا مفترى
يعنى انت تاكل لحمة
والفول نشف معدتى
اجرى ف شارع زحمة
اقول يادهوتى
نفسى فى ورك فرخة
اقعد امصمصه
أكيد ححس بفرحة
وبابى حتربسه
ياجارحنى بلقمة ناشفة
وعندك عيش طرى
طلعت فوق السطوح هز الهوا كمى
كل العيال اتجوزوا وانا لسه جمب أمى
يا حبشتكة يا حبشتكة القلب من الحب اشتكى
يوم دمع و حزن ويوم فرح وهشتكة
محدش بيحبك . محدش محتجلك . محدش بيفكر فيك . عارف
أنا مين ؟ . انا محدش
حبيبى يا ناس حلقلى وسايق ف التنفيض
قلوله يرحم قلبى وميعملش فيها عبيط
كان بينا شوق ومحبة راحت بلوية بوزك .
الله يحرق المحبة ويحرق اللى يعوزك
الواحد ممكن ينسى همه ! و ممكن ينسى ورد شمه!
بس لا يمكن ينسى حبيب طلع عين أمه
اللى يشوفك يفتكرك فارس ف ساحته
ميعرفش انك حتى الشراب شاحته
حبشوش محبوش طرطم مرطوش فسخ فسيخ جطسطو سجسطا
زى الأهبل تقرا أى حاجة
يا روش وآخر روشنة يا طبيعى من غير تنشنة
عيش عالناس كلها ومتعش عليا أنا
يا ملقح جوا ف قلبى وأنا قلبى مش متين
حالة مصرية تجنن
ليه لما بنضحك نعيط
- محمود سيد
كثيرا مايبكى المصريون ومن أشد العجب أن تسمع عبارة اللهم اجعله خير إذا ضحك المصرى فلعله يخاف من مجهول دائم . حالة تعيش مع الألم بل وأيضا التغنى به ومنه وعليه فالزوجة التى تبكى رحيل محبوبها إلى السماء لاتغفل مع الوجع أن تنشد فيه شعرًا أو نثرا ببلاغة كبيرة، تتفوق فيه على أهل الأدب والشعر.. ففى الصعيد تسمع زوجة تقول على القبر مت يا إبراهيم ياما التراب لمام... وبعد الرحى ياغالى الدنيا تساوى – أو تسوى كام.. ولعل مقابر الصعيد فى مصر صارت ساحة للإبداع فيما يكمن ان نطلق علية فن التعديد – أو النحيب.. والذى يوازيه فى تصنيفات علم البلاغة فن الرثاء لكنه يختلف عنه بقوانين شعرية خاصة وقواعد سفهية غير مكتوبة بل هى وليدة اللحظة.. بل لعلنا من بين شعوب قليلى تبكى حتى عند الفرح البكاء صورة تعبيرية عنألمنفسى، وحزن فى قلب الإنسان، وهو طريقة من ألوان التعبيرالمادى، والبكاء يندرج تحت فن من فنون الشعرالعربى، وهوالرثاء الذى يعدمن أبرز الموضوعات فى الشعرالعربى بعامة والشعرالجاهلى بخاصة، لأنه يرتبط بظاهرة الموت التى تعد من الظواهرالإنسانية التى شغلت عقول المفكرين والأدباء والفلاسفة على حد سواء من قديم الزمان .
ومن الحقائق التاريخية المسلّم بها أن الأمة العربية احتفظ تعبر تاريخها الطويل بتراث ضخم من المراثى ومعظم هذه المراثى التى وصلت إلينا تميزت بصدق العاطفة وحرارة اللوعة، ولاسيما التى تقوم على صلة الرحم ورابطة القربى أهمها الزوج والزوجة والأم مع ولدها أو العكس تماما واصعبها فقد الابن صغيرا فى الصعيد لأنه يفجر طاقات الحزن التى تجمع بين الراثى والمرثى فكلما دنت القرابة بين الشاعر وبين المرثى ازداد الرثاء حرارة وتفجعًا وحسرة مثا ما يحدث فى صعيد مصر تقريبا على مر التاريخ بل سجلت البرديات المصرية القديمة حالات متعددة من تلك المراثى بحسب تصريحات للبوابة خصنا بها الكاتب محمد أبو رحمة، خبير المصريات.
