جتنا نيلة ..وانا اولكم

عاوزين الحق. ولا ابنعمه . الحق اننا شعب فاشل. لا امل فيه.عايش بقى له كام الف سنة .على سيرة فى بقه: زى اللبانة. ال ايه احنا فراعنة. وال ايه احنا اسياد العالم. ومفيش مانع برده .احنا اللى اى اى. واحنا اللى راح. واحنا اللى جاى .وما تكلمنيش بعين رضية .وبص للى مدفوع فيا.
الناس دى باينها.. شاربة حاجة. ولا الصنف كان مغشوش. ولا.. لا مؤاخذة الواد. ماعمرهاش كويس.
يا اسيادنا المغيبون: ولا.. احنا اى اى .ولا احنا اى ذاته. واللى راح دايما معانا.. احسن من اللى جاى.
وبعدين حيبصوا لينا على ايه؟ عمرك شفت شعب. متعايش مع القبح زينا؟ واكبر مثال اكوام القمامة. فى الشوارع والميادين كمان. ده لو شعب عنده.. ذرة دم. كان ثار على القمامة بس. وكان العالم كله عذره. وعمرك شفت شعب.. بيعشق الديكتاتور. اى ديكتاتور زينا. ويشرك فى اى معارض له. ويتهمه فى شرفه. وفى اعز ما يملك زينا؟
احنا بس.. وكاننا احتكرنا امتياز فرعنة الزعما. دونا عن باقى الدنيا كلها !عاوز اقولك اكتر ..خد عندك يا سيدى :عمرك شفت شعب. قاعد ليل ويا نهار. متسمر قدام التليفزيون. وبيحفظ كام كلمة.. من مذيعين قابضين ممولين مغسولين.. باموال قذرة. وبعدين ينطلق. عشان يفتى فى كل حاجة. وانت تعلم. زى ماانا اعلم ان اللى يقولك: انا افهم فى الكفت.. يعنى كل شئ خلقه ربنا. ما بيفهمش فى اى شئ. وهو حمار كده بصراحة ؟!
عمرك شفت. شعب راضى. قانع بحاله زينا؟ حتى لما قامت ثورة. اكتفى بالفرجة عليها زى.. باقى العالم. وقعد يمصمص فى شفايفه. على الشهدا والمصابين. ويا حرام.. ولما اتاكد ان النظام.. مشى فى ستين داهية. خرج للشوارع. يحتفل ووسع يا جدع: احنا بتوع الثورة. احنا الثورجية بجد؟!
وعمرك شفت.. شعب يضحك عليه. ايشى بكفتة. وبجهاز مشكوك فى امره وبانهار من اللبن. والعسل. وهو لسه محشور.. فى طابور العيش ابو 5 صاغ .او فى بنزينة ال80 او لسه حايس ولايص.. على انبوبة ..او عايش فى الضلمة. اكتر من 3 ساعات يومى. وده مستمر معاه ل 2018 ؟!
وعمرك شفت.. شعب بيصحى من النوم .عشان ينام تانى. ومقضيها فى شغله.. نميمة .و حديث لا يودى ولا يجيب ؟ ايوه احنا شعب ..عمرنا كام الف سنة. بس مش عاوزين نصدق. ان احنا هرمنا من زمان. واكل منا الزمن وشرب. وانتهى عمرنا الافتراضى ورغم كده.. لسه فينا نفس: نرقص ونغنى. ونتريق على خلق الله. اللى احسن مننا بكتييييير. ولسه برده فينا. طولة اللسان. اللى مخليانا نتطاول على شعوب: احسن مننا بكتييير. ولسه كمان بنحب الضرب.. على لامؤاخذة القفا . من اللى يسوى. واللى ما يسواش. وكانه اصبح ادمان !
فوقوا.. وانا اولكم . والا فالاحسن.. اننا نجيب دورفها. ونفضها سيرة .. بلا وجع دماغ!