عكس عكاس | عن الأهرام .. قلعة التعريض والأتوبيس "الإسكندراني" وبلاوي أخرى

صفحة ساخرة قليلة السياسة والأدب يحررها خالد الدخيل
في حب الأهرام .....قلعة التعريض
( بين قوسين ...مصطلح "التعريض" في العنوان مقصود بيه تعريض الصحفيين للخطر مش الكلمة التانية اللي مبقتش عيب اليومين دول أصلاً ..)
طول عمر الأهرام قلعة صحفية كبيرة ...سنا ومقاماً ومن حيث عدد الصفحات والمطبوعات اللي بتصدر عن المؤسسة ...من حيث عدد الموظفين والمزايا اللي بياخدها أي حد مكتوب له يشتغل هناك
الأهرام خلال الساعات الماضية كتبت لنفسها تاريخ جديد في الخسة والندالة ...تاريخ عمرنا جميعا ما هننساه للمؤسسة العريقة ...قلعة التعريض و شق وحدة الصحفيين والموالسة للأنظمة والموظفين الكبار ...من أول ما صدرت وحتى الآن
سنة 1882 نشرت جريدة الاهرام خبر بيقول ان الجيش الإنجليزي القى القبض على "العاصي " أحمد عرابي ، واحتفلت في نفس الخبر بدخول قوات الإحتلال الى القاهرة وقالت ان دي "بشرى سارة"
طيب فاكرين عيد ميلاد مبارك ال80 أيام أسامة سرايا ؟ اللي مدح رئيسه بعنوان بيقول "يوم أن ولدت مصر.. من جديد" وكأن مصر اتولدت مع الرئيس !!
بلاش ...فاكرين مناسبة مرور 130 سنة على الاهرام ...يومها الزملا أصدروا ملحق خاص طبعاً ..المناسبة تستاهل ، بس مش علشان الجرنال ولا تكريم الرواد والرموز طول السنين دي ...تؤ تؤ
كان ملحق خاص عن زيارة مبارك للأهرام في المناسبة دي وكان بعنوان (كنا معك) وكأن مبارك هو اللي بنى الجرنال وكان بيكتب أخباره ومواضيعه سطر بسطر ...
في 18 يونيو 2008 نشرت جريدة الاهرام في الصفحة الأولى وبالبنط العريض إن " مبارك أكثر زعيم يثق به شعبه بين شعوب العالم....استطلاع للرأي في أكبر‏20‏ دولة‏:‏‏94 %‏ من المصريين يؤكدونقدرة رئيسهم علي إدارة الشئون الدولية....بوش أقل الرؤساء حصولا علي الثقة حتي بين الأمريكيين أنفسهم...نجاد ومشرف هما الأسوأ‏..‏ والمصريون يقدرون الرئيس الصيني
اللي هو التعريض على أصوله ....خاصة وإن الإستطلاع اللطيف ده منسوب لحاجة اسمها (منظمة الرأي العام العالمي وورلد أوبينيون أورجانيزيشن الأمريكية ) اللي هو انت لما تقرا متقدرش تمنع نفسك من إصدار أصوات غريبة إختصاراً للردود اللي ممكن تتقال
طبعاً مش هننسى مئات الوقائع اللي هتفضل متثبتة بمسامير على جدار تاريخ المؤسسة العريق ، سواء كانت مصر ملكية ولا جمهورية مروراً بكل الرؤساء من عبد الناصر للسادات لمبارك لمرسي وبينهم المجلس العسكري للسيسي ...(باستثناء ان الأداء في الحقبة الناصرية كان راقي حبتين لأن الفترة كلها كانت كده ..يعني لما يكون هيكل هو المسئول غير لما يكون ابراهيم نافع ولا سرايا )
بس أجمل وألطف واقعة ...لما عملوا حوار مع رضيع ...وده هو السبق الصحفي اللي محصلش من ايام سيدنا عيسى .... بس كله يهون في حب الرئيس
الآن وبكل فخر ...تتوج الأهرام تاريخها العريق في التعريض بموقف عظيم ....وبتدي مثال نقي وشفاف لكيفية رفع الايريال باحتراف ومعلمة ....
يوم 4 مايو نشر الاهرام الافتتاحية اللي كلنا اتباهينا بيها وفرحنا وطبلنا ورقصنا ...دي اللي كان بيطالبوا فيها باعتذار الوزير النيجاتيف ورد الإعتبار للنقابة ....ولأننا طيبين أوي ياخال ....عنينا رغرغت بالدموع واحنا بنفكّر بعض بكلمة هيكل بتاعة ( السلطة شاخت في مقاعدها ) ونحضن بعض ونستبشر بأيام حلوة جاية ...
