"فوقى يا مصر" قصيدة جديدة ل وائل جميل

الظلم زاد فيكى..ومين هيتحمل
مايغركيش ناس.. بتضحك وتتجمل
لو شايفه ده عادى وحالفه ماتفوقى
شكرا كدا كفايه ..مانيش بقى مكمل
تعبت من الوقفه ومطالبه بحقوقى
رجلي خلاص ورمت وليلاتى بتنمل
يامصر فوقى بقى كفايه ..احنا ولادك برضه
فى حد يعيش غريب وهو على أرضه
والجانى يصبح بطل والمجنى عليه ساكت
ولو حاول فى يوم ينطق.بيُستباح عرضه
مسيحى ساكن فى بيته..يخلوه يسيب ارضه؟
قوليلى
انتي اللى فارضه الظلم..ولا مين فارضه؟
يامصر فوقى بقى كفايه..احنا ولادك برضه
دانا برغم العيوب فيكى
لسه بشوفك احلى واحده فى الصوره
ساعات كتير ناكلها بملح ونقول الحمدلله
اهى ماشيه ومستوره
انا كل اللى عايزه يامصر
اعيش بكرامتى جواكى
وما أعيشي بنفس مكسوره
هوه انا برضه مش مصرى؟
فى كل صلاه بصليلك
لا انا بكرهلك الخير
ولا رافض اغنيلك
ولا مسكت يوم سكين
عشان اقطع شرايينك
دانا بدعى كتير ربى
تكونى عفيه ويزيدك
لا انا فرحان اكون عبدك
ولا نفسى اكون سيدك
ولا عايز فى يوم ابعد
طب هوه بعادى هيفيدك؟
هوه انا برضه مش ابنك
مولود على ايدك
من لحمك ومن دمك
فى الحرب اكون سيفك..فى الجو اكون طيفك
فى الهم اشيل همك
كارهانى ليه لسه.. يتدوسى قوى بخسه
على راسى ولا همك
ومطلوب أقول حاضر.مطلوب أقول حاضر؟!
دا اسمه كلام برضه؟
قوليلى
أنتى اللى فارضه الظلم.ولا مين فارضه؟
يامصر فوقى بقى كفايه..احنا ولادك برضه