هتف عم مدبولي القهوجي متنهدا بعد حسابه المغبون لأحد زبائن القهوة المتعبين: ولا يوم من أيامك يا مبارك.. أنت كنت صح بس إحنا اللي كنا حمير ومش فاهمينك.. أطلق سعداوي الهلب عضو المجلس المحلي الأسبق- نفسا عميقا من معسل شيشته القص كان قد أسكنه فسيح رئتيه وكتمه قليلا ثم أطلق له العنان عبر فتحتي أنفه الواسعتين ليقول متصعبا: إييييه... الله يرحم أيامك يا فخامة الرئيس مبارك.. يا صاحب الضربة الجوية يا متصيت.. يا للي فتحت بإيدك باب الحرية وأيامك كانت وردية يا عترة الرؤساء يا بو الجدعنة.. هو فيه زي أيامك الحلوة وقرشها الحاتي؟!! ولا الاحترام اللي كان موجود للناس المهمة ؟ ولا الأمن والأمان اللي كنا فيهم أيام ما كان كارنيه الحزب الوطني بطاقة وأحسن م البطاقة كمان !! الله يخرب بيت الشباب الثوري وبلاويه واللي بيجرى على أيديه.. ضحك الرجل العجوز عم هنداوي الطحش بمرارة قائلا: الله يرحمك يا بنت عمي.. ثم تكلم أحد الشباب ذوي الدماء الساخنة والذي لم يعجبه هذا الكلام الماسخ بطبيعة الحال: لعلمكم بقى يا عم مدبولي أنت والأخ سعداوي الهلب مع احترامي الكامل لحرية الرأي إلا أن كلامكم بالطريقة دي عن مبارك وأيامه السودا اللي كانت أس البلاوي يعتبر خيانة كاملة لدماء الشهداء الأبرار الذين سقطوا منذ 25 يناير 2011 ومازالوا يسقطون حتى الآن أنتم عارفين كده ولا لأ ؟!! مدبولي القهوجي بلا مبالاة مع تشويحة من يده: يا عم صلي.. وسمعنا سكاتك أحسن والنبي.. أما سعداوي الهلب فقد قال غاضبا: ياعم اقعد لنا على جنب بقى بلا خيبة فلقتونا.. أنت هاتخطب !! ليضحك عم هنداوي الطحش مرة أخرى بمرارة أكثر قائلا نفس عباراته الأولى: الله يرحمك يا بنت عمي !! وفي هذه اللحظة يلتف حوله جميع المتحدثين إضافة إلى زبائن القهوة ليبادره الشاب الثوري قائلا إيه موضوع بنت عمك دي يا عم هنداوي وماتت إمتى؟ وإزاي ما تقولناش يا راجل أنت!! علشان نعمل معاك الواجب وناخد بخاطرك.. وأهي حاجة تلمنا كلنا بدل ما إحنا عمالين ناكل في بعض كده بدون فايدة.. عم هنداوي موضحا: لا يا جماعة أنا بنت عمي وعمي نفسه بألف خير ربنا يديهم الصحة لكن الجملة دي كان دايما يقولها واحد غلبان حكايته منيلة بنيلة زي حكايتكم كده بالظبط تحبوا تسمعوها يمكن تتعظوا ؟! الجميع في نفس واحد: احك يا راجل شوقتنا.. هنداوي الطحش: كان في راجل فلاح غلبان ومسكين وعلى باب الله وما طلعش من بلدهم لحد المركز حتى طول عمره.. قام أبوه حب يطمئن عليه قبل ما يموت وقال لازم أجوزه، وساعتها ما لقيش أنسب من بنت أخوه يجوزها له مع إنها كانت هبلة وحمارة وأم بدوي كمان على رأي المسرحية المعروفة، المهم صاحبنا اتجوزها واتدبس فيها وكل ما يرجع من الغيط يلاقيها خابزة له عيش قعره محروق ومهبب يقولها إيه دا يا بنت عمي ! العيش قعره أسود كده ليه ؟ تقول له: أصل قعره محني، وبعدين ييجي يشرب من القلة يلاقيها بتزن جامد وميتها سخنة لأن صاحبتنا من خيبتها رامياها طول النهار في الشمس ويادوبك بتملاها أول ما يجي من الغيط، يقوم يقول لها: القلة دي بتزن كده ليه يا بنت عمي ؟ تقول له: أصلها بتغني في إيديك يا ابن عمي.. يقوم الغلبان يشرب وهو آخر انسجام، بس عنها.. وفي يوم من الأيام ماتت بنت عمه الخيبانة الضلالية دي وبعد سنة اتجوز عليها من المركز واحدة شاطرة ولهلوبة وميت فل وأربعتاشر، بس مشكلته إنه كان ييجي من الغيط يبص للعيش اللي خبزته يشوف قعره حلو وزي الفل يقوم ماسك القلل يلاقي ميتهم ساقعة وآخر جمال، يقوم الموكوس قايل إيه في وش مراته الجديدة: الله يرحمك يا بنت عمي من ساعة ما متي والواحد لا بياكل عيش قعره محني ولا بيشرب من قلة بتغني !! لحد ما الولية الجديدة فاض بيها قامت سألت الجيران عن ضرتها المرحومة كانت بتعمل إيه عشان يحبها الحب دا كله ؟ ولما عرفت السر بقت تلقح القلل في الشمس طول النهار وجابت بت صغيرة بتتعلم الخبيز لسه وخلتها تخبز العيش بتاعه أبو قعر مهبب، ولما صاحبنا رجع من الغيط ولقي النظام القديم بكل مساوئه اللي عاش وكبر عليها رجع تاني، بقى يحب مراته الجديدة ومابقاش يجيب سيرة القديمة خالص.. عرفتم بقى الموضوع ؟!! الشاب الثوري غاضبا: الله يجحمها مطرح ما راحت عودته ع الوحش لحد ما فسد ذوقه، وما بقاش يجد أي طعم للحلو لما يلاقيه، بينما تصعب مدبولي وسعداوي قائلين: الله يرحمك يا بنت عمي !!
