عكس عكاس.. صفحة بالمشهد تعاني قلة السياسة والأدب للساخر خالد الدخيل

ال " بست سيلر"
قبل حوالي ربع قرن عمنا الشاعر الكبير محمد بغدادي أصدر كام عدد من مجلة اسمها ابن عروس ...كانت مهتمة بس بشعر العامية في مصر ...
في العدد الأول كان فيه كاريكاتير لشاعر من بتوع الكلام الغريب غير المفهوم ده ....بيتريق على النوعية دي من الشعراء ، وعمنا بغدادي كتب كام سطر كده على سبيل التريقة على النوعية دي من الكائنات ...فاكر منها (بول الفرس شق حلقي .. عطست ريشة غراب )
الغريب ان بغدادي اتفاجئ بعد صدور المجلة بواحد شاعر بيقول له ازاي تنشر أشعاري بدون اسمي في المجلة وتتريق عليا .....واكتشف ان فيه بني آدم كتب كده فعلاً ...
نفسي اسأل العم بغدادي دلوقتي عن رأيه في شعر ديدا وزاب ثروت ؟ وان الكتب اللي بتتباع باسمهم محققة ارقام قياسية مش كان بول الفرس ارحم
عموماً هي دي قواعد البست سيلر(معرفش بنطقها صح ولا غلط ) اللي بيبيع بيكسب ويقعد على القمة سنين طويلة ( مش لازم نجيب سيرة عمارة يعقوبيان وسط العالم التافهة دي على الاقل الاسواني كان عامل حاجة يتقال عنها رواية ) وهكذا فإن أحدهم بيشاور على رواية أو ديوان أو بني آدم جديد بعصاية السحرة ...فيتحول الجميع اليه ..بقدرة قادر ...لاتعرف ده حظ ولا دعاية كويسة ولا دمامل بتملا جسم البلد
كل اللي اعرفه ان الجيل الجديد عصي شوية على الفهم ...
وساعات بتخيل انه بيحاول يغيظنا لما نضغط عليه عشان نعوده على القراءة ونفضل نطارده بعبارة الكتاب خير صديق ....وبدال مايدور على ابراهيم اصلان وصنع الله ابراهيم وجمال بخيت ومصطفى ابراهيم ....يروح يشتري الفيل الازرق وهيبتا وزاب ثروت ...!! علشان نخرس ونبطل زن
*******
حروف الجر
حروف الجر
***********
بيني وبينك حروف الجر كلها ...ورغم انها بتجر الكلام ناحية بعضه لكن معايا أنا مجرجراني ومدوخاني ...بعيد وقريب ...لدرجة حتى مش عارف اقف اشوفك واقفة في اي ناحية علشان أنجرّ لك..
وحرف ال : (في) ....راشق فيما بيني وبينك ....وملخبطني مبقيتش عارف انا فيكي ولا انت اللي فيا
وعن حرف ال : (عن )احكيلك ...وعن عمايله فيا...رغم انه المفروض يبقى عن اي حاجة تخصك لكنه مش بيقول حاجة عنك...بس ملزم يفضل قريب منك كل ما النفس تحب تبوح بحاجة عنك
وساعات بيقول حاجات عننا للناس..
وال (من ) طبعاً انا منك واليك واحنا من بعض ....ده حرف اتخلق هشان يبقى حتة منّك
واليك بيوصلني حرف " إلى ..." دايما اقوله اطلع اليها ...قولها انك حرف منتمي ع الاخر ...وجوابك باين من عنوانه ...فإليها اذهب
والى قلبها مباشرة حاول تدخل ...وصل رسايلك كلها اليها ...والى شفتيها واستقر هناك ماتتحركش الا لما اجي اليك
************
كيف تحضن نفسك وتطبطب عليها او تركّب جناحات وتطير
مصطلح تنمية بشرية ده خدناه في الجامعة زمان ضمن مادة اسمها موارد بشرية ، كان المقصود منه تأهيل وتدريب الايدي العاملة والكوادر البشرية باعتبارها أهم عناصر الإنتاج ....كمان هو مصطلح رأسمالي صرف ظهر من بعد آدم سميث ...
تمر السنين ويطلع في جسم العالم العربي طلوع اسمه التنمية البشرية يكبر ويكبر ولساه مستمر ...
ده يخلينا نفتكر المرحوم ابراهيم الفقي المعلم الكبير ...أول واحد باع للناس موضوع احضن نفسك وطبطب عليها ده ...وركب جناحات وطير ....