والغربيب جدا أن تتشابه مرثيات الشعر الجاهلى فى العمق مع فن التعديد فى مدينة كسوهاج بصعيد مصر وليس غريبا إذا عرفنا أن ارتباط الزوجة بزوجا إلى حد الجون وصفة الشاعر عبد الرحمن الأبنودب فى قصيد القط أحمد عبد الغفار الشهيرة جدا، وهى تكاد تكون مرثية بين اموات لمجرد ان زوجها ذهب للعمل فى أسوان مفارقا مدنية، قنا وبين المدينيتن ما لايزيد عن 200 كيلو متر أو أكثر قليلا، ولعل الأشعار فى الحقبة الجاهلية من أفضل أشعار العرب وأجودها وقد أفصح أحد الأعراب حين سُئل " مابال المراثى أجود أشعاركم ؟ فقال : لأننا نقول وأكبادنا تحترق نفس التعبير الحرفى فى استخدام كلمة كبد فى لهجة الصعيد عموما، بل الكلمة صارت رمزا للمكابدة، واستيعاب الأحزان بطريقة صعبة جدا مثل تعاطى السم، وأشهر التعبيرات الصعيدية كبدى عليك ياولدى مت ياما التراب لمام وهى عبارة لسيدة صعيدية فقدت ولدها الصغير وهى ترثى رحيله. وقد كان للمرأة حضور ومشاركة فى هذا اللون التعبيرى، وساهمت إسهاما فاعلًا فى إثراء ديوان العرب بهذا الفن الشعرى المتميز ولعل السؤال لماذا برعت سيدات الصعيد فى فن البكاء، والتعديد لسبب بسيط وهى غالبا ما تعيش بعد موت زوجها وهى التى تكفنه ولذلك تجد أعياد مدن الصعيد المصرى تتم غالبا فى المقابر، حيث ترى الزوجة تذهب لزوجها يوم العيد ثم تجلس تروى شهادات وأحوال أسرتها بعد موت الزوج بل وتقول له مثلا بنتك جاء لها عريس زين وأنت موافق عليه لو عاجبك تعالى لى فى المنام وغالبا ماتلعب أحلام البسطاء فى الصعيد دورا مهما فى تواصل الزوج مع زوجته وكأنه على قيد الحياة شىء أغرب من الخيال فعلا، وربما يكون ذلك الفن من طبيعة المرأة الوجدانية، وتركيبتها النفسية، بوصفها أكثر ميلًا للحزن والأسى والبكاء على فقدان الزوج خصوصا فى ريف مصر عموما
مبروك للسيسى.. مصر أمانة فى رقبتك يا رب تكون قدها
التوقيع:
مواطن شارك فى ثورة يناير اللى رفعتك من لواء لفريق لفريق أول لوزير دفاع لمشير لرئيس جمهورية، وكان بيروح الميدان وبيسهر فى اللجان الشعبية
مواطن شارك فى كل الاستحقاقات الانتخابية السابقة (ما عدا الشورى) وعمره ما صوت لإخوانى
مواطن نزل فى أغلب الفعاليات فى الميدان لحد ما تم تحديد موعد لانتخابات الرئاسة
مواطن نزل كل المظاهرات والفعاليات ضد مرسى والإخوان اللى خانوا الأمانة
مواطن كان ضد انتخابك ونزل صوّت للمرشح المنافس اللى كان شايفه أفضل لمصر منك وهو عارف انك هتكسب
مواطن هيفضل ملتزم بالقانون والدستور وضد كل الممارسات اللى بتمارسها أجهزة الدولة خارج إطار القانون والدستور
مواطن هينزل ضدك لو خنت الأمانة
مواطن ما بطلش يشتغل يوم واحد حتى فى أيام الاعتصامات
مواطن شايل فى قلبه وفوق راسه جميل كل شهيد زرع الأمل جوانا وحطنا على بداية الطريق