بعد 24 ساعة ...الدفة اتحولت لمسارها الأصلي ...واتخذت الاهرام مكانتها الطبيعية في التاريخ .....وقفت جنب الشرفاء اللي كانوا بيدرّعوا ويصبّعوا للصحفيين ....وقفت جنب النيجاتيف ونظامه ...وبدأت الحرب
شكراً للأهرام على التزامها بالخط السياسي والمهني طول عمرها
ملايين مصطفى محمود المؤيدة !!
ملايين مصطفى محمود المؤيدة !!
ولدت مصر بمولدك !!
ولدت مصر بمولدك !!
----------------
قالولي حاجة غريبة قوي ....ماتخافش !!!
مفيش اتوبيسات بتمشي في اسكندرية ...والناس اللي فيها يكلموا الرؤساء كده مباشرة ..؟ ومفيش موكب رئاسي بيمشي وجنب منه اتوبيسات أو بشر أصلاً ...واذا كل المستحيلات دي حصلت ....ازاي سمعت وسط هوا الكورنيش وهدير الأمواج الكلمتين الحنينين دول ؟
طب ايه ؟
فين الرسالة اللي كان المفروض توصل لنا من الحكاية العميقة والمشهد المؤثر اللي خد تصفيق حاد 3 مرات ؟ ومن امتى الرويسا بيمشوا ع الكورنيش لوحديهم ؟ وازاي ركاب الاتوبيس حسوا بالخوف في قلب الرئيس فحبوا يطمنوه ؟ كان بيجري مثلا ويتلفت وراه ..؟ ولا كان بيرتعش ونظراته زايغة ؟
ايه ركاب الاتوبيس اللي مكشوف عنهم الحجاب دول ..؟
وايه اللي يخلّي رئيس دولة يوصّل لشعبه انه خايف ؟ طيب من إيه ؟
وليه اللي قالوه حاجة غريبة قوي ؟؟ بالنسبة لك يعني ؟
ياباشا...الله يخليك بلاش تتكلم برّه الورقة المكتوبة ...فيه عيال أشقيا عندهم فراغ ومعندهمش شغل فاضيين لك ومتابعين كل حرف بتقوله ...ليه تديهم الفرصة يسفّوا ويتريقوا عليك ..؟
فيه رئيس دولة يقول على البلد اللي بيحكمها .... انها شبه دولة ؟
أقول لك....بلاش تتكلم خالص ..ولا ترد على حد حتى في التليفون ...مشّيها بالورق والمستندات وخلاص ..وارفد أم المصوّر ده اللي متسلّط عليك علشان يحرجك ...
-------------------
الحكم بعد المكالمة
--------------------
الأخ الفاضل وكيل النيابة اللي كان السبب في حبس ست البنات سناء سيف ..بعد التحية ...
انت وانا وكل الناس عارفين ان البنت ماغلطتش لما قالت له انت طيشة ومالكش لازمة ..؟ ومش بتاخد قرار من دماغك لكن من التليفون اللي بيجيلك ....ارتكبت جريمة لما قالت لك كلمة الحق ( أنا عارفة ان ده تحقيق صوري ...وكده كده هتحبسوني ) ...ولا كنت عايزها تترجّاك وترضي غرورك وتداعب مشاعرك المريضة علشان ترحمها ؟ ماهو انت البعيد مجرد صورة ....موظف قاعد على كرسي واياده ولسانه وعقله مربوطين بخيوط زي عروسة الماريونيت ...
كنت بتفكّر وقتها في إيه ..؟ وقلت لها ايه بعد ما طلع كلامها صح ورديت على المكالمة قدامها ...قبل ما تمضي على المحضر ..؟
وتفتكر زميلك اللي حبس مالك عدلي ووجهله نفس الاتهامات اللي انتوا حافظينها كان بيفكر في إيه ...