ويخلينا نلاحظ كمان إن فيه أعداد كبيرة من هؤلاء البياعين أصبحوا نجوم كبار ...بيسافروا من دولة لدولة وبيحضروا مؤتمرات ويعملوا دورات تدريبية وياخدوا فلوس بالكوم
بقى فيه صناعة اسمها التنمية البشرية ...بتجيب فلوس مالهاش نهاية ....وهي مرتكزة على بيع الهوا في قزايز ..
من كام سنة صاحب الشركة اللي بنشتغل فيها سافر دبي وقابل هناك واحد من الكائنات دي (مصري الجنسية ) سحبه في ايده وجه ...بعد ما اخونا ده أقنعه ان موظفين شركته محتاجين شوية محاضرات تنمية بشرية علشان يضاعفوا انتاجهم وكده....باختصار اقنعه انه هيركب للموظفين جناحات وهيطيروا
حجز له في فندق وقاوله على مبلغ محترم ...يوم التدريب جه صاحبنا وعلى وشه نفس الابتسامة البلاستيك بتاعة المرحوم ابراهيم الفقي ...وبدأ يشرح ويتكلم عن القواعد العشرة اللي لو التزمنا بيها هنلاقي الجناحات نبتت وبدأنا نطير فعلا ...
اول القواعد دي انك متفتحش الفيس بوك لما تبدأ يومك وازاي ترتب طريقة قراية الجرايد وتاخد نفس عميك وتغمض عنيك معرفش قد ايه وتتخيل ايه ...والى آخر هذه النوعية من النصايح ....وقتها قلت له لو أم الواحد فينا لاحظت إنه مقصر شوية ومش مركز في شغله هتنصحه يعمل كده .....ضحك هو وقلبها نكتة وبقى مركز معايا أوي
في الاستراحة جريت على الكمبيوتر عملت سيرش على الكلام اللي كان بيقوله لقيته متكرر في 500 مكان وكلهم بيرددوه ...طبعت كام نسخة ووزعتها على الزملا ومنهم رئيس الشركة ....
وباظت الليلة ....بس انا بعد اسبوعين اترفدت
خلاصة القول ...اننا لازم ندي تعظيم سلام للجماعة بتوع التنمية البشرية دول ....صراحة طلعوا امهر وأذكى بمراحل من مندوبين المبيعات بتوع التايم شير ...وبتوع المنتجات الصيني
شوية تفاؤل وأمل في المستقبل ....على شوية مصطلحات من عينة تنمية الذكاء الوظيفي ولغة الجسد والبرمجة العصبية ....والسوق مليان شركات ومؤسسات حكومية وخاصة بقت متشبعة بالوهم ده فخصصت ميزانيات سنوية لتدريب الموظفين على البلا بلا بلا ده أيا كان
بنك يدرب موظفينه على ديناميكية التعامل مع العملاء وفندق يدرب موظفينه على كيفية صنع الابتسامة الساحرة وشركة تسويق تجيب مدرب يعلم موظفينها لغة العيون والسيطرة على الاخرين من خلالها
ده غير الشركات ومعاهد التدريب اللي بتبيع الوهم دده معلّب جاهز للناس اللي بتعاني من فراغ ويأس في انتظار الوظيفة ومحتاجين حقنتين تلاتة مسكن تنمية بشرية وكام شهادة يضيفوهم على الدوسيه وكام سطر في السيرة الذاتية
لم نذكر شئ عن الكتب طبعاً ....الله يرحم ابويا ورثني شوية كتب منها كتاب ضخم الحجم اسمه دع القلق وابدأ حياة جديدة ....لواحد مشهور اسمه دايل كارنيجي ...وقتها كنت بحاول اقرا اي حاجة عشان ابقى مثقف طبعا ...لكن عافرت مع الكتاب ده ومفهمتش حاجة .....للأسف كان مسيطر عليا مشهد عادل خيري وهو بيقرا كتاب كلسليب في مسرحية الا خمسة
أو يمكن لأني كنت واخد موقف ايديولوجي من الدعاية الامريكية اللي كانت مركزة على المنطقة دي في مجلة المختار بتاعة ريدرز دايجست اللي كانت من أهم المفاتيح اللي استخدمها الامريكان لأبواب العقول العربية برعاية مصطفى وعلي أمين في مصر
أو لأني مقتنع إن مصطلح التنمية البشرية مصدره المعسكر الرأسمالي الغربي اللي بيركز أكتر على عصر الأيدي العاملة لغاية ماتجيب جاز ...؟ بعيد عن الكلام الكبير بتاع فلسفة اقتصاد السوق الاستهلاكي اللي بتركز على ان العامل لازم يجيب أقصى طاقته علشان يلاقي موطئ قدم في عالم لا يرحم.