تحاليلى يا مصر
تحليل بسيط للى حصل خلال 3 سنوات.. ثورة قامت ضد مبارك الفاسد من حوالى 100 ألف شاب.. اتحولت بعد كام يوم لملايين وانتهت بأكثر من 20 مليون فى الشارع يوم التنحى.. الثورة فى أوج قوتها.. الشعب يعقد الآمال على الثورة والثوار يبالغون فى الوعود والأيام الوردية المقيلة.. ركاب الثورة من سلفيين لفلول مقنعين..الثوار يتفرقون..الإخوان يزدادون صلابة.. الإعلام يبالغ فى قوتهم..الصفقة مع مجلس طنطاوى وعنان..ينجح الإخوان والسلفيين فى حصد أغلب مقاعد مجلسى الشعب والشورى...الثورة تزداد تشرذما فى انتخابات الرئاسة وطمعا "أبوالفتوح" بعد إزاحة خيرت الشاطر وحازم أبو إسماعيل يسقط حمدين.. الشعب يعصر الليمون وينتخب مرسى وشفيق.. الإخوان يحكمون.. انسوا الثورة والمجد للجماعة.. سنتين بعد قيام الثورة وعام من حكم الجماعة والشعب لم يجن أى ثمار.. الشعب يفقد الثقة فى الجميع والخلاص فى يد الجيش..30/6 تقوم.. رجال أعمال مبارك وإعلامهم يبالغ فى نفخ السيسى وتشويه حمدين..السيسى رئيسا.. الفائدة الثورة خارج السلطة بسبب عدم التكتل فى تحالف يدافع عنها.. التحدى الحقيقى هو بناء ذلك التنظيم الآن.
نكت فيس بوك
واحد بلديتنا قاعد فى مؤتمر دولى فواحد فرنساوى قام وقال احنا حفرنا تحت برج إيفل ولقينا أسلاك تليفونات وده دليل على إن التليفونات عندنا من 100 سنة فقام واحد إيطالى وقال إحنا بقا حفرنا تحت برج بيزا ولقينا أسلاك وده معناه إن التليفونات عندنا من 500 سنة فقام واحد بلديتنا قال واحنا حفرنا تحت الاهرامات و ملقيناش حاجة خالص وده دليل على إن من 5000 سنة كان عندنا المحمول.
مرة واحد صعيدى قابل واحدة أجنبية سألها انت منين قالتله:وااات ؟ قالها أجدع ناس الوتاوتة دول.
واحد صعيدى وواحد أمريكى وواحد يابانى تايهين فى الصحراء بقالهم ثلاثة أيام فجأة ظهرلهم الجنى وقال كل واحد فيكم ليه طلب واحد بس الأمريكى قال عايز أروح بلدى ونفذله الجنى طلبه اليابانى قال عايز أروح بلدى ونفذله الجنى طلبه راح الصعيدى قاله واه هما سبونى لوحدى هاتهم لى تانى.
واحد من بلدياتنا اشترى مراية الصبح مراته بصت فيها وفضلت تعيط، راحت للعمدة و قالتله يا عمدة جوزى اتجوز عليا فقال لها العمدة تعالى نروح .. نتأكد، فراح و بص فى المراية و قال ده جاب عمدة تانى كمان.
قرر شيخ الصعايدة أن يثبت بأن الصعايدة أذكياء جدا.فجمع أكبر عدد منهم فى برنامج يبث على الفضائيات مباشرة، وقال لهم : بصوا..هاسألكم سؤالين
السؤال الأول: مين اللى فاز بمعركة أحد؟ المسلمين ولا المشركين؟
جاوبوه: المشركين
انبسط أوي
السؤال التانى: مين فاز بالمباراة امبارح بالليل؟ البرازيل ولا الأرجنتين؟؟
جاوبوه: البرازيل
انبسط كتير لإنهم طلعوا أذكياء قدام الكاميرات..