حد فيكم كان عارف حاجة عن الناس اللي بيرميها في الزنزانة دي ؟
يعني حد يعرف ان سناء اخوها محبوس من كذا سنة في تهمة انتوا ارتكبتوها عشرين مرة ..؟ أو انها من كتر ما اتحبست ماعدناش بنعرف هي حرة ولا في الزنزانة ؟ طب حد يعرف ان عمرها 23 سنة ؟؟
وانها معرفتش تشوف ابوها لما مات وخرجت تدفنه ورجعت للزنزانة تاني ؟ طب حد فكّر يقرا أو يفهم هي ليه راحت سلّمت نفسها ؟
بلاش ...حد فيكم يعرف مالك عدلي كان بيعمل ايه قبل ماتحبسوه ؟؟ سيبك من الإتهامات الجاهزة اللي بتاخدوها بالتليفون ... ليه حضرتك وزمايلك متضايقين من واحد محامي طيب وجدع مقضي يومه رايح جاي ع الاقسام وبيتحمل رخامتكم وغروركم وتقل دمكم انتوا والظباط علشان يساعد الناس اللي انتوا حابسينهم بدون تهم حقيقية ....شباب كل ذنبهم غيرتهم على بلدهم وأرضها اللي اتباعت في الضلمة بشوالين رز ..
حد يعرف ان مالك من أهم المحامين اللي مسخرين وقتهم وصحتهم علشان يرفع قضايا على الدولة تعالج العيانين الغلابة اللي مش معاهم حق الدوا ...حد يعرف كسب كام قضية وعالج كام بنى آدم ...
عارفين حاجة عن دوره في ملف الاثار طيب ؟
عارفين كام أم ابنها محبوس بتتصل بمالك وموبايله مقفول دلوقتي ؟ عارفين كام بيت زعل بسبب حبس مواطن عظيم جميل شريف طيب زي مالك عدلي ..
عارفين نتايج اللي بتعملوه ده ايه ؟ محدش بيحذركم من غضب المظلومين ؟
سعادتك هترد دلوقتي ولا الحكم بعد المكالمة ؟
سناء سيف
سناء سيف
مالك عدلي
مالك عدلي
ذنبهم في رقبتك
--------------
اهلنا الغلابة اللي جابوهم باتوبيسات شايلين علم مصر ( وقبلها السعودية ) واللي غنوا ورقصوا في حب مصر والرئيس ، وزودوها في اظهار مشاعرهم وحطوا التاتش بتاعهم ، فمنهم اللي سجد لصورة الرئيس ومنهم اللي شال البيادة على راسة او لحسها ومنهم اللي اتكفت على وشها تبوس جزمة ظابط ....واللي رفع صباعه أو دراعهوشتم الصحفيين بأوسخ الألفاظ ...
اللي رقصت واللي رقص واللي حاصروا النقابة وهم مش عارفين ايه الموضوع أصلاً
اللي صورهم انتشرت في كل حتة واصبحوا اشهر من الظباط نفسهم
اللي ذنبهم في رقبة المسئول عن الجريمة الكبيرة دي ..اللي يقدر بجبروته يذل ست كبيرة في السن علشان تنزل ترقص على ( بشرة خير ) وتفرش الملاية للناس اللي المفروض بيدافعوا عنها
في رقبة كل واحد رتّب وخطط وجمع الناس ووفر لهم اتوبيسات ورمى لهم 100 ولا 200 جنيه مش محصلين حق الإهانة والذل ولا داخلين في حسبة العار اللي لطّخ الكل
قبل كام سنة وفي ظروف سودا ماتفرقش كتير عن الظروف دي ...دخل الأمريكان بغداد ..بعد انسحاب أو اختفاء الجيش العراقي بالكامل ...مش ده المهم
يومها كل تلفزيونات وصحف العالم كانت مهتمة بمشهد الراجل اللي كان ماسك صورة صدّام حسين وبيضربها بشبشب بلاستيك ....ومشاهد لناس رايحة جاية تهتف للأمريكان وتسب لصدّام ...ده غير المشهد الأهم بتاع إسقاط تمثال صدام اللي كان قدام الهيلتون
في الوقت ده كان كل الشعب العربي وفي قلبهم العرقيين كافيين خيرهم شرّهم ...بيحاولوا يبلعوا الإهانة والهزيمة وهم شايفين العصابات الأمريكية بتمرح في شوارع بغداد ...بس كان فيه عراقيين ( مواطنين شرفاء ) قاموا بالواجب وعمولا اللي عليهم علشان وكالات الأنباء و الجرايد تكتب عن استقبال الشعب العراقي لملائكة الديمقراطية اللي خلصوهم من الطاغية ....
نفس الذات نفس ....ستات شبه اللي رقصوا قدام النقابة وشالوا البيادة ولحسوها وشتموا الصحفيين ...رقصوا واحتفلوا بسقوط بغداد
بس ربك كريم ...
والحقيقة ظهرت ..
مواطنون شرفاء !!
مواطنون شرفاء !!
أشرف م الشرف مفيش
أشرف م الشرف مفيش