أحمد آدم يشنق نفسه فى تركيا

وجد حبلا يتدلى أمامه فلفه حول رقبته قائلا : قبل ماطلع م السوق ده هشنق نفسى عشان مش مصدق ان ده سوق .. بصراحه ..
هذا كان حال الفنان أحمد آدم الذى إنتقل بنا اليوم من خلال برنامجه " بنى آدم شو " إلى تركيا لنتجول معه فى أحد أسواقها الذى يجمع سوقا للخضار والفاكهة والملابس فى مكان واحد .
استرسل آدم فى الحديث مع المشاهدين عبر قناة الحياة وهو ينظر إلى البطاطس متسائلا .. دى بطاطس واللا مانجه ؟
والله نقدر ننتج أحسن من ده .. ونعمل أفضل من كده .. مش ممكن السوق نظيف جدا مافيش ورقة على الأرض وكل شئ فى مكانه .
مش زى عندنا تدخل السوق تبقى محتاج بعد ماتخرج منه تغير كل شئ الحذاء والملابس وبمجرد ماتدخل بيتك تجرى على الحمام تاخد دش من التراب والأوساخ اللى التصقت بيك .
هنا تشوف البصل بصل والبرقوق برقوق يعنى أى نوع من الفاكهه أو الخضار متميزه مش زى عندنا تقف جنب البصل تشم الخوخ وتقف جنب البرتقال تشم ريحة بلاستيك ..
والبياعين هنا فى منتهى الذوق مع الزباين مش زى البياعين عندنا لو شافك باين عليك بن ناس وهتشترى كتير يبدأ " يتمحلسلك " ويقولك "سيبنى اعبيللك يابيه " وفى الآخر بعد ماتسيبه وتشترى وتروح البيت تلاقى اللى اشتريته بايظ وخد بقه تريقه من المدام .
ولو شافك البائع على قد حالك يتعامل معك بقرف ولو مديت ايدك يقولك " ايدك يابيه هتبوظ الرصه " وتلاقيه مكشر فى وشك .
هنا الناس كل واحد عارف هوه مطلوب منه ايه وبيعمله وفى نهاية اليوم وكأن ماكانش فيه سوق كل حاجه مظبوطه وده كله عشان بيحبوا بلدهم واحنا كما ياريت نحب بلدنا ونتعلم منهم .
وفى نهاية هذا الحوار مع المشاهدين لم يصدق أحمد آدم نفسه بأنه فى سوق فاكهة وخضا ر ووجد أمامه حبلا يتدلى فلفه حول رقبته قائلا :
قبل ماطلع م السوق ده هشنق نفسى عشان مش مصدق ان ده سوق .. بصراحه