فجأة رفع صعيدى اصبعه، فأدوه الميكرفون.. فقال:
معلش يا كبيرنا،سؤال لو سمحت
قال شيخ الصعايدة: تفضل يا بني.
قال الصعيدي: يعنى دلوقت البرازيل والمشركين هيلعبوا ع النهائى؟
مرة واحد لقى جده بياكل جلى فضل يضحك جده قاله بتضحك ليه قاله انتا ايدك بتترعش والجلى بيترعش جننتوا ام المعلقة.
حاجة وقفة فوق الشجرة بتقول نونو الحل عصفورة شيفة نفسها.
دخل رجل مسجد ومعه سكينة وقال مين منكم مسلم؟
ما حدش رد عليه الا واحد شجاع قال:
أنا مسلم
اخذه بره المسجد وقاله :
عندى خروف بدى تدبحه وتسلخه على الطريقة الإسلامية
قال المسلم: انا بعرف ادبح بس شوف واحد تانى يسلخ
دخل الرجل المسجد والسكينة كلها دم من الخروف وقال مين مسلم كمان ؟
المصلوون شاوروا على الإمام.
رد الامام عليهم :
هو عشان صليت بيكم ركعتين خلاص بقيت مسلم.
صعايدة سمعوا عن اختراع اسمه السيفون حبوا يعرفوا هو إيه بعتو واحد منهم القاهرة لما رجع قالهم أما السيفون ده حتة اختراع يا رداله تدوس على السيفون تنزلك الميه ويا تلحق تشرب يا متلحقش .
واحدة صعيدية رماها زوجها من الدور الثالت طلعتله وقالتله بلاش الهزار التقيل ده.
قامت حرب بين صعايدة والفلاحين فاحتمى الصعايدة بالجبال فكل شوية يجى الفلاحين وينادوا من تحت الجبل (ياهريدى ياهريدى) يقوم يطلع لهم واحد اسمه هريدى فيطخوه، فضلو عالحال ده لغاية ماكبير الصعايده زهق قام نادى الفلاحين (ياهريدي..ياهريدي)، فقال الكبير (استنى انت ياهريدى اطلع انت ياعوضين.
صعيدى كتب على نمرة عربيته “أبو أحمد”، فوقفته لجنة المرور، فقال: أبو ظبى مش أحسن منى.
عشرة صعايدة بيحششوا البوليس كبس عليهم خمسة اتمسكوة وخمسة استخبوا فى البوكس.
واحد ندل بيعلم أولاده الندالة وهو بيموت قالهم الندالة ثم الندالة ثم الندالة.. مات رموه من الشباك.
مرة واحد احول أبوه مات.. دفن أمه.
عصبى ضربته شمس.. جمع شلته.
مرة واحد أحول بابه كان راجع من السفر .. راح باس الشنطة وشال أبوه.
مرة واحد عصبى عايز يحكى لمراتو شىء غريب حصلوا.. قالها أنا عايزا أقولك على حاجة غريبة حصلتلى بس أنا مش كذاب أنتى الكذابة و وقحة و كل عيلتيك و انتى طالق.
واحد منحوس خبطته عربية ومات فروحه طلعت خبطتها طيارة .
مرة فار فشار شاف جثة أسد قعد يجر فيها لغاية ما وصلها الغابة المهم الحيوانات كلها قعدت تهتف وتقول عاش الفار، راح الفار رفس الأسد برجله وهو بيقول انا لما اتعصب ما برحمش .
مرة ثلاثة فشارين راحوا الجبل واحد أعمى و واحد اطرش وواحد أقرع الأعمى قال أنا شايف النملة اللى فوق الجبل والأطرش قال انا سامع دبتها والأقرع قال أنا شعرى وقف من كتر الكدب .
عجوزة خيروها بين الحج والجواز .. وطت راسها مكسوفة .. وقالت: هى مكة هاتطير .
واحد اتصل بمراته قالها حضرى المية السخنة راح صاحبه قالة انت حمش قوى قالو امال هاغسل المواعين بمية باردةمرة.