واهو كله بيرزق
*************
نشرة أخبار السفّافين
*************
مساء الخير عليكم فيما يلي تفاصيل نشرة أخبار السفافين نقدمها لكم من على نواصي فيس بوك وتويتر
وات اباوت يور فيرست جيتار براين ؟
ركزت أعمال السف اليومين الماضيين على جيتار المطرب العالمي براين آدمز الذي تعرض لتشويه موظف مصري في الجمارك شخبط عليه بقلم فلوماستر ...
تجاهلت أعمال السف كل التفاصيل المتعلقة بحدث مهم وعالمي كهذا في الظروف السياحية السودا اللي بتمر بيها البلد ...( غناء ادامز في حفل شركة اورانج بالاهرامات ) وركزوا فقط على صورة اطلقها براين عبر حسابه الشخصي للجيتار الأثري الكلاسيكي الذي تعرض لتشويه ...
واستمر السف واطلاق الافيهات المتوقعة والمستهلكة على شاكلة ( وات اباوت يور فيرست اوسكار) وايه اللي جابك مصر ؟وانت مابتقراش جرايد ايطالي ولا إيه
وقد حاول بعض العقلاء تهدئة الأمور وتشيير صورة لجيتار اخر لبراين تعرض لتشويه أكبر من موظف في مطار كندا ولكن دون فائدة
***********
إنخفاض منسوب النيل
انتشرت على فيس بوك وتويتر صورة لنهر النيل توضح إنكشاف بعض الجزر وانحسار المياه ...أصل الصورة يرجع لموقع غير معروف ..لكنها صارت أكثر شهرة عندما نشرتها اليوم السابع قبل ايام ليلتقطها النشطاء ويعيدون نشرها الاف المرات بينما يكمل الجمهور لطم الخدود على الكارثة التي حلت بالبلاد ...
وقد حاول بعض العقلاء من الخبراء توضيح أن الصورة فوتوشوب خاصة وان من فبركها بلغ به الغباء أنه نسي ظهور باخرة تبدو واقفة على بعد أمتار من الحتة المنحسرة ...والباخرة تحتاج الى غاطس كبير ...
وتدخل خبراء كبار بالتوضيح وعلى رأسهم الدكتور محمد علام، وزير الري الأسبق، الذي نفى وجود علاقة بين سد النهضة وانخفاض منسوب المياه في النيل، مؤكدا أن إثيوبيا لم تبدأ بعد مرحلة التخزين وراء السد....و الدكتور هيثم ممدوح، رئيس قسم الري بهندسة الإسكندرية، أكد عدم وجود أي انخفاض في منسوب مياه النيل ...
لكن لا زالت الصورة تواصل الإنتشار
**************
من هي ؟؟
وزة عراقي عايشة في مصر من سنين طويلة ...أول ما جت قدمت نفسها على انها شاعرة وكاتبة ...وهوب بقت موجودة في كل المناسبات الثقافية وبتقعد في الندوات واللقاءات الادبية ...وبالتأكيد ضيفة في عدد كبير من البرامج ورقمها دايما مع اغلب المعدين...
صديقة لكبار الكتاب وأشهرهم..
وده دليل على ان مصر بلد أهلها طيبين بيحبوا الوز
من كام سنة كنت ضمن فريق إعداد أحد برامج المنوعات ...ووجدت اسم الوزة في فقرة مستقلة بدون ضيوف آخرين ...
ولما قعدت معاها اخد منها شوية داتا اكتبهم كمقدمة للأخ المذيع ...اكتشفت انها لا تجيد الكلام ولا الكتابة حتى...
مكنش فيها غير شوية مياصة عراقي مع زرارين مفتوحين من البلوزة .....وريحة بارفان تدوّخ...
الله يرحم ايامك يا ميسون ياصقر
والله وسط المثقفين دول محتاج يتكتب عنه مجلدات
الصفحة كما نشرت في العدد الأسبوعي من المشهد
الصفحة كما نشرت في العدد الأسبوعي من المشهد