واحد بتاع سمك ابنه مات فماشى فى الجنازة يقول: كان صاحى وبيلعب .
صعيدى مفتاح عربيته ضاع ميكانيكى جه فتحاله بطفاشة تانى يوم عمل نسخة من الطفاشة .
سبوبة
لما مرسى فاز فى الانتخابات الماضية أنا وكثيرين غيرى من كارهى الإخوان أول حاجة قولناها ربنا يجعل الخير على إيده وتمنينا ان ربنا يخلف ظننا فيه.. تمنينا اننا نكون غلط ويكون الإخوان صح... علشان بنحب مصر وعايزينها تبقى كويسة باى شكل وباى طريقة ..... دلوقتى فيه ناس بتتمنى الخراب لمصر علشان يثبتوا لانفسهم إنهم كانوا صح.. السؤال عمركم شوفتم أقذر ولا أحقر من كده ؟؟؟؟؟؟
صوتى .. من دماغى...
- هيثم السروجى
عندما تغيب الرؤية تعطل القدرة على اتخاذ القرار ، ومن هذا المنطلق أتوجه إلى وسائل الإعلام كافة بتحميلهم المسئولية، فهم (يلعبون بالنار)، هذا ليس جديدا، ليس من الأمانة المهنية والأدبية وليس التزاما بالمعايير الأخلاقية لمهنة الإعلام أن تتحيز لطرف على حساب طرف أخر، أو بأن تقوم بتوجيه الرأى العام فى اتجاه واحد تجاه قضية ما تحدث فى المجتمع، هذا ليس دور الإعلام الحقيقى، فالإعلام الحقيقى له عدة مهام ويكمن دوره فى استبيان الحق من الباطل ونشر الوعى والتثقيف وعرض الحقائق كما هى دون تزييف أو نفاق أو كذب، وهذا أبعد ما يكون عن إعلام اليوم، الإعلام الذى تحركه أجندات ومصالح خاصة وسياسات عقيمة يدفع ثمنها المواطن المطحون .
فإذا بنا نشاهد سير العملية الانتخابية الآن دون إعمال العقل وتحكيم الضمير المهنى، ولما لا فالأمر بات معلنا مكشوفا للجميع الآن واكتملت الصورة حينما قررت الحكومة - رضى الله عنها وأرضاها - بإصدار قانون الغرامة المالية للتخلف عمن يتراجع عن عملية الاقتراع والتصويت، غرامة مالية قدرها 500 جنيه، كما فعلتها الحكومة السابقة من قبل، أهذه هى الديمقراطية التى يتشدقون بها ليل نهار فى وسائل الإعلام ؟! .. شىء من الإنصاف وتحكيم العقل يا سادة ، لن أطيل بكلماتى أكثر من ذلك، ولكن سيبقى وسيظل ذنب هذا الشعب الطاهر فى رقبة حكامه إلى يوم الدين، فهم لم يحسنوا إلى رعيتهم ولم يحفظوا أمانتهم .. وأتوجه بصرخة استغاثة لهذا الشعب القوى .. بالله عليكم، أفيقوا من ثباتكم هذا وتبينوا الحق من الباطل، فأنا لم ولن أنتمى إلى أى تيار سياسى أو دينى أو تيار حزبى ولا أمارس أى أنشطة سياسية، ولست منحازا لأى طرف من الأطراف المتناحرة على السلطة.. وأنا لست مضطرا إلى تبرير نفسى فأنا لست مدينا لأحد، ولا أخشى فى الحق لومة لائم .. إنما ها هو صوتى سوف أحاسب عليه أمام رب العرش يوم الدين .. فشعارى هو "لا صوت يعلو فوق صوت العقل
كيف تصطادين عريسا بسهولة ؟
أولا نصائح لكل بنت
كيف تصطادين عريسًا وتحافظين عليه حتى كتب الكتاب ؟؟
لو جالك عريس متقوليش لحد من صحباتك؛ الحاجات دى بتتنظر وأنتى عارفه البنات عينيها وحشة لو واحدة من صحباتك جبتلك عريس إوعى تشوفيه أو توافقى عليه لوكان عدل كانت خدته هى هتقولى طب لو متجوزة أقولك هتبقى عاوزاكى تاخدى واحد أقل من المنيل جوزها
متفضحيش الدنيا أما يجيلك عريس أصبرى شوية لما تمسكيه كويس هتصيّحى لنفسك ع الفاضى وتتحسب عليكى خطوبة
فى أول مقابله لو لاقيتيه بيبص ف ساعته ..قاعد مش على بعضه.. وشه اتخطف وبان عليه خيبة الأمل إعرفى إنك معجبتيهوش .. إسبقى انتى وقولى إنك رافضاه؛ متخليش واحد زى ده يقول أنه مش عاوزك متزعليش عليه ولا على غيره.. الرجالة زى الأتوبيسات واحدعدّى التانى جاى وراه
كمان الرجال زى الدبان هتهشى واحدة هييجى عشرة غيره
عجبتك ؟ طب خدى دى: الرجالة زى المطبات كل ما تفتكرى خلصت منهم هتقعى فى مطب جديد مش عاملة حسابه
لو معجبتيش أكتر من واحد إوعى تحسى بالإحباط بكرة هيجى اللى أحسن منهم؛ إلا ما كان واحد.. فيهم عدل مهما كنتى وحشة متقلقيش فيه اللى أوحش منك وإتجوزوا
و بعد الخطوبة بصى ..عذبيه.. الراجل يحب يتعذب البنت السهلة يدوبك يفكر فيها يومين ويدور على غيرها إوعى تقوليله بحبك أو عينيك عجبانى الراجل ميحبش كده أبدا إوعى تروحى ميعاده قبله حاولى تتلكعى تروحى بعده بربع ساعة أو نص ساعة الراجل لو إستناكى هيتعلق بيكى أكيد لو سألك عرفتى حد قبلى قوليله لا حتى لو كنت مصاحبة رجالة مصر القديمة والجديدة
لو حاول يوقعك ويقولك بحب الصراحة وكده، برضه خليكى ناصحة أنت عمرك ما عرفتى راجل غير باباكى طبعا
هيقولك هسامحك وده ماضى متصدقيش برضه الرجاله قلبهم أسود وهيمسكهالك ذلة العمر كله إحترمى أهلك متغلطيش فيهم قدامه حتى لو كانوا بيئة ورابش علشان ميتجرأش عليكى وعليهم هيقول إذا كان أهلها بتعمل معاهم كده هتعمل معايا ايه؟ هيعملك فيها مصلح اجتماعى بروح أمه
بلاش زن ورنات تليفونات ورسايل حب وهيام دول عالم .... مش هيقدر الحاجات دى هيتغّر ويفتكر نفسه أحمد عز وهو زى ما إنتى شايفاه قومى بصى لصورته ع الموبايل
خليكى زى فوزية إوعى يمسك إيديكى هيطمع فيكى ويفتكرك واحدة من إياهم، يرضيكى واحد ملوش لازمة زى ده يفتكرك واحدة من إياهم وهيضغط عليكى باسم الحب ياسم العواطف باسم أنكم فى حكم المتجوزين إنك تروحى الشقة معاه روحى بس المرة الجاية مش هيبقى لوحده هيجيب معاه أصحابه
سيبيه يرغى براحته وعدى الفشر اللى هيفشره عن البنات اللى دايبين فى دباديب سيادته إعملى إنك مصدقاه مع أنك عارفة إنك لولا خايفة لا تبقى عانس مكنتش قبلتى بواحد زيه
وخليكى دايما فى أحسن صورة هيقولك بحبك تكونى على طبيعتك بحبك من غير ماكياج متعمليش كده لأنه بيتلاءم عليكى عاوز يعرف أنتى حلوة فعلا وإلا دى بويه.. خليه على عماه احنا ما صدقنا ووقعناه.
..
..
..
..